قالا بيۋدجەتى ناقتىلاندى
استانا قالاسى ءماسليحاتىنىڭ كەزەكتەن تىس, ون جەتىنشى سەسسياسىنا ەلوردا اكىمى يمانعالي تاسماعامبەتوۆ, قالا اكىمىنىڭ ورىنباسارلارى, اۋدان اكىمدەرى جانە قالالىق مەكەمە باسشىلارى قاتىستى. وندا استانا قالاسى ءماسليحاتىنىڭ 2012 جىلعى 6 جەلتوقسانداعى «استانا قالاسىنىڭ 2013-2015 جىلدارعا ارنالعان بيۋدجەتى تۋرالى» شەشىمىنە وزگەرىستەر ەنگىزۋ تۋرالى ماسەلە قاراستىرىلدى.
مۇنىڭ باستى سەبەبى قازاقستان رەسپۋبليكاسىنىڭ «2013-2015 جىلدارعا ارنالعان رەسپۋبليكالىق بيۋدجەتى تۋرالى» زاڭىنا وزگەرىستەر مەن تولىقتىرۋلار ەنگىزىلۋىمەن بايلانىستى بولىپ وتىر ەكەن. بۇل جونىندە جينالعانداردى قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جانات نۇرپەيىسوۆ ءمالىم ەتتى. وسىلايشا, استانا قالاسىنىڭ بيۋدجەتىنە 30 ملرد 834 ملن تەڭگە سوماسىندا ترانسفەرتتەر قوسىمشا قاراستىرىلىپ, قاراجاتتى قايتا ءبولۋ ءجۇرگىزىلگەن. سونداي-اق, بيىلعى بيۋدجەتتى ناقتىلاۋ كەزىندە تابىستار بويىنشا جىلدىق بولجام ۇلعايتىلدى. ول 8 ملرد 460 ملن تەڭگەنى قۇرادى.
قالا بيۋدجەتىن ناقتىلاۋدىڭ ناتيجەسىندە ەلورداداعى بالاباقشالار مەن دەنساۋلىق ساقتاۋ مەكەمەلەرىندە كۇردەلى جوندەۋ جۇمىستارىن جۇرگىزۋگە, سىرقاتتارعا امبۋلاتوريالىق-ەمحانالىق كومەك كورسەتۋگە, قانت ديابەتىمەن اۋىراتىن ناۋقاستاردى ارنايى دارمەكتەرمەن قامتاماسىز ەتۋگە قوسىمشا قاراجاتتار بولىنگەنىن جەتكىزە كەلە, باسقارما باسشىسى وسىنداي قاراجاتتاردىڭ ءبولىنۋى ازاماتتاردىڭ جەكەلەگەن ساناتتارىنا الەۋمەتتىك كومەككە جانە مۇگەدەكتەردى قولداۋمەن بىرگە استاناداعى بالالار پسيحونەۆرولوگيالىق ينتەرناتىن ۇستاۋعا, زورلىققا تاپ بولعان ادامدارعا ارنالعان كريزيستىك ورتالىقتى قۇرۋعا, سونىمەن بىرگە ءمادەنيەت مەكەمەلەرىن ۇستاۋعا جانە مادەني-بۇقارالىق ءىس-شارالارعا, سپورتشىلاردى كەشەندى مەديتسينالىق تەكسەرۋدەن وتكىزۋگە سەپتىگىن تيگىزگەنىن باياندادى. قالامىزدا تەننيس كەشەنىن, تۋبەركۋلەزگە قارسى ديسپانسەر مەن اۋداندىق اكىمدىكتەردىڭ عيماراتتارىن, ون بەس شاقتى باقتى سالۋعا ءارى رەكونسترۋكتسيالاۋعا, سونداي-اق ەكى مەكتەپتىڭ قۇرىلىسىن باستاۋعا, كونتەينەرلەر مەن كونتەينەرلىك الاڭ قۇرىلعىلارىن ساتىپ الۋعا جانە «بيزنەستىڭ جول كارتاسى-2020» باعدارلاماسى شەڭبەرىندە پايىزدىق مولشەرلەمەنى سۋبسيديالاۋ ءۇشىن دە قوسىمشا قارجى قاجەت بولاتىن. بيۋدجەتتى ناقتىلاۋدىڭ ارقاسىندا وسىنىڭ بارىنە, سونداي-اق قالا اۋماعىن اباتتاندىرۋعا, تۇرعىن ءۇي-كوممۋنالدىق شارۋاشىلىق نىساندارىن دامىتۋعا, اۆتوجولدار مەن ينجەنەرلىك جەلىلەر سالۋعا قاراجات بولىنگەن.
ەنگىزىلگەن وزگەرىستەردى ەسكەرسەك, استانا قالاسىنىڭ 2013 جىلعا ناقتىلانعان بيۋدجەتىنىڭ جالپى كولەمى 296 ملرد 865 ملن تەڭگەنى قۇرادى.
گۇلبارشىن وكەشقىزى