پۋنكتتەردەن 4785 ادام اقىل-كەڭەس الدى
ۇلان ناۋشاباەۆ, «جۇمىسپەن قامتۋ ورتالىعى» مكم-ءنىڭ جۇمىسقا ورنالاستىرۋ جانە مونيتورينگ ءبولىمىنىڭ مەڭگەرۋشىسى:
–بيىل حالىققا قىزمەت كورسەتۋ ورتالىقتارى سياقتى كىسى قاراسى مول جەرلەردەن جۇمىسپەن قامتۋ ورتالىعىنىڭ پۋنكتتەرى اشىلعانىن بايقادىق. ناتيجە قانداي؟
ء–يا, بيىلدان باستاپ «ساپارجاي» اۆتوۆوكزالىندا جانە سارىرارقا, ەسىل اۋداندارىنىڭ حالىققا قىزمەت كورسەتۋ ورتالىقتارىندا «جۇمىسپەن قامتۋ باعدارلاماسى-2020» باعدارلاماسى جونىندە ازاماتتارعا كەڭەس بەرەتىن پۋنكتتەر اشقانىمىزدىڭ ارقاسىندا ەلوردانىڭ ەڭبەك نارىعىن رەتتەۋ مۇمكىنشىلىگى كەڭەيە ءتۇستى. ويتكەنى, قايتا دايارلاۋ كۋرستارى بار ەكەنىن, ەلورداعا قانداي كادرلار جەتىسپەي جاتقانىن جالپاق جۇرت بىلە بەرمەيدى. ال اياقتاي بارىپ, ءجون سۇراۋعا ۋاقىت تاپشى. سوندىقتان حالىققا ءبىرتابان بولسا دا جاقىندايىق دەگەن ويمەن وسىلاي ۇيىمداستىردىق. اشىلعالى بەرى اتالمىش پۋنكتتەردەن 4785 ادام اقىل-كەڭەس الدى. ەسىل اۋداندىق حقو-دان – 1260, سارىرقا اۋداندىق حقو-دان – 2191, «ساپارجايدان» – 1366 ادام قىزمەتىمىزدى پايدالاندى.
-سونداي-اق ءجيى-ءجيى جارمەڭكە وتكىزىپ تۇراسىزدار. جۇرت ىزدەگەن جۇمىسىن تاۋىپ جاتىر ما؟
-ارينە. مىسالى, كۇنى كەشە عانا 19-20 ماۋسىمدا وتكەن قاجەت ماماندىقتار جارمەڭكەسىنە سانالۋان قىزمەت كورسەتۋ تۇرىمەن اينالىساتىن 54 جۇمىس بەرۋشى قاتىسىپ, 1000-عا جۋىق جاڭا جۇمىس ورنىن ۇسىندى. ەكى مىڭعا تارتا ادام كەلدى. اسىرەسە, جوعارى وقۋ ورنىن ەندى بىتىرگەن جاستار كوپ. جارمەڭكە قورىتىندىسى بويىنشا 321 ادامعا جۇمىسقا جولداما بەرىلدى. جاستاردى كاسىپكە بەيىمدەۋگە جوعارعى وقۋ ورىندارى دا بەلسەنە اتسالىستى.
– بيىل قانداي جاڭا ماماندىقتار وقىتىلادى؟
–تەحنيكالىق ماماندىقتار, گازەلەكتردانەكەرلەۋشى, اعاش شەبەرى, قۇرىلىسشى سياقتى قاراپايىم جۇمىسشى ماماندىقتار قاشان دا كەرەك. مىسالى, 19 ماۋسىمدا ۇكىمەت قاۋلىسىمەن «جۇمىسپەن قامتۋدىڭ جول كارتاسى – 2020» بەكىتىلدى. استانادا سونىڭ ءبىرىنشى باعىتى بويىنشا, ياعني, الەۋمەتتىك-مادەني ينفراقۇرىلىمداردى سالۋ مەن ءجوندەۋ, تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋعا كوڭىل ءبولۋ ارقىلى جاڭا جۇمىس ورىندارى اشىلادى.
ال ءۇشىنشى باعىتى بۇرىنعىسىنشا قاجەت ماماندىقتاردى قايتا دايارلاۋعا ارنالىپ وتىر. ولاردىڭ ءتىزىمى قاجەتتىلىككە قاراي رەتتەلىپ وتىرادى. ماسەلەن, استانادا مەملەكەتتىكپەن قوسا, جەكەمەنشىك بالاباقشالار, شاعىن ورتالىقتار اشىلۋدا. ياعني, ءتاربيەشى ماماندىعى كەرەك. ەسەپشى ماماندىعىنا سۇرانىس كوپ. سونداي-اق, EXPO-2017 قارساڭىندا تاكسي جۇرگىزۋشىسى, اۋدارماشى-گيد ماماندىقتارىن قوسىپ وتىرمىز. بيىل شامامەن 400-دەن استام ادام قىسقاشا وقۋ كۋرسىنان وتەدى.