ەلوردانىڭ «Aspan» سپورت كەشەنىندە استانا قالاسى دەنە شىنىقتىرۋ جانە سپورت باسقارماسىنىڭ قولداۋىمەن, قازاقستان بەلبەۋ جانە ۇلتتىق كۇرەس تۇرلەرى قاۋىمداستىعىنىڭ ۇيىمداستىرۋىمەن «SOS بالالار اۋىلى» تاربيەلەنۋشىلەرى اراسىندا جەڭىل اتلەتيكادان قايىرىمدىلىق ەستافەتا جارىسى ءوتتى.
جارىسقا قازاقستان بەلبەۋ جانە ۇلتتىق كۇرەس تۇرلەرى قاۋىمداستىعىنىڭ پرەزيدەنتى, گەنەرال-لەيتەنانت اباي تاسبولاتوۆ, استانا قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەركەعالي كوربوزوۆ جانە بەلگىلى رەكوردشى سەرگەي تسىرۋلنيكوۆ قاتىسىپ, بالالارعا جارىس جولىندا ساتتىلىك تىلەدى.
قايىرىمدىلىق شاراعا الماتى اۋداندىق پوليتسيا باسقارماسى, قالالىق «بۇقارالىق سپورت ءىس-شارالارىن ۇيىمداستىرۋ جانە وتكىزۋ» ديرەكتسياسى, «Astana Art Group» جشس دەمەۋشىلىك كورسەتىپ, بالالارعا مەرەكەلىك كوڭىل كۇي سىيلادى.
«بۇل قايىرىمدىلىق ەستافەتا جارىسى تەك باستاماسى دەپ بىلەيىك. بالالار جىلى اياسىندا ءوتىپ جاتقان شارامىز الداعى جىلدا دا ءوز جالعاسىن تابادى دەپ سەنەمىز» دەدى استانا قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى ە.كوربوزوۆ.
قايىرىمدىلىق ەستافەتاعا 30-عا جۋىق «SOS بالالار اۋىلىنىڭ» تاربيەلەنۋشىلەرى قاتىستى. ولار ەستافەتا تاياقشالارى ارقىلى بىرنەشە كەدەرگىنى ەڭسەردى.
شارا بارىسىندا استانا قالاسىنىڭ كاراتە شەبەرلەرى كيوكۋشينكاي كان كاراتەنىڭ قويىلىمىن كورسەتتى.
سونداي-اق جارىس الدىندا بالالار ەلىمىزگە تانىمال قارا كۇش يەسى – سەرگەي تسىرۋلنيكوۆتىڭ دا ونەرىن تاماشالادى. ول الدىمەن ءوزىنىڭ 27 كەلىلىك قىلىشىن جىگىتتەرگە ءبىر قولىمەن تىك كوتەرتتى. ال نازىك جاندىلارعا شار ۇستاتىپ, ءوزى رەزەڭكە جىلىتقىشتى ۇرلەپ جارىستى. بۇل تاپسىرمانى رەكوردشىنىڭ ءوزى ءبىرىنشى ورىنداپ, كوپشىلىكتى تاڭعالدىردى.
ۇيىمداستىرۋشىلاردىڭ ايتۋىنشا, «SOS قازاقستان بالالار اۋىلدارىنىڭ» ءبىرى استانا قالاسىندا بولسا, قالعان ەكەۋى الماتى مەن تەمىرتاۋ قالاسىندا ورنالاسقان. بالالار قاراپايىم قالالىق مەكتەپتەرگە بارىپ ءبىلىم الادى, ۇيىرمەلەرگە قاتىسادى.
«SOS استانا بالالار اۋىلى» جەتىم بالالار مەن اتا-انا قامقورلىعىنسىز قالعان بالالارعا قامقورشىلىق ەتەدى. ياعني قيىن جاعدايعا تاپ بولعان وتباسىلارعا, از قامتىلعان جانە كوپبالالى وتباسىلارعا, بالالارى بار SOS وتباسىلارعا كومەكتەسەتىن وتباسىن قولداۋ ورتالىعى.
جارىس سوڭىندا ەستافەتاعا قاتىسقان بالالارعا مەدال, ەستەلىك سىيلىق جانە دەمەۋشىلەر اتىنان سەرتيفيكات تابىستالدى.
