ۇلى جەڭىستىڭ 70 جىلدىق تورقالى تويى مەرەكەلەنىپ جاتقاندا بۇل كۇندە دۇنيەدەن ءوتىپ كەتسە دە, تاعىلىمدى عۇمىرىمەن ۇرپاققا ۇلگى بولعان نۇركەن ەسحوجين اتامدى ءجيى ەسىمە الامىن. مەن ونىڭ شوبەرەسىمىن. ەگەر دە, ول كىسىنىڭ بۇگىندە كوزى ءتىرى بولسا, ءوزى قاتارلاس مايدانگەرلەر ساپىندا كەۋدەسى وردەن-مەدالعا تولى اتام دا جارقىراپ جۇرەر ەدى.
اتامىز قورعالجىندا 1925 جىلى دۇنيەگە كەلگەن. 1943 جىلى وتىزىنشى قاڭتاردا ءبىزدىڭ ۇيدەن, مەنىڭ اجەمنىڭ, ياعني, جەڭگەسىنىڭ قولىنان اسكەرگە الىنىپ, مايدانعا كەتەدى. لەنينگراد جانە بەلارۋس مايداندارىندا, 219-پولكتىڭ اتقىش-مينومەتشىسى, كەيىن زەنيتشى بولادى. ۆزۆود كومانديرىنىڭ ورىنباسارلىعىنا تاعايىندالادى.
سۇراپىل سوعىستان 1948 جىلى امان-ەسەن تۋعان جەرى قورعالجىنعا ورالىپ, وتباسىن قۇرادى. بالا ءسۇيىپ, سوعىس زاردابىنان جان-جاققا تاراپ كەتكەن تۋىستارىن جينايدى, ولاردى قاناتىنىڭ استىنا الادى. اتام بەيبىت زاماندا دا كوپكە ۇلگى بولاتىنداي ءومىر ءسۇردى. اسىرەسە, تىڭ كوتەرۋ كەزەڭىندە, شارۋاشىلىقتىڭ باس اگرونومى بولىپ, تۋعان جەرىنىڭ دامۋىنا ايتارلىقتاي ەڭبەك سىڭىرەدى. اۋداننىڭ تۇقىم ينسپەكتسياسىن كوپ جىل باسقارىپ, استىق ونىمدەرىنىڭ ارتۋىنا ەسەلى ۇلەس قوستى. 1997 جىلى 28 مامىردا دۇنيەدەن ءوتتى.
قاندى مايداندى كوزىمەن كورگەن اتام بالالارى مەن نەمەرەلەرىنە سوعىستا العان وردەن, مەدالدارىن, سۋرەتتەرىن, حاتتارىن كورسەتىپ, قايسىسىن قاي جەردە العانىن, نە ءۇشىن بەرگەنىن اڭگىمەلەپ وتىراتىن.
تاياۋدا رەسەيلىك «پودۆيگ نارودا» دەگەن ينتەرنەت سايتتا, اتامنىڭ ءبىز بىلمەيتىن ەرەن ەرلىكتەرىن وقىپ, قاتتى تەبىرەنىستە بولدىم. ءتىپتى, سوعىس كەزىندە ماراپاتقا ۇسىنىلعان قاعازى دا ساقتالعان. وندا بىلاي جازىلعان:
«اتى-ءجونى – ەسحوجين نۇركەن, شەنى – سەرجانت, ۇلتى – قازاق, اسكەرگە شاقىرىلعان جەرى قاراعاندى وبلىسى, نۇرا اۋدانى. 1943 جىلى 29 ساۋىردە اۋىر جارالانعان. ماراپاتتارى 15.02.1943 جىلى «ەرلىگى ءۇشىن» مەدالىن العان. نەمىس-فاشيستىك باسقىنشىلارىمەن سوعىستا كورسەتكەن ەرەن ەرلىگى ءۇشىن «قىزىل جۇلدىز» وردەنىنە ۇسىنىلادى: 1945 جىلى 6-7 ءساۋىر كۇنى, جاڭبىرشا جاۋىپ تۇرعان جاۋ وعى استىنان 13 جارالى جاۋىنگەردى, 7 ءساۋىر كۇنى اۋىر جاراقات العان ۆزۆود كومانديرىن جاۋ وعى استىنان الىپ, گوسپيتالگە جەتكىزگەنى ءۇشىن جانە سول كۇنى, تاعى 17 جارالانعان جاۋىنگەردى قۇتقارعانى ءۇشىن «قىزىل جۇلدىز» وردەنىنە لايىق دەپ سانايمىز». 219-مينومەتشىلەر پولكىنىڭ كومانديرى: ماكسيمەنكو. 10.04.1945 ج
اۋىلدان 18 جاسىندا اتتانىپ, سۇراپىل سوعىستا اۋىر جاراقات السا دا, 20 جاسىندا قايتا ساپقا تۇرىپ, جاۋىپ تۇرعان وقتىڭ استىنان ەكى كۇن ىشىندە 31 جارالى جاۋىنگەردى قۇتقارىپ, ەرلىك كورسەتكەن. نە دەگەن – ەرجۇرەكتىلىك, قايتپاس تاباندىلىق! اتامنىڭ قىزىل اسكەر كىتاپشاسىنا باس قولباسشىنىڭ جەتى ماراپاتتاۋ حاتى تىركەلگەن. وعان قوسا «قىزىل جۇلدىز», «وتان سوعىسى» وردەندەرى, مەدالدارى بار. ءبىز اتامىزدىڭ ەرلىگىن ەشقاشان ۇمىتپايمىز!
ديماش ەسحوجين
