استانا قالاسىنىڭ ءماسليحاتى الماتى جانە سارىارقا اۋداندارى قۇرىلۋىنىڭ 15 جىلدىعىمەن اۋدان اكىمدىكتەرى مەن اتقارۋشى ورگاندارىن, كاسىپورىندارى مەن ۇيىمدارىن جانە تۇرعىندارىن شىن جۇرەكتەن قۇتتىقتاي وتىرىپ, قالامىزدىڭ الەۋمەتتىك-ەكونوميكالىق دامۋىنا قوسقان ۇلەستەرى ءۇشىن شەكسىز العىس بىلدىرەدى.
قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ استانانى دامىتۋ ماقساتىنداعى تاپسىرمالارى نەگىزىندە ارنايى شارالار جۇزەگە اسىرىلۋدا, قالا تۇرعىندارىنىڭ الەۋمەتتىك ماسەلەلەرىنىڭ شەشىلۋىنە, ەكونوميكالىق ناتيجەلىلىك پەن قاراجات تۇراقتىلىعىنىڭ قامتاماسىز ەتىلۋىنە, ينفراقۇرىلىمدى دامىتۋىنا جانە ينۆەستيتسيالىق كليماتتى جاقسارتۋىنا اۋدانداردا باسا نازار اۋدارىلادى.
الداعى ۋاقىتتا دا استانامىزدىڭ دامۋىنا جانە كوركەيۋىنە باعىتتالعان باستامالار مەن جاقسى قادامداردىڭ باستاۋشىلارى مەن قولداۋشىلارى بولاتىندىعىڭىزعا سەنىمدىمىز.
سانسىزباي ەسىلوۆ,
استانا قالاسى ءماسليحاتىنىڭ حاتشىسى
قىمباتتى سارىارقالىقتار!
استانا قالاسىنىڭ سارىارقا اۋدانى قازاقستان رەسپۋبليكاسى پرەزيدەنتىنىڭ جارلىعىنا سايكەس 1998 جىلدىڭ 6 مامىرىندا قۇرىلعان بولاتىن.
سارىارقا اۋدانىنىڭ وسى ءتول مەرەكەسىمەن اۋداننىڭ تۇرعىندارىن جانە اۋداندا ورنالاسقان مەكەمەلەر مەن كاسىپورىنداردىڭ ەڭبەك ۇجىمدارىن شىن جۇرەكتەن قۇتتىقتايمىز!
مەملەكەتىمىزدىڭ ومىرىندە ەرەكشە ورىن الاتىن ءبىزدىڭ شىرايلى ەلوردامىز استانا ەكەندىگى بارىمىزگە ءمالىم.
استانا كۇن سايىن ءوسىپ جانە كوركەيىپ كەلەدى. ەلوردا كوشەلەرىن ارالاي وتىرىپ, ونىڭ بەينەسىنىڭ وزگەرگەنى, ونىڭ رەسپۋبليكانىڭ ەكونوميكالىق, ساياسي جانە الەۋمەتتىك ءومىرىنىڭ شىنايى ورتالىعىنا قالاي اينالعانىن كورە وتىرىپ, بۇعان سارىارقا اۋدانى تۇرعىندارى مەن ەڭبەككەرلەرىنىڭ دە ماڭىزدى ۇلەسى بار ەكەنىن سەنىمدىلىكپەن ايتا الامىز.
وسى كۇنى بارلىق سارىارقالىقتارعا زور دەنساۋلىق, اشىق اسپان, وتباسىلارىڭىزعا قۇت-بەرەكە, العا قويعان باستامالارىڭىزعا تولاعاي تابىستار, مەملەكەتىمىزدىڭ كوركەيۋى جولىنداعى ەڭبەكتەرىڭىزدىڭ جەمىستى بولۋىنا تىلەكتەسپىز.
قۇرمەتپەن,
استانا قالاسى سارىارقا اۋدانىنىڭ
ارداگەرلەر كەڭەسى
قۇرمەتتى سارىارقا اۋدانىنىڭ تۇرعىندارى!
سىزدەردى ءتول مەرەكەلەرىڭىز – سارىارقا اۋدانىنىڭ 15 جىلدىعىمەن شىن جۇرەكتەن قۇتتىقتايمىز!
استانا – ەل ماقتانىشى. ءبىز استانانىڭ قالىپتاسۋىنىڭ كۋاگەرلەرى جانە وسى اۋقىمدى زور جوبانى جۇزەگە اسىرۋ مۇمكىندىگىن كوزبەن كورۋ باقىتىنا يە بولىپ كەلەمىز. ال, سارىارقا اۋدانى ەلوردانىڭ تاريحي ءبىر اجىراماس بولىگى ەكەندىگى ءمالىم. مۇندا ءوز اۋدانىنا ەرەكشە سۇيىسپەنشىلىكپەن قارايتىن ەلوردانىڭ جانە اۋداننىڭ بايىرعى تۇرعىندارى – باستى بايلىعىمىز, ولار كۇنبە-كۇن ءوز جۇمىستارىن اتقارا وتىرىپ, استانانىڭ قالىپتاسۋىنا وراسان زور ۇلەس قوسۋدا.
مەرەيلى مەرەكەدە سىزدەرگە قۋانىش پەن شاتتىق, دەندەرىڭىزگە ساۋلىق, وتباسىلارىڭىزعا قۇت-بەرەكە تىلەيمىن! سۇيىكتى قالامىز – ارۋ استانا كوركەيە بەرسىن!
استانا قالاسى سارىارقا اۋدانىنىڭ
«پاراسات» پيك اسسوتسياتسياسى
قۇرمەتتى الماتى اۋدانىنىڭ تۇرعىندارى!
بارشاڭىزدى ەڭسەلى ەلوردامىزدىڭ ەلەۋلى اۋداندارىنىڭ ءبىرى – الماتى اۋدانىنىڭ قۇرىلعانىنا 15 جىل تولۋىمەن شىن جۇرەكتەن قۇتتىقتايمىن!
بۇگىندە ساۋلەتى مەن داۋلەتى جاراسقان ەلوردامىزدىڭ دامۋىنا وزىندىك ۇلەسىن قوسىپ كەلە جاتقان اۋدانىمىز اۋماعى جاعىنان دا, حالقى جاعىنان دا باس قالامىزدىڭ ۇلكەن بولىگىن الىپ وتىر. استانامىزدا ەكى اۋدان قۇرىلعان 1998 جىلدان باستاپ جۇزدەگەن وزگەرىستەر بولىپ, اۋىسۋلار مەن قارقىندى قۇرىلىس, ەلوردا دامۋىنىڭ بيىك بەلەستەرىن كوزبەن كورىپ, قول جەتكىزگەن جەتىستىكتەرىنە كۋا بولدىق.
الماتى اۋدانىنىڭ ارداگەرلەر كەڭەسىنە مۇشە بولىپ, توراعالىق ەتكەن ۋاقىتتان اۋدانىمىزداعى اقساقالدار مەن اق جاۋلىقتى انالارعا كورسەتىلىپ جاتقان ىزەت پەن ىلتيپاتقا كۇندەلىكتى ريزا بولىپ, ءالى دە ەلىمىز ءۇشىن ايانباي قىزمەت ەتۋگە دايىنبىز دەپ ايتا الامىن. اۋدان تاراپىنان ۇيىمداستىرىلاتىن بارلىق ءىس-شارالار مەن جاستاردى تاربيەلەۋ باعىتىنداعى جۇمىستارعا ءبىزدىڭ ارداگەرلەرىمىز بەن زەينەتكەرلەرىمىز ىنتا سالىپ, بەلسەندىلىك تانىتادى. بەيبىت ومىردە قىزمەت جاساپ جاتقان ەل ازاماتتارىنىڭ قاتارىندا بولىپ, اۋدان ومىرىندەگى ءوزىمىزدىڭ ورنىمىزدىڭ بارىنا, ءبىز ارينە قۋانىشتىمىز.
استانامىز كوركەيىپ, اۋدانىمىز اجارلانا بەرسىن! ەلىمىزدىڭ ەلدىگىن قۇراپ, تاتۋلىعىن ساقتاپ وتىرعان حالقىمىز ارقاشان امان بولسىن, اعايىن!
سايلاۋبەك بايبولوۆ,
الماتى اۋدانى ارداگەرلەر كەڭەسىنىڭ توراعاسى
قۇرمەتتى الماتى اۋدانىنىڭ تۇرعىندارى!
بۇگىن استانا قالاسى الماتى اۋدانىنىڭ تۇرعىنى اتانعانىمىزعا 15 جىل تولىپ وتىر. ارقايسىمىز ءۇشىن ەرەكشە كۇن بولعان مەرەيلى كۇنىمىز قۇتتى بولسىن!
الماتى اۋدانى قۇرىلعان كۇننەن باستاپ ەڭبەگىمىزدى ەل ءۇشىن ايانباي اتقارىپ, بۇگىن دە تۇرعىندار ءۇشىن قىزمەت جاساۋدامىز. اۋدانىمىزدىڭ پيك اسسوتسياتسياسىنىڭ ءتورايىمى رەتىندە اتقارىلىپ جاتقان ەسەلى ەڭبەكتى كورىپ, استانامىزدىڭ وسىنداي دارەجەگە, بيىك مارتەبەگە يە بولىپ وتىرعانىنا شىن جۇرەكتەن قۋانىشتىمىن.
كۇن سايىن بوي كوتەرىپ جاتقان جاڭا نىساندار مەن تۇرعىنداردىڭ جايلىلىعى ءۇشىن اشىلعان ساياباقتار جىل سايىن كوبەيە تۇسۋدە, بارشاڭىزدى اۋدانىمىزدىڭ كوركى مەن تازالىعىن ساقتاۋعا شاقىرامىن.
ەلوردامىزدىڭ مارتەبەسى ارقاشاندا جوعارى بولىپ, ەلىمىزدىڭ تۋى بيىك تۇعىرلاردان كورىنە بەرسىن!
باحرام قۇسايىنوۆا,
الماتى اۋدانى پيك اسسوتسياتسياسىنىڭ ءتورايىمى
