ەلوردا اكىمى ي.تاسماعامبەتوۆتىڭ قاتىسۋىمەن وتكەن قالالىق ءماسليحاتتىڭ كەزەكتى جيىرما سەگىزىنشى سەسسياسىندا استانا قالاسىنىڭ 2014-2016 جىلدارعا ارنالعان بيۋدجەتىنىڭ جوباسى ناقتىلاندى.
قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جانات نۇرپەيىسوۆ استانا قالاسى بيۋدجەتىنىڭ بەس جىلدىق كەزەڭىنە ارنالعان الەۋمەتتىك-ەكونوميكالىق دامۋ بولجامى «قازاقستان رەسپۋبليكاسىنىڭ بيۋدجەت تۋرالى» كودەكسىنە سايكەس ازىرلەنىپ, دايىندالعانىن ايتا كەلە, ونىڭ جوباسىن دەپۋتاتتاردىڭ نازارىنا ۇسىندى. وسىعان وراي, 2014 جىلى ەلوردانىڭ ەنەرگوكەشەنىن قايتا قۇرۋ جانە كەڭەيتۋ ءۇشىن رەسپۋبليكالىق جانە جەرگىلىكتى بيۋدجەتتەردەن قارجى بولىنەتىن بولدى.
– جەو-1, جەو-2 كەڭەيتىلىپ, قايتا قۇرىلادى, سونىمەن قاتار, قولدانىستاعى جىلۋ ەنەرگيا جەلىلەرى قالپىنا كەلتىرىلەدى. اتالعان جۇمىستاردىڭ ناتيجەسىندە الداعى جىلى ەلەكتر قۋاتىنىڭ كولەمى جىلىنا 120 مۆت جانە جىلۋ قۋاتتىلىعى 160 گكال بولادى دەپ كوزدەلگەن. ەلەكتر جەلىلەرىنىڭ وتكىزۋ قابىلەتتىلىگى 500-دەن 1200 مۆت, جىلۋ ماگيسترالىندەگى جىلۋ 1179-دان 2702 گكالعا دەيىن ارتادى. بۇدان باسقا, توزعان ماگيسترالدىق جەلىلەردىڭ كولەمى 15 پايىزعا ازايادى, – دەدى ج.نۇرپەيىسوۆ.
سونىمەن بىرگە, ەلوردادا 2014-2016 جىلدارى جەلىلىك پارك سالۋ جوسپارلانىپ وتىر. جەلىلىك پاركتەردى جاياۋ جۇرگىنشىلەر, ۆەلوسيپەد, قىستا شاڭعى, سالت اتتى سەرۋەن جولدارى, سپورتتىق ساۋىقتىرۋ ماقساتىندا جۇگىرۋ ءۇشىن سۋ قويمالارى مەن اعىن سۋلاردىڭ جانىندا جاساعان ءجون. جەلىلىك پاركتەردىڭ ەرەكشەلىگى – ەنى 50 مەتردەن 100-200 م دەيىن, ياعني, وتە از جانە ۇزىندىعى 1-10 شاقىرىمعا دەيىن بولادى.
ەلوردا حالقىن مادەني دەمالىس ورىندارىمەن قامتاماسىز ەتۋ ماقساتىندا «ابۋ-دابي پلازا» بىرەگەي كەشەنىنىڭ جانە «ەكسپو-2017» حالىقارالىق كورمەسىن وتكىزۋ الاڭىنىڭ جانىندا جەلىلىك پارك سالۋ كوزدەلىپ وتىر. باسقارما باسشىسىنىڭ ايتۋىنشا, اتالمىش پارك 11,3373 گا جەرگە ورنالاسپاق, سونىمەن بىرگە 75,5 مىڭ شارشى مەتر جەر كوگالداندىرىلادى. بۇدان باسقا, 2014-2016 جىلدارى ەسىل وزەنىنىڭ بويىنداعى پاركتىڭ قۇرىلىسى اياقتالىپ, قالالىق پاركتى جوندەۋ-جاڭعىرتۋ جۇمىستارى جالعاسادى.
ءبىلىم بەرۋ سالاسىنا كەلسەك, الداعى جىلى 9 مەكتەپتىڭ قۇرىلىسىن اياقتاۋعا جانە 4 مەكتەپ سالۋعا قارجى بولىنەدى. سونىمەن قاتار, 3 بالاباقشانىڭ قۇرىلىسى جالعاسادى, تاعى دا 3 بالاباقشانى سالۋ قولعا الىنادى, 8 مەكتەپكە دەيىنگى نىسان پايدالانۋعا بەرىلەدى. ءارقايسىسى 800 ورىندىق قۇرىلىس, بايلانىس جانە ەنەرگەتيكا ماماندارىن دايارلايتىن 2 كاسىبي تەحنيكالىق ليتسەيدىڭ قۇرىلىسى كەلەسى جىلى باستالادى. سونداي-اق, كەلەر جىلى قالامىزداعى باستاۋىش سىنىپ وقۋشىلارىنىڭ 50 مىڭعا جۋىعى تەگىن تاماقتاندىرىلادى.
دەنساۋلىق ساقتاۋ سالاسى بويىنشا سول جاعالاۋدا امبۋلاتورلىق-ەمحانالىق كەشەن, ءوندىرىس ەلدى مەكەنىندە جانە دوسمۇحامەدۇلى كوشەسىنىڭ بويىندا ارقايسىسى 150 ادامدى قابىلداۋعا ارنالعان 2 العاشقى مەديتسينالىق-سانيتارلىق كومەك كورسەتۋ ورتالىعى اشىلادى دەپ جوسپارلانۋدا. تۋبەركۋلەزگە قارسى ديسپانسەردىڭ قۇرىلىسى دا جالعاسادى.
باسقارما باسشىسىنىڭ ايتۋىنشا, استانا قالاسىنىڭ 2014-2016 جىلدارعا ارنالعان جالپى بيۋدجەتى – 772,8 ملرد تەڭگە. ونىڭ ىشىندە: 2014 جىلعا – 313,9 ملرد تەڭگە, 2015 جىلعا – 240,5 ملرد تەڭگە جانە 2016 جىلعا – 218,3 ملرد تەڭگە ءبولىندى. جالپى, الداعى ءۇش جىلعا بەلگىلەنگەن قالا بيۋدجەتى تۇرعىنداردىڭ تۇرمىس احۋالىن جاقسارتۋعا باعىتتالعان.
سەسسيا بارىسىندا استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى الما التىباەۆا قازاقستان رەسپۋبليكاسى تاۋەلسىزدىگىنىڭ كۇنىنە قازاقستاندا 1986 جىلى جەلتوقسان وقيعاسىنا قاتىسۋشىلاردىڭ ىشىنەن ساياسي قۋعىن-سۇرگىنگە ۇشىراعاندارعا 20 مىڭ تەڭگە كولەمىندە بىرجولعى الەۋمەتتىك كومەك كورسەتۋ ءۇشىن قارجى بولىنگەنىن جەتكىزدى.
سونىمەن بىرگە قالا ءماسليحاتىنىڭ 2014 جىلعا ارنالعان جۇمىس جوسپارى بەكىتىلىپ, كەزەكتى سەسسيانىڭ قاراۋىنا ەنگىزىلگەن نەگىزگى ماسەلەلەر مەن كەلەسى سەسسيانىڭ توراعاسىن بەلگىلەۋ جونىندە كەلىسىلدى.
گۇلبارشىن وكەشقىزى
