قالا جىلۋ بەرۋ ماۋسىمىنا دايىن
جادىراعان جاز مەزگىلى دە ارتتا قالدى. استاناعا سارىالا كۇز كەلىپ جەتكەلى بەرى كۇن رايى كۇرت سۋىتتى. بۇل رەتتە قالانىڭ قىسقا دايىندىعى تۋرالى استانا قالاسى تۇرعىن ءۇي ينسپەكتسياسى باسقارماسىنىڭ ءبولىم باسشىسى اماندوس قۇسانوۆ اڭگىمەلەيدى.
– قالامىزدا جىلۋ بەرۋ ماۋسىمىنا دايىندىق قالاي؟
– استانادا الداعى جىلۋ بەرۋ ماۋسىمىنا دايىندىق اياقتالىپ كەلەدى. قازىر قالاداعى تۇرعىن ءۇيلەردىڭ 97 پايىزى, ناقتىراق ايتساق ورتالىقتاندىرىلعان جىلۋ جۇيەسىنە قوسىلعان 2115 تۇرعىن ءۇيدىڭ 2061-ءى قىسقا دايىن. ەسەپ بەرۋ جينالىستارىندا پاتەر يەلەرى ءجوندەۋ جۇمىستارىنىڭ كولەمىن انىقتاپ, ماقساتتى قاراجات جيناۋدى ۇيىمداستىردى. وسىعان وراي, قالانىڭ كوپ قاباتتى ۇيلەرىنىڭ شاتىرلارى جوندەلىپ, جىلۋمەن قامتاماسىز ەتەتىن جەلىلەر اۋىستىرىلدى. جىلۋ الماستىرعىشتار, جالپى تۇرعىن ۇيلىك جىلۋ مەن سۋدى ەسەپتەيتىن قۇرىلعىلار جاڭارتىلدى. سۋمەن جابدىقتاۋ, ەلەكتر جۇيەسى جوندەلدى.
– بۇل ىستە قاندايدا ءبىر قولبايلاۋ بار ما؟
– باستى ماسەلە – كەيبىر تۇرعىنداردىڭ ورتاق مۇلىكتى كۇتىپ ۇستاۋعا نەمقۇرايلى قاراۋى. ولاردىڭ اراسىندا ءالى دە بولسا ۇيىشىلىك ينجەنەرلىك جەلىلەردىڭ تەحنيكالىق جاعدايىنا جاناشىرلىق تانىتپايتىندار كەزدەسىپ قالادى. ورتاق مەنشىككە وزىمىزدىكى دەپ قاراۋىمىز كەرەك قوي.
– قازىرگى تاڭدا بۇل باعىتتا قانداي جۇمىستار اتقارىلىپ جاتىر؟
– بۇگىنگە دەيىن ۇيىشىلىك 308 قوندىرعىنىڭ 263-ءى ورناتىلىپ, سۋ ەسەپتەيتىن 230 قۇرىلعىنىڭ 227 اۋىستىرىلعان. جالپى, استانانىڭ ءۇش اۋدانىندا دا بيىلعى جىلىتۋ ماۋسىمىنا دايىندىق جۇمىستارى اياقتالۋعا جاقىن. قىسقا دايىندىق جۇمىستارى قالانىڭ الەۋمەتتىك نىساندارىندا دا جۇرگىزىلۋدە. اتاپ ايتساق, قازىرگى كەزدە 137 ءبىلىم مەكەمەسىنىڭ 130-ى, ورتالىق جىلۋ بەرۋ جۇيەسىنە قوسىلعان 28 دەنساۋلىق مەكەمەسىنىڭ بارلىعى جانە 92 مادەني نىسان قىسقا دايىن.
گۇلبارشىن وكەشقىزى