قايرات جاقىپوۆ, «استانا قالاسى بويىنشا بەلگىلى تۇراعى جوق ادامدارعا ارنالعان الەۋمەتتىك بەيىمدەلۋ ورتالىعى» كمم ديرەكتورى: تۇراعى جوقتار تاعدىرى ويلانتادى
– قايرات اسەتۇلى, ورتالىقتىڭ احۋالى قالاي؟ كۇن سۋىتقالى مۇندا كەلۋشىلەر سانى كوبەيگەن شىعار؟
– بەيىمدەۋ ورتالىعى نەگىزىنەن 180 ادامعا لايىقتالعان. بىراق, مۇندا كەلۋشىلەردىڭ سانىن ەسەپكە الا وتىرىپ, 230 ادامدى قابىلداۋعا مۇمكىندىك جاسادىق.
بۇگىنگى تاڭدا مەكەمەدە 201 ادام تۇرىپ جاتىر. بۇدان بولەك كۇنىنە 18-20 ادام كەلىپ-كەتەدى. ياعني, كەشكىسىن قوناتىن جەرى جوق جاندار ورتالىققا تۇنەپ, تاڭەرتەڭ كەتىپ قالادى. كەشكىسىن جۇمىسىن بىتىرگەننەن كەيىن ورتالىقتى قايتا پانالاۋعا ءماجبۇر. مۇندا كەلگەن جانداردىڭ تاعدىرى ءارتۇرلى. ءبىز كەشەندى جۇمىستار جۇرگىزىپ, قايدان كەلگەنىن, قايدا باراتىنىن, قايدا جىبەرۋ كەرەكتىگىن زەرتتەيمىز.
– ورتالىققا تۇسكەن ادامعا قانداي كومەك كورسەتىلەدى؟
– تۇراعى جوق ادامداردىڭ كۇيى بولمايتىنى بەلگىلى. ەڭ الدىمەن, ولاردى سانيتاريالىق جاعىنان قاداعالايمىز. جۋىندىرىپ, تازا كيىمدەرمەن قامتاماسىز ەتەمىز. اس-سۋىن بەرگەننەن كەيىن, دارىگەرلەر دەنساۋلىعىن باقىلايدى. جۇقپالى اۋرۋمەن اۋىراتىنىن نەمەسە اۋىرمايتىنىن تەكسەرەمىز. قۇجاتىنان ايىرىلعاندارعا قۇجات دايىندايمىز, تۋىسىنان اداسقانداردىڭ تۋىستارىنا ىزدەۋ سالامىز, جۇيكە اۋرۋىنا شالدىققانداردى ارناۋلى اۋرۋحاناعا جىبەرەمىز, مۇگەدەك جانداردى نەمەسە قاريا كىسىلەردى قارتتار ۇيىنە جەتكىزەمىز. وسىنداي جان-جاقتى الەۋمەتتىك كومەك كورسەتۋ ارقىلى ورتالىققا كەلۋشىلەردىڭ سانىن رەتتەپ وتىرامىز.
– ازاماتتار بەيىمدەۋ ورتالىعىن قانشا ۋاقىتقا دەيىن پانالاي الادى؟
– ەرەجە بويىنشا ءبىر جىلعا دەيىن عانا پانالاتۋعا مۇمكىندىگىمىز بار. ال سىرتتان, ياعني, وزگە وڭىردەن كەلگەندەر ءبىر ايعا دەيىن وسىندا بولادى. استاناعا ەلىمىزدىڭ ءار ايماعىنان كەلىپ, نە جۇمىس, نە باسپاناعا قولى جەتپەي, بەيىمدەۋ ورتالىعىنا كەلگەن ازاماتتاردى قايتادان ەلىنە قايتارۋعا كومەكتەسەمىز.
– ءۇيسىز-كۇيسىز جاندار مۇنداي ورتالىقتىڭ بار ەكەندىگىن قالاي بىلەدى؟
– تۇنگى قونۋ بولىمىنە تۇنەۋگە كەلەتىن ازاماتتار وزدەرى كەلىپ-كەتىپ جۇرەدى. سونىمەن قاتار «الەۋمەتتىك پاترۋل» جۇمىس ىستەيدى. ولار قوعامدىق ورىنداردا, ۆوكزال, اۋەجاي, ساپارجاي, بازار ماڭىنا رەيدكە شىعىپ, تۇراعى جوق قاڭعىپ جۇرگەندەردى تۇگەندەيدى. جالپى, قوعامنىڭ الەۋمەتتىك كومەككە ءزارۋ كەز كەلگەن ءمۇشەسىنە جاردەم بەرۋ, الەۋمەتتىك كومەك كورسەتۋ – مەملەكەتتىڭ ۇستانعان ءبىر باعىتى.
– اڭگىمەڭىزگە راحمەت!
گۇلميرا ايماعانبەت