قالا قۋاتىنىڭ قاۋقارى قانداي؟

استانا قارقىنمەن دامىپ كەلە جاتقانى سونشالىق, كەيدە جىلۋ, ەلەكتر جەلىلەرىنە سالماق ءتۇسىپ كەتىپ جاتادى. ەلوردانى قاجەتتى تىرشىلىك نارىمەن قامتاماسىز ەتىپ وتىرعان ءبىرىنشى جانە ەكىنشى جىلۋ ورتالىقتارى كەشەگى شاعىن شا­ھارعا شاقتالعان بولاتىن. كەيىن قارىشتاپ وركەندەگەن باس قالادا جىلۋ مەن جارىق جەتىسپەۋشىلىگى بايقالماس ءۇشىن وسى جىلۋ-ەلەكتر ورتالىقتارى كەڭەيتىلىپ, قايتادان جاڭعىرتىلا باستادى. مىسالى, استاناعا تاراتىلاتىن ەلەكتر ەنەر­گياسىنىڭ 60 پايىزعا جۋىعىن ءون­دىرىپ وتىرعان «استانا-ەنەرگيا» اق-نىڭ 2-جەو بىلتىر مولشەرى 2 ملرد 405 ملن كۆت/ساع. ەلەكتر­ەنەرگياسىن شىعارعان. ال جىلۋ ەنەرگياسىنىڭ كولەمى – 5 ملن 122 مىڭ گيگاكالوريدى قۇراعان. بۇل 2011 جىلمەن سالىستىرعاندا 30 ملن 600 مىڭ كۆت/ساع-قا ارتىق كورسەتكىش. كاسىپورىن 2009 جىلى باستالعان كۇردەلى جوندەۋ جۇ­مىس­­تارىنىڭ ارقاسىندا وسىنداي ناتيجەگە قول جەتكىزىپ وتىر. ءسويتىپ, وتكەن جىلۋ بەرۋ ماۋسىمى ەشقانداي كەدەرگىسىز وتكەن ەدى. ال قالا تۇرعىندارىنىڭ پاتەر­لەرىندە 40 گرادۋسقا جەتەتىن ايازدى كۇندەردىڭ وزىندە جىلۋ تەمپەراتۋراسى قالىپتى ساقتالعان.
قالا اكىمدىگىنىڭ ءباسپاسوز قىز­مەتىنىڭ مالىمەتىنە قاراعاندا, 2-جەو-داعى جوندەۋ-جاڭعىرتۋ جۇمىستارى ءارى قاراي جالعاسىپ, 2017 جىلعا دەيىن بىرتىندەپ ءتورت بىردەي سۋ جىلىتۋ قازاندىعى مەن ەكى تۋربواگرەگات پايدالانۋعا بە­رىلەدى. بۇل 2016 جىلدىڭ وزىندە-اق 240 مۆت ەلەكتر مەن 560 گكال/ساع قۋاتىن قوسىمشا وندىرۋگە ءمۇم­كىندىك بەرمەك. الداعى ۋاقىتتا وسى جىلۋ-ەلەكتر ورتالىعى ەكسپو
كورمەسى وتكىزىلەتىن اۋماقتى دا جىلۋ قۋاتىمەن قامتاماسىز ەت­پەكشى. ول ءۇشىن ۇزىن-ىرعاسى 26 شاقىرىمدى قۇرايتىن جىلۋ ماگيس­ترالىن سالۋ جوسپارلانىپ وتىر.
ەلوردانىڭ 1-جەو-نىڭ دا ءون­­دىرىستىك قۋاتى ارتىپ كەلەدى. مۇن­داعى 2008 جىلى باستالعان قايتا جاڭعىرتۋ جۇمىستارىنىڭ جوباسى جىلۋ ەنەرگياسىن تاراتۋ ءۇشىن جۇمسالاتىن جانارمايدىڭ شىعىنىن ازايتادى ءارى ستانسا قۋات­تىلىعىن ارتتىراتىن بولادى. اتقارىلعان جۇمىستاردىڭ ناتيجەسىندە بىلتىر №3 قازان­دىق اگرەگاتى ورناتىلىپ, ىسكە قوسىلعان. بۇل جوبا 2016 جىل­دىڭ العاشقى شيرەگىندە تۇبە­گەي­لى جۇزەگە اسىرىلادى دەگەن بولجام بار.
ال بولاشاقتا ەلوردامىزدا ءۇشىنشى جىلۋ ەلەكتر ورتالىعى ىسكە قوسىلاتىنىنان جۇرتشىلىق حابار­دار. 2011 جىلدان بەرى سالىنىپ جاتقان ءوندىرىستىڭ قۇرىلىسى كەستەگە ساي جۇرگىزىلىپ كەلەدى. نى­ساننىڭ العاشقى كەزەڭى 2015 جىلى پايدالانۋعا بەرىلىپ, 2018 جىلى تولىعىمەن تاپسىرىلادى دەپ جوسپارلانعان.