باستى اقپارات

قالا جولدارى قايتا جاڭعىرادى

استانادا جول-قۇرىلىس جۇمىستارى باستالدى. ول بويىنشا ەسكى قالانىڭ ءبىراز بولىگىندە اۆتوكولىك ينفراقۇرىلىمى جەتىلدىرىلىپ, كوممۋنيكاتسيالىق جەلىلەر جاڭعىرتىلماق.

باس شاھاردا بىلتىر اياقتالماي قالعان جوندەلۋگە ءتيىس جولدار دا بار. بيىل اتالمىش ماسەلەنى تۇبەگەيلى شەشۋ قاراستىرىلۋدا. قوسىمشا 37 شاقىرىم جولدى قايتا جاڭارتۋ جانە 5 شاقىرىم جولدى جوندەۋ كوزدەلۋدە.

استانادا جاز ماۋسىمى باستالعان سايىن جول جوندەۋ جۇمىستارىن ۇيىمداستىرۋ – جىلداعى ءداستۇر. سەبەبى, كولىكتەردى شامادان تىس قابىلدايتىن كەيبىر جولداردى قايتا جوندەۋ – كەزەك كۇتتىرمەيتىن شارۋا. اي سايىن اۋماعى ۇلكەيگەن ەلوردامىزدا  جول توسەۋدى قاجەت ەتەتىن كوشەلەر كوپ-اق. ماسەلەن, بارشاعا بەلگىلى, ءوندىرىس تۇرعىن الابىندا, كوكتال ەلدىمەكەنىندە, تىلەنديەۆ داڭعىلىنىڭ سولتۇستىك بولىگىندە اسفالت جوق. بۇل ماسەلەنى قاۋزاعان حالىق قالا اكىمدىگىنە تالاي رەت حات جازىپ, زامانعا ساي جول توسەۋىن سۇراعان. مىنە, بيىلعى جول قۇرىلىسى ماۋسىمدا بىرنەشە شاقىرىم جول پايدالانۋعا بەرىلەدى.

بۇگىن ەلوردانىڭ ەڭ ماڭىزدى ءتورت كولىك ارتەرياسىن قايتا جاڭارتۋعا بايلانىستى كەيبىر جولدار ۋاقىتشا جابىلدى. جول سالاسىنىڭ بىلىكتى ماماندارى بەيبىتشىلىك, ءا.مولداعۇلوۆا, ميرزويان كوشەلەرىن جوندەۋگە كىرىسىپ كەتتى. ەسىلدىڭ سول جاعالاۋىندا بوي كوتەرگەن وپەرا جانە بالەت تەاترى ورنالاسقان قوناەۆ كوشەسىندە كوپىرلى جاياۋ جۇرگىنشىلەر جولى سالىناتىن بولادى. ويتكەنى, كەلەر جىلى پايدالانۋعا بەرىلەتىن نىساننىڭ جولىن بيىل جوندەپ قويۋ – جۇمىسشىلارعا جۇكتەلگەن باستى مىندەت.

ادەتتە, بەلگىلى ءبىر كوشەلەردى جوندەۋ جۇمىستارى باستالعان كەزدە, وعان جاپسارلاس جاتقان جولدار ۋاقىتشا جابىلۋدى قاجەت ەتەدى. بۇگىن كەشكى 23:00-دەن باستاپ بەيبىتشىلىك كوشەسىنىڭ بوگەنباي باتىر داڭعىلىنان باستاپ ەسەنبەرلين كوشەسىنە دەيىنگى بولىگى جابىلادى. جەڭىس داڭعىلىنان باستاپ رەسپۋبليكا داڭعىلىنا دەيىن ءا.مولداعۇلوۆا كوشەسى بويىنشا وتەتىن كولىك قوزعالىسى شەكتەلەدى. 31 تامىزعا دەيىن اتالمىش جولدارمەن جۇرەتىن اۆتوبۋستاردىڭ دا باعىتى وزگەرتىلمەك.

استانا قالاسى جولاۋشىلار كولىگى جانە اۆتوموبيل جولدارى باسقارماسىنىڭ باستىعى راشيد امانجولوۆتىڭ ايتۋىنشا, د.قوناەۆ كوشەسى اعىمداعى جىلدىڭ 1 قازانىنا دەيىن جابىلادى.

جول قوزعالىسىن ءبىر ۋاقىتتا جابۋ قاجەتتىلىگى ينجەنەرلىك جەلىلەردى قايتا جابدىقتاۋعا بايلانىستى تۋىنداپ وتىر. اۋقىمدى جوبا اياسىندا جىلۋ جەلىلەرى مەن سۋمەن قامتاماسىز ەتۋ ماسەلەسى وڭتايلى شەشىمىن تابادى دەپ كۇتىلۋدە. كارىزدەردى اۋىستىرۋدان بولەك, جولدى كەڭەيتۋ, قوسىمشا اۆتوكولىك تۇراعىن سالۋ, اباتتاندىرۋ, جارىقتاندىرۋ, كوگالداندىرۋ, جاياۋ جۇرگىنشىگە ارنالعان جولداردا جول بەلگىلەرىن جانە جول قوزعالىسىن رەتتەيتىن باسقا دا تەحنيكالىق قۇرىلعىلاردى ورناتۋ جوسپارعا ەنگىزىلگەن.

وسىلايشا, ەكى كوشەنى قايتا جاڭارتۋدى جۇزەگە اسىرۋ ەكونوميكالىق جانە الەۋمەتتىك ماسەلەلەردى كەشەندى شەشۋگە, جالپى العاندا, قالا تۇرعىندارىنىڭ ءومىر ءسۇرۋ ساپاسىن جاقسارتۋعا باعىتتالعانى ايقىن.

جول قۇرىلىسى جۇمىستارىنىڭ ءبىرى – ميرزويان كوشەسىن قايتا جاڭارتۋ جوباسى. اتالمىش كوشەنىڭ ينفراقۇرىلىمى جاڭالانسا, ب.مومىشۇلى داڭعىلىنان باستاپ تالعار كوشەسىنە دەيىنگى ۋچاسكەدە كولىك كەپتەلىسى مەن سۋمەن قامتاماسىز ەتۋ ماسەلەسى رەتتەلمەك.

تاعىدا

ۇقساس جاڭالىقتار

پىكىر ۇستەۋ

Back to top button