بۇگىن ساعات 20.00-دە «استانا-ارەنا» ستاديونىندا جەرگىلىكتى «استانا» فۋتبول كلۋبى مەن بەلورۋسسيالىق «باتە» كومانداسى اراسىندا ۋەفا ەۋروپا ليگاسىنىڭ پلەي-وفف ماتچى وتەدى.
وسىعان بايلانىستى قالا كوشەلەرىندە قوزعالىس شەكتەلەدى. اتاپ ايتساق, كەزدەسۋ سوڭىنا دەيىن قابانباي باتىر جانە تۇران داڭعىلدارى كەرەي مەن جانىبەك حاندار كوشەسىنەن حۋسەين بەن تالال كوشەسىنە دەيىنگى ارالىق جابىلادى. كولىك يەلەرى ورىنبور كوشەسى ارقىلى دىتتەگەن جەرىنە جەتە الادى.
جانكۇيەرلەرگە ىڭعايلى بولۋى ءۇشىن ساعات 18.00-دە بەس جەردەن قوزعالاتىن ارنايى رەيستەر (شاتتلدار) ۇيىمداستىرىلادى. ستاديونعا بارۋ ءۇشىن «قازاقستان» سپورت كەشەنى, «ازىرەت سۇلتان» مەن «نۇر استانا» مەشىتتەرى, استانالىق تسيرك جانە قاجىمۇقان مۇڭايتپاسوۆ اتىنداعى ستاديون جانىنداعى تۇراقتاردان ارنايى اۆتوبۋستارعا ءمىنىپ كەتۋگە بولادى.
ماتچ اياقتالعان سوڭ جانكۇيەرلەر شاتتلدارعا قابانباي باتىر داڭعىلىنىڭ بويىنداعى «استانا-ارەنا» ستاديونىنىڭ تۇراعىنان جانە ايالدامادان وتىرىپ, قايتا الادى.
