كۇنى كەشە باس قوسقان بەسىنشى شاقىرىلىمنىڭ حالىق قالاۋلىلارى كەزەكتەن تىس سەگىزىنشى سەسسياسىن وتكىزدى. كۇن تارتىبىنە جەتى ماسەلە قويىلدى. ماڭىزدى جيىنعا قالا اكىمى يمانعالي تاسماعامبەتوۆ, ونىڭ ورىنباسارلارى – ا.بالاەۆا, ە.قوجاعاپانوۆ, ەسىل اۋدانىنىڭ اكىمى س.مۇستافينا مەن سارىارقا اۋدانىنىڭ اكىمى ە.وسپانوۆ, بارلىق باسقارما باسشىلارى جانە قوعامدىق بىرلەستىك وكىلدەرى قاتىستى. دەپۋتاتتاردىڭ دەنى جينالىپ, قوردالانعان ماسەلەلەرمەن تانىسىپ, شەشۋ جولدارىن قاراستىردى.
العاشقى ماسەلەنى ەكونوميكا جانە بيۋدجەتتىك جوسپارلاۋ باسقارماسىنىڭ باستىعى جانات نۇرپەيىسوۆ ورتاعا سالدى. ول جينالعان قاۋىم نازارىنا 2011 جىلعى 7 جەلتوقساندا بەكىتىلگەن «استانا قالاسىنىڭ 2012-2014 جىلدارعا ارنالعان بيۋدجەتى تۋرالى» شەشىمىنە وزگەرىستەر مەن تولىقتىرۋلار ەنگىزۋ تۋرالى ۇسىنىسىن ءمالىم ەتتى. ءجىتى دايىندالعان ەكونوميكالىق ساراپتاۋدان بيۋدجەتتى قايتا ناقتىلاۋ قاجەتتىلىگى تۋىنداعانىن تۇسىندىك. وعان قالاداعى الەۋمەتتىك-ەكونوميكالىق ورىستەۋ مەن سالىقتىق اكىمشىلەندىرۋ تەتىكتەرىنىڭ قۇنتتى جۇمىس اتقارۋى نەگىز بولعان. وسى سەبەپتىڭ ارقاسىندا ۇستىمىزدەگى جىلدىڭ قاڭتار-تامىز ايلارى ارالىعىندا 111,5 پايىزدىق مەجەگە جەتكەن كىرىستىڭ ارتىقشىلىعى ايقىندالىپ وتىر. ونىڭ 60 پايىزدان استامىن قوسىمشا قۇن سالىعى مەن الەۋمەتتىك سالىق ەسەبىنەن تۇگەندەلگەنىنە باس ەكونوميست باسا نازار اۋداردى. سونىمەن قالا كىرىسى 7 ميلليارد 219,4 ميلليون سومانى قۇراپ وتىر. بۇل ءوز كەزەگىندە بيۋدجەتتى قايتا ەسەپتەپ, ۇلعايتىپ, سۇرانىسقا يە سالالارعا قوسىمشا قارجى ءبولۋدى قاراستىرۋعا مۇرىندىق بولعان. باس ەسەپشىنىڭ سوزىنە سۇيەنسەك, بىرنەشە باسقارما مۇقتاج قاراجاتقا قول جەتكىزىپ وتىر. دەپۋتاتتار ۇسىنىلعان جوسپار كەستەسىمەن تانىسا وتىرىپ, ەشقانداي ساۋال جولدامادى. ەڭ كوپ قاراجات قارجى باسقارماسىنا تيەسىلى بولسا, ەڭ ازى ىشكى ساياسات باسقارماسىنىڭ ەنشىسىنە ءتيىپتى.
ءبولىنىپ وتىرعان قارجىنىڭ ەسەبىنەن يلينكا اۋىلىنداعى 200 ورىنعا ارنالعان مەكتەپتىڭ جاڭا عيماراتى, الماتى-اقمەشىت كوشەلەرىنىڭ قيىلىسىنداعى جاڭا بالاباقشا قۇرىلىسى, «جۋراۆۋشكا» باقشاسىنىڭ قوسىمشا بولىگى سالىنىپ بىتپەك. وڭتۇستىك-شىعىس ىقشام اۋدانىندا جاڭا امبۋلاتورلىق ەمحانا قۇرىلىسىن اياقتاۋ جوسپارلانعان. ودان بولەك ءار سالانىڭ وزىنە تيەسىلى ماقساتتى جۇمىستارى جۇيەلى تۇردە باپپەن ورىندالا بەرەدى.
«ادىلەت» تۇتىنۋشىلار قۇقىعىن قورعاۋ قوعامىنىڭ توراعاسى قابىكەن زاكاريانوۆتىڭ جان جاقتان قىسقان قىمباتشىلىقتى جەڭىلدەتۋ ءۇشىن وسىنداي كىرىستى زەينەتاقىنى نەمەسە جالاقىنى كوبەيتۋگە جۇمساۋعا, ياكي قالالىق كوممۋنالدىق تاريفتەردى تومەندەتۋگە بولماس پا دەگەن ساۋالىنا جانات نۇرپەيىسوۆ قىمباتتاۋعا قاراماستان, مۇنداي وتىنىشتەر تەك رەسپۋبليكالىق دەڭگەيدە شەشىلەتىنى, سوندىقتان بۇل ساۋالدىڭ شەشىمى اكىمشىلىك قۇزىرىنا تيەسىلى ەمەستىگىن العا تارتتى.
كۇن تارتىبىندە قويىلعان ماڭىزدى ساۋالدىڭ ءبىرى مەملەكەت قاجەتىنە بايلانىستى قايتارىلعان جەر تەلىمدەرى تۋرالى بولدى. بۇگىنگى كۇننىڭ كەزەك كۇتتىرمەس وقيعاسى رەتىندە زاڭدىلىق, قۇقىق ءتارتىبى جانە كوپشىلىكپەن جۇمىس جاساۋ ماسەلەلەرى جونىندەگى تۇراقتى كوميسسيانىڭ توراعاسى نيكولاي مەششەرياكوۆ وسى تاقىرىپتى كوتەردى. بۇل سالا بويىنشا ىرگەلى جۇمىستار جاسالىپ جاتقاندىعىن, جۇزەگە اسقان جوبالار از ەمەستىگى ايتىلىپ, ميرزويان كوشەسى بويىنداعى 10 جەر تەلىمىنىڭ قوجايىنى جانە قالا اكىمدىگىنىڭ ەكەۋارا كەلىسىمىمەن مەملەكەت مۇقتاجدىعى ءۇشىن ساتىپ الىنعانى تۋرالى اقپار بەردى. كەلىسىمگە كونبەگەن تۇرعىندار سوتقا شاعىمدانۋ ارقىلى ورتاق مامىلەگە كەلەتىنى باياندالدى.
استانا قالاسى اكىمى اپپاراتى باسشىسىنىڭ ورىنباسارى ەرلان كاناليموۆ قالا باسقارۋ ءتاسىلىن وزگەرتۋ تۋرالى ۇسىنىس-ساۋالىن جولدادى.
جۇمىسپەن قامتۋ جانە الەۋمەتتىك باعدارلامالار باسقارماسىنىڭ باستىعى جەڭىلدىكپەن ءدارى-دارمەكتى تەگىن تاراتۋ تىزىمدەرى تۋرالى ايتا وتىرىپ, وسى ءدارى ۇلەستىرۋ ماسەلەسىن اتالمىش باسقارماعا قايتا قايتارۋ جونىندەگى ۇسىنىسىن ماقۇلداتتى.
ىشكى ساياسات باسقارماسى باستىعى بولات تىلەپوۆتىڭ ۇسىنۋىمەن استانا اكىمدىگى جانىنداعى جاستار ىستەرى جونىندەگى كەڭەستىڭ قۇرامى وزگەردى. قالا اكىمى كەڭەس توراعاسى بولىپ بەكىتىلدى. كەڭەس مۇشەلىگىنە قالا باسشىسىنىڭ ورىنباسارلارى, دەپۋتاتتار مەن جاستار بىرلەستىكتەرىنىڭ وكىلدەرى سايلاندى. توتەنشە جاعدايلار دەپارتامەنتى باستىعىنىڭ ورىنباسارى بەيبىت سادىقوۆ جاڭا ەۆاكۋاتسيالىق كوميسسيانىڭ قۇرامىن جاريالادى. كاسىپكەرلىك جانە ونەركاسىپ باسقارماسى باستىعىنىڭ ورىنباسارى رىسگۇل قاۋعاباەۆا كاسىپكەرلىك ماسەلەلەرى جونىندەگى ساراپتاۋ كەڭەسىنىڭ جاڭا قۇرامىن ۇسىندى.
سەسسياعا توراعالىق ەتكەن باۋىرجان يساباەۆ بارلىق ماسەلە ءجىتى قارالىپ, ءبىراۋىزدان قابىلدانعانىن مالىمدەدى. دەپۋتاتتار تاراپىنان ەش قارسىلىق بولمادى.
شىنار ءابىلدا
