قالالىق جاس ينسپەكتورلار سلەتى
ەلوردالىق اكىمشىلىك پوليتسيا باسقارماسىنىڭ قىزمەتكەرلەرى استانا قالاسىنىڭ ءبىلىم باسقارماسىمەن بىرىگىپ جول قوزعالىسىنىڭ قالالىق جاس ينسپەكتورلار سلەتىن وتكىزدى. شارانى وتكىزۋ, نەگىزىنەن, بالالار جول-كولىك جاراقاتىنىڭ الدىن الۋدى, جول قوزعالىسىنىڭ جاس ينسپەكتورلارىن تاربيلەۋ ماقساتىن كوزدەيدى.
ءىس-شارانى اشقان استانا قالاسى ىشكى ىستەر دەپارتامەنتى اكىمشىلىك پوليتسيا باسقارماسى باستىعىنىڭ ورىنباسارى,
پوليتسيا پولكوۆنيگى سابىر ءجۇسىپبەكوۆ م.وتەمىسۇلى اتىنداعى وقۋشىلار سارايىندا جىل سايىن ۇيىمداستىرىلاتىن سلەتتە بيىل التى مەكتەپتىڭ ەڭ مىقتى وتريادى باق سىناساتىنىن جانە قازىلار القاسىنا جول-پاترۋلدىك پوليتسياسىنىڭ ەڭ مىقتى جاس كومەكشىلەرىن انىقتاۋ تالابى قويىلعانىن اتاپ ءوتتى.
قالالىق سلەت باعدارلاماسىنا: «جول ءجۇرۋ ەرەجەلەرىنىڭ بىلگىرلەرى», «ساپپەن ءجۇرۋ جانە ءان ايتۋ», «ۆەلوسيپەدپەن مانەرلەپ ءجۇرۋ», «جاس سانيتار», «ءبىلىمپاز بايقاۋى», «جاس رەتتەۋشى», «ۇگىت بريگاداسى بايقاۋى» جانە «جاس ينسپەكتور تۋرالى ەڭ مىقتى ولەڭ» سياقتى سەگىز بايقاۋ ەنگىزىلدى.
جارىس قورىتىندىسى بويىنشا ءبىرىنشى ورىندى ەڭ كوپ بالل جيناعان №70 مەكتەپتىڭ جاس ينسپەكتورلار كومانداسى يەلەنسە, ەكىنشى ورىن – № 64 مەكتەپ-ليتسەيىنە, ءۇشىنشى ورىن №38 مەكتەپ وقۋشىلارىنا بۇيىردى. بارلىق كوماندالار باعالى سىيلىقتارمەن جانە جۇلدەلەرمەن ماراپاتتالدى.
جەڭىمپاز كوماندا اعىمداعى جىلدىڭ ماۋسىم-شىلدە ايلارىندا قوستاناي قالاسىندا قازاقستاننىڭ وڭىرلىك جارىستارى جەڭىمپازدارىنىڭ قاتىسۋىمەن وتەتىن عازيز بايتاسوۆ اتىنداعى جاس ينسپەكتورلاردىڭ رەسپۋبليكالىق سلەتىندە استانانىڭ نامىسىن قورعالماقشى.