كەشە فۋتبولدان قازاقستان چەمپيوناتىنىڭ پرەمەر-ليگاسىندا كەزەكتى تۋردىڭ ويىندارى ءوتتى. تۋردىڭ باستى ماتچى «استانا ارەنا» ستاديونىندا ءوتتى. جانكۇيەر قاۋىم قازاقستاندىق دەربيدى كوردى. «استانا» مەن «قايرات» اراسىنداعى ويىندا جەتى (!) دوپ سوعىلدى.
ويىن 4:3 ەسەبىمەن اياقتالدى. جەڭىمپاز – «استانا»! ءبىرىنشى تايمدا ءتورت گول سوعىلدى. ەسەپتى گەورگي جۋكوۆ اشتى. ول قوناقتاردىڭ ايىپ الاڭىنىڭ ورتاسىنان شىرەنە تەپتى. الا دوپ قاقپا تورىنا تۋلاپ ءتۇستى. الايدا, ارادا كوپ ۋاقىت وتپەي-اق كوتديۆۋارلىق گوۋ ەسەپتى تەڭەستىرىپ كەتتى. ءبىرىنشى تايم اياقتالار تۇستا «قايرات» كاپيتانى باۋىرجان يسلامحان مەرگەندىگىمەن كوزگە ءتۇسىپ, ۆايسس كومانداسى العا شىققان. بىراق, ارادا ءبىر مينۋت وتپەي سەربيالىق نەمەنيا ماكسيموۆيچ «قايرات» قاقپاسىنا كەرەمەت گول سوقتى. ونىڭ باسپەن ۇرعان سوققىسىنا قاقپاشى توسقاۋىل بولا المادى. ءسويتىپ, كوماندالار ۇزىلىسكە 2:2 ەسەبىمەن تارقاستى. ەكىنشى تايمدا دا تارتىستى باسەكە جالعاستى. سول جەرار گوۋ كومانداسىن العا شىعاردى. باۋىرجان جولشيەۆ قارىمتا قايتاردى. ەسەپ 3:3. وسى تۇستا الاڭ جيەگىندەگى باپكەرلەردىڭ دە, تريبۋناداعى كلۋب باسشىلارىنىڭ دا, فۋتبولشىلاردىڭ دا قاتتى قوبالجىعانى بايقالدى. جانكۇيەرلەر بولسا داۋىس جەتكەنشە ايعايعا باسىپ جاتىر. ەكىنشى تايمنىڭ ورتاسىنان اسا ويىنعا قوسىلعان, ءبىرازدان بەرى جاراقاتىنان ايىعا الماي جۇرگەن تانات نوسەرباەۆ ءدال وسى ويىندا ناعىز كاپيتاندىعىن تانىتتى. ويىن اياقتالۋعا ساناۋلى مينۋتتار قالعاندا نوسەرباەۆ «قايرات» قاقپاسىنا وتە ادەمى گول سالدى. ەسەپ 4:3 بولدى. قوناقتار قانشا تىرىسقانىمەن وسى كورسەتكىش وزگەرمەدى. ءسويتىپ, جانكۇيەر قاۋىمدى اسا قىزىقتىرعان ويىندا استانالىقتار جەڭىسكە جەتتى.
بيىلعى چەمپيوناتتى «قايرات» – حالىق كومانداسى» دەپ ۇرانداتىپ باستاعان الماتىلىقتاردىڭ ەكپىنى شىنىمەن دە كۇشتى. جاقسى ويىنشىلارمەن جاساقتالعان «حالىق كومانداسى» بىلتىرعى بىرىنشىلىكتىڭ سوڭىندا ءسۇرىنىپ, كوزدەگەن التىن جۇلدەنى ۋىسىنان شىعارىپ العان ەدى. سول وكىنىشتىڭ ورنىن بيىل تولتىرۋدى ماقسات تۇتقاندارى بايقالادى. فۋتبولشىلارى دا, جانكۇيەرلەرى دە وسىنداي ويمەن جۇرگەندەرى جانە اڭعارىلادى. الايدا, باسقا كوماندالار دا قاراپ قالماسى انىق, ويتكەنى, ءار ايماقتىڭ جانكۇيەرى ءوز كومانداسىن «حالىق كومانداسى» سانايتىنى بەلگىلى. دەمەك, «حالىق كومانداسى» بولۋ ءۇشىن چەمپيون بولۋ كەرەك-اق. سودان بارىپ ەۋروپانىڭ كلۋبتىق تۋرنيرلەرىندە ەل نامىسىن قورعاۋى ءتيىس. قورعاعاندا ابىرويلى ويىن كورسەتە بىلسە… وسىنداي ماقساتقا ۇمتىلعان كوماندانى, ۇلت نامىسىن كوتەرە بىلگەن كوماندانى, ارينە, ءبارىمىز دە «حالىق كومانداسى» دەۋگە بارمىز. ولاي بولسا, ونداي كوماندانى كۇزگە دەيىن كۇتۋگە تۋرا كەلەدى.
تۋردىڭ باسقا ويىندارىندا مىنانداي كورسەتكىشتەر تىركەلدى:
«اقتوبە» – «جەتىسۋ» 2:0, «اتىراۋ» – «وقجەتپەس» 2:1, «تاراز» – «توبىل» 1:0, «ورداباسى» – «قايسار» 0:0, «شاحتەر»-«ەرتىس» 2:2.
