قالا بالاسى قالاي دەمالادى؟
بالالاردى قورعاۋدىڭ حالىقارالىق كۇنى «استانالىق» ساياباعىنا بارعانبىز. اينالاداعى بالدىرعانداردىڭ شات كۇلكىسى ءوزىمىزدىڭ بالالىق شاعىمىزداعى الاڭسىز كۇندەرگە جەتەلەدى. سول كەزدە ءۇش اي كانيكۋلدى الا كەلەتىن جايماشۋاق جازدى اسىعا كۇتەتىنبىز. جازعى دەمالىسقا شىعا سالىپ, اۋىلىمىزدا جالاڭاياق قىر كەشىپ نەمەسە قالاداعى اپالارىمىزعا قىدىرىپ باراتىنبىز. كۇزدە مەكتەبىمىزگە ورالعاندا «مەن جازدى قالاي وتكىزدىم؟» تاقىرىبىنا شىعارما جازاتىنبىز. سوندا قالاي بولعاندا دا اۋىلدا وتكەن كانيكۋل قالاداعىدان قىزىق ەدى.
ساياحاتشىلار ستانتسياسى
ءيا, ءبىز اۋىلدان شىققان بالا بولاتىنبىز. قازىرگى كوپ قالا بالالارىنداي كۇنۇزاق كومپيۋتەرگە تەلمىرمەي, تازا اۋادا كۇنىمىزدى وتكىزەتىنبىز. الايدا, قالادا دا كانيكۋلدى قىزىقتى وتكىزۋگە بولادى ەكەن. اسىرەسە, استانا بۇل جاعىنان وزگە وڭىرلەردەن كوش ىلگەرى سياقتى.
ەلوردادا 2005 جىلى جاس ساياحاتشىلار ستانتسياسى اشىلعان. قالالىق ءبىلىم باسقارماسىنا قاراستى مەكەمە باس قالاداعى 20 مەكتەپتىڭ 5-10 سىنىپ وقۋشىلارىن, باس-اياعى 743 جەتكەنشەكتى جىل بويىنا ءتۇرلى تانىمدىق جانە سپورتتىق شارالارمەن قامتىپ كەلەدى. ساياباقتاعى الاڭقايعا تىگىلگەن بىرنەشە شاتىردا ءبىز ستانتسيانىڭ ءۇيىرمەلەرىنە قاتىساتىن بالالاردى كەزىكتىردىك. وندا جارتاسقا ورمەلەۋ بويىنشا جارىس ءوتىپ جاتىر ەكەن. بالالار جارتاسقا ۇقساتتىرىپ جاسالعان قۇرىلىسقا ورمەلەۋدىڭ شەبەرلىگىن كورسەتتى. ءبىز وسى مەكەمەنىڭ ادىستەمەلىك ءبولىمى مەڭگەرۋشىسى گۇلنار قوراباەۆامەن تىلدەستىك.
ونىڭ ايتۋىنشا, ساياحاتشىلار ستانتسياسىندا 26 ءۇيىرمە بار. سونىڭ ىشىندە «تاۋ ءتۋريزمى», «جاياۋ ءجۇرۋ تۋريزمى», «سۋ ءتۋريزمى, «الپينيزم», «جارتاسقا ورمەلەۋ», «تۋريستىك كوپسايىس», «سپورتتىق باعدارلاۋ», «ۆەلوتۋريزم» سىندى سپورتتىق باعىتتاعى جانە «جاس ەكولوگ – ولكەتانۋشىلار», «جاس ارحەولوگتار», «ولكەتانۋشى – تۋريستەر», «گەوگراف – ولكەتانۋشىلار», «مۇراجاي ءىسى» سياقتى تانىمدىق سيپاتتاعى ۇيىرمەلەر, سونداي-اق, بالالارعا ەستەتيكالىق تاربيە بەرۋدى كوزدەيتىن «بارد اندەرى» ءۇيىرمەسى جۇمىس ىستەيدى.
- استانا قالاسى ءبىلىم باسقارماسىنىڭ حابارلاۋىنشا, «ارمان» سپورتتىق-ساۋىقتىرۋ لاگەرىندە بالالار بيىل 6 ماۋسىمنان – 12 تامىزعا دەيىن دەمالادى. جالپى العاندا 5 اۋىسىم كوزدەلگەن. ءاربىر اۋىسىمدا 330 بالادان بولادى. ال جاز مەزگىلى بويىنشا 1650 بالانى قامتۋ جوسپارلانعان.
«تاربيەلەنۋشىلەرىمىز جاز مەزگىلىندە, ماۋسىم ايىنىڭ 14-ىنەن باستاپ تازا اۋاعا شىعىپ, تابيعات اياسىندا دەمالادى. اقمولا وبلىسىنىڭ ەرەيمەنتاۋ اۋدانىنىڭ قاراتاۋ تاۋلارى شاتقالىنداعى العاباس اۋىلى ماڭىندا «باتىر» شاتىرلىق لاگەرى تىگىلەدى. وندا بالالار ءۇش ماۋسىم بويى, ءار ماۋسىمدا ون كۇننەن كانيكۋلدى قىزىقتى, ءارى دەنساۋلىققا پايدالى ەتىپ وتكىزەدى. جەتكىنشەكتەر سول ۋاقىت بويى كومپيۋتەر بەتىن كورمەي, نوۋتبۋك, ۇيالى تەلەفون قولدانبايدى. وتقا تاماق ءپىسىرىپ, تۋريستىك ساپارلارعا شىعادى. ءتۇرلى ويىندار ۇيىمداستىرىلادى. ءبىزدىڭ نۇسقاۋشىلارىمىز ولارعا باعىت-باعدار بەرەدى» دەيدى گ. قوراباەۆا.
جاس جەڭىمپازدار
ستانتسيادا پاتريوتتىق شارالار دا ۇيىمداستىرىلىپ تۇرادى. العان باعىتىنا سايكەس بالالار سلەتتەرگە, جارىستارعا, كونكۋرستارعا قاتىسادى. ءماسەلەن, مامىر ايىندا شىمكەنت قالاسىندا «وتان جولىمەن» اتتى ولكەتانۋشى – تۋريستەردىڭ سلەتى ءوتتى. استانا قالاسىنىڭ قۇراماسىنا لەيلا شميدكە, دينا قايىروۆا (№ 13 ورتا مەكتەپ), نۇرباي ەسەنوۆ, قايىرجان ساپاروۆ, جانسۇلتان ساۋلەمباەۆ (№65 مەكتەپ-گيمنازيا), انەل سۇلتانوۆا, ارايلىم جارىلقاسىن (№50 مەكتەپ-ليتسەيى), ماليكا بايرونوۆا (№72 مەكتەپ-گيمنازيا) جانە ەلجان ۋاحيتوۆ (№53 ورتا مەكتەپ) كىردى. كومانداعا №65 مەكتەپ-گيمنازياسىنىڭ گەوگرافيا مۇعالىمى, جاياۋ ءجۇرۋ ءتۋريزمى ۇيىرمەسىنىڭ جەتەكشىسى بەكزات راحىمبەكوۆ جانە №50 مەكتەپ-ليتسەيىنىڭ گەوگرافيا مۇعالىمى, «گەوگراف-ولكەتانۋشىلار» ۇيىرمەسىنىڭ جەتەكشىسى قابانباي جاقىپوۆ جەتەكشىلىگىمەن ەلوردا قۇراماسى وندا جالپىكوماندالىق ءۇشىنشى ورىندى جەڭىپ الدى. بالالاردى قورعاۋدىڭ حالىقارالىق كۇنى استانانىڭ ءبىلىم باسقارماسى كوماندانى ماراپاتتادى.
وتكەن اپتادا اقمولا وبلىسىنىڭ پريرەچنىي اۋىلىنىڭ مايلان شوقىسى ماڭىندا «سۋ اعىنى – 2016» اتتى سۋ ءتۋريزمى بويىنشا قالالىق جارىس ءوتتى. ءۇش كۇنگە سوزىلعان جارىسقا 80 ادام قاتىستى. قورىتىندىسىندا جاسىنا بايلانىستى ءارتۇرلى توپقا بولىنگەن جەڭىمپازدار انىقتالدى.
- «باتىر» شاتىرلىق لاگەرىنىڭ 14 ماۋسىمنان – 14 شىلدەگە دەيىن سوزىلاتىن ءۇش اۋىسىمى ىشىندە 375 جەتىم بالا, از قامتىلعان وتباسىلاردان شىققان بالالار كانيكۋلدارىن تەگىن وتكىزەدى.
ەلىمىزدە قۇپياعا تولى جانە قاتپارلى تاريحتان سىر شەرتەتىن ۇڭگىرلەر كەزدەسەدى. جاس ساياحاتشىلار ستانتسياسىندا وسىعان بايلانىستى «سپەلەوتۋريزم» ۇيىرمەسى دە جۇمىس ىستەيدى. جالپى, جاياۋ, سۋ, تاۋ ۇڭگىر تۋريزمدەرىن ستانتسيا نۇسقاۋشىلارى كۇردەلى سپورتتىق جورىقتارعا بالايدى. الپينيزم مەن جارتاسقا ورمەلەۋ ەكسترەمالدى تۋريزم تۇرىنە جاتادى. بالالار قارشادايىنان وسىنداي ەل مەن جەر كورۋگە سەبەپ بولاتىن, ۇلتىمىزعا ءالى دە تاڭسىقتاۋ كورىنەتىن سپورت تۇرلەرىن ۇيرەنۋدە. ايتپاقشى, ستانتسيا ۇيىرمەلەرىنە قاتىساتىن جەتكىنشەكتەر ءبىراز شەت مەملەكەتتەردى ارالادى. جارتاسقا ورمەلەۋ سپورتى بويىنشا اۆستريا, فرانتسيا, گەرمانيا, سينگاپۋر, يران, يراك ەلدەرىندە بولىپ, جۇلدەگەردىڭ قاتارىنان كورىندى. بۇدان وزگە دە جاپونيا, قىتاي, يندونەزيا, برازيليا سىندى مەملەكەتتەردە بولىپ, قازاقستاننىڭ ابىرويىن اسقاقتاتتى.
- 160 جەتىم بالا جانە اتا-انا قامقورلىعىنسىز قالعان بالالار «بوروۆيچوك» دەمالىس ورنىندا ساۋىعادى.
ستانتسيا كوپتەگەن سپورتتىق فەدەراتسيالارمەن سەرىكتەستىك ورناتقان. سونداي-اق, استانا قالاسى ءىىد ناشاقورلىقپەن كۇرەس باسقارماسىمەن, استانا قالاسى سالاۋاتتى ءومىر سالتىن قالىپتاستىرۋ ورتالىعىمەن ۇنەمى بايلانىستا بولىپ, ولاردىڭ جاعىمسىز, زياندى ادەتتەرگە قارسى شارالارىنا اتسالىسىپ تۇرادى.
قورىتا ايتقاندا, ستانتسيا ءۇيىرمەلەرىنە قاتىساتىن بالالاردىڭ الارى كوپ. ارينە, مەكەمە بولاشاقتا ەلورداداعى بارلىق مەكتەپ وقۋشىلارىن قامتىسا, نۇر ۇستىنە نۇر بولار ەدى.
امانعالي قالجانوۆ