وسى ءبىزدىڭ دەپۋتاتتار دا تىنىش جۇرمەيدى-ەي!.. ىشكەن-جەگەندەرىن تۋرا ورازا كەزىندە جاريالاتىپ… امال جوق, ونى دا قازىر ايتپاساق, 30 كۇننەن كەيىن تىم كەش بولىپ قالادى. ماقالانىڭ ءمانى كەتەدى سوسىن. بار قىزىق بىلاي بولعان…
جاقىندا پارلامەنت ىشىندەگى شارۋاشىلىق باسقارماسىنىڭ اسحاناسى دەپۋتاتتار تاماقتاناتىن جەرگە «كەمىندە 21 جىل ساقتالعان, ارقايسىسى 50 مىڭ تەڭگە تۇراتىن ۆيسكي مەن 550 بوتەلكە قىمبات اراق-شاراپ كەرەك» دەپ تاپسىرىس بەرگەن عوي (باسە, پالاتادا وتىرىپ الىپ, نەگە ءدال كامەرا الدىندا ۇيىقتايدى دەسەم…). ءسويتىپ, ىشىمدىكتىڭ قىمباتىنان عانا قىلقىلداتاتىن قالاۋلىلاردىڭ قالاۋى ءبىر تاپسىرىس بەرگەندە 1 220 000 تەڭگەنى قۇرايتىن بولىپ شىقتى. وتىرىك دەسەڭىز, مەملەكەتتىك ساتىپ الۋ پورتالىنا جاريالانعان تاپسىرىسقا كوز جۇگىرتە سالىڭىز… وندا تاعى دا دەپۋتاتتارعا ساقتالۋ مەرزىمى 3 جىلدان كەم ەمەس جەڭىل-جەلپى شاراپتىڭ كەرەكتىگى كورسەتىلگەن. ەلدەگى ەڭ ارزان سانالىپ كەلگەن پارلامەنتتىك اسحانا 20 بوتەلكەنىڭ ارقايسىسىن 40 مىڭ تەڭگەدەن ساتىپ الماقشى. تىسكە باسار شوكولودتاردىڭ دا ەڭ قىمباتىن, كەڭسەدە ءيىس شىعارماي ءجۇرۋ ءۇشىن ساعىزدىڭ 3 مىڭ قورابىن, «ىشكەن كەزدە كەتە بەرەدى, كەتە بەرەدى» دەلىنەتىن 14 مىڭ قوراپ تەمەكىنى ساتىپ الىپ جاتىر قازىر. بۇلاردىڭ وزىنە 7 ميلليون تەڭگە جۇمسالادى. قويشى ايتەۋىر, «بايدىڭ اسىن بايعۇس قىزعانادى» دەگەندەي بولىپ قالمايىق!.. ءىشسىن, شەكسىن! ولار دا ادام عوي. تەك جۇرت اۋىز بەكىتىپ جۇرگەندە نەعىلعاندارى ىڭعايسىزداۋ… رامازان ايىنىڭ 30 كۇنىنە 30 تىلەك ايتقان رامازاننان (ستامعازيەۆ قوي) ۇلگى الۋ كەرەك سياقتى. سەنساتسيانىڭ وسىنداي دا ءتۇرى بولادى نەگىزى.
ەركەعالي بەيسەنوۆ
