بىلتىردان بەرى قۇلاعالى تۇرعان ۇيلەردىڭ تۇرعىندارى جاڭا قونىسقا كوشىپ, كوڭىلدەرى ءبىر مارقايىپ قالعان ەدى. بيىل دا «قولجەتىمدى باسپانا – 2020» باعدارلاماسىنا ەنگىزىلگەن اپاتتى ۇيلەردى بۇزۋ جونىندەگى قاناتقاقتى جوبا جالعاسىن تاباتىن بولادى.
جالپى استانانىڭ قالىپتاسۋ جىلدارىندا بارلىعى 12 ملن شارشى مەتر تۇرعىن ءۇي سالىنىپ, پايدالانۋعا بەرىلگەن ەكەن. ءۇيدى جەكە قارجىسىنا ساتىپ العانداردى ەسەپتەمەگەندە, مەملەكەتتىك قولداۋمەن جۇزەگە اسىرىلعان باعدارلامالار شەڭبەرىندە 110 مىڭ وتباسى مەنشىكتى باسپانالى بولعان. جىل سايىن قالادا ءبىر ميلليون شارشى مەتردەن استام تۇرعىن ءۇي قۇرىلىسى پايدالانۋعا بەرىلسە, بىلتىر بۇل كورسەتكىش 1 ملن 100 مىڭ شارشى مەترگە جەتكەن.
«قولجەتىمدى تۇرعىن ءۇي – 2020» باعدارلاماسىنىڭ باسىم باعىتى بولىپ تابىلاتىن اپاتتى جاعدايداعى ۇيلەردى ءسۇرىپ تاستاۋ جوباسىنىڭ قالا ءۇشىن كوپتەگەن پايداسى بار. ەڭ الدىمەن, بۇل – تۇرعىندارعا ءتيىمدى. بۇگىنگە دەيىن ەل اۋزىندا «جۋكوۆكا» دەپ اتالىپ كەتكەن اۋماقتىڭ تۇرعىندارى سالىنعانىنا جارتى عاسىردان اسقان ەسكى ۇيلەردە «قاشان قۇلايدى ەكەن» دەگەن ۇرەيمەن تىرشىلىك ەتىپ جاتقان-دى. باعدارلاما قابىلداعالى وسى مەكەننىڭ تۇرعىندارى سۋ جاڭا ۇيلەرگە يە بولدى.
ەكىنشى, پيلوتتىق جوباعا بولىنگەن مەملەكەتتىڭ اقشاسى قايتارىمدى. باعدارلاما بويىنشا قۇرىلىستاردى تۇرعىزاتىن «ەلوردا دامۋ» جشس تۇرعىنداردى قامتىعاننان قالعان ۇيلەردى ساتىپ, مەملەكەتتەن العان قارىزىن قايتارادى. ءارى كوممەرتسيالىق تۇرعىن ءۇيدى ساتۋدان تۇسكەن قاراجات قايتا ينۆەستيتسيالانىپ, قۇرىلىس يندۋسترياسىن دامىتۋعا ىقپال ەتەدى. مۇنداي ءوزىن-ءوزى اقتايتىن قاراجاتقا بولا جەرگىلىكتى بيۋدجەت تە شىعىندالىپ اۋرە بولمايدى.
سونداي-اق, پيلوتتىق جوبانى ىسكە اسىرۋ اياسىندا قالانىڭ ساۋلەتتىك كورىنىسى دە ايشىقتالا تۇسەتىنى ايتپاساق تا بەلگىلى.
سونىمەن, پيلوتتىق جوبا اياسىندا بىلتىر قۇلاعالى تۇرعان 11 ءۇيدىڭ 139 وتباسى قونىس تويىن تويلاسا, بيىل باسپانا الۋ باقىتىنا اپاتتى جاعدايداعى 31 ءۇيدىڭ تۇرعىندارى قول جەتكىزەدى. ال 2016 جىلعا دەيىن 3 مىڭ وتباسى جاڭا قونىسقا كوشەدى دەگەن جوسپار بار. اتالعان باعدارلاما اياسىندا 2017 جىلعا دەيىن 228 اپاتتى جاعدايداعى ءۇي ءسۇرىلىپ, تۇرعىندارى جاڭا ۇيلەرگە جايعاستىرىلاتىن بولادى.
ەلىمىزدە تۇڭعىش رەت جۇزەگە اسىرىلىپ وتىرعان جوبا بىزگە انكارادان كەلگەن. انادولى ەلىندە ساتىمەن جۇزەگە اسىرىلىپ, تالاي ادامدى باسپانامەن قامتاماسىز ەتكەن جوبانىڭ پايداسىن ەندى استانالىقتار دا كورىپ جاتىر. الداعى ۋاقىتتا پيلوتتىق جوبا كۇللى قازاقستان اۋماعىن قامتىماق.
