2008 جىلى استانا قالاسى اكىمدىگىنىڭ باستاماسىمەن «بايتەرەك» قايىرىمدىلىق قورى قۇرىلعان بولاتىن. شوتقا قارجى قالا اكىمدىگىنىڭ مۇرىندىق بولۋىمەن ۇيىمداستىرعان قايىرىمدىلىق اكتسيالارىنان تۇسەدى. قازىر وسى قاراجات مۇمكىندىگى شەكتەۋلى مۇقتاج بالالاردىڭ ەمدەلۋىنە جۇمسالۋدا.
اكتسيا وتكىزىلگەن جىلدارى (2009-2013 جىلداردى قوسا ەسەپتەگەندە) 96 بالا جالپى مولشەرى 103 500 000 تەڭگەنىڭ اقشالاي سەرتيفيكاتىن الىپ, بارلىق بالالارعا ەل ىشىندە دە, ودان تىسقارى (قىتاي, رەسەي, يزرايل, گەرمانيا, تاعى باسقا مەملەكەتتەردە) جەرلەردە جوعارى بىلىكتى مەديتسينالىق كومەك كورسەتىلدى.
ودان ءارى بالالاردىڭ دەنساۋلىق جاعدايلارى جاقسارىپ, ەم-دوم اسەر ەتكەنى بايقالادى. ماسەلەن, كسەنيا كاپينوستىڭ كوزى ناشار كورەتىن ەدى, ءنوۆوسىبىر قالاسىندا وتا جاسالعاننان كەيىن كورۋ قابىلەتى ەداۋىر جاقسارعان. ال, ايگۇل اتاباەۆا وزدىگىنەن تاماق ىشە المايتىن ەدى. جاق سۇيەگىنە پلاستينا ورناتقاننان كەيىن جاعدايى ءبىرشاما تۇزەلدى.
دانيال قاسىموۆتىڭ جاعدايى تىپتەن اۋىر بولدى. وزدىگىنەن قوزعالا المايتىن. كورۋ جۇيكەسى دە اۋىر دەرتكە ۇشىراعان بولاتىن. قىتايعا بارىپ وتا جاسالىپ, اياعىنان تىك تۇردى. قازىر دانيال وزدىگىنەن قادام جاساي الاتىن دارەجەگە جەتتى. وسىعان ۇقساس وتا گەرمانيادا ماليكا دۇيسەبەكوۆاعا دا جاسالدى. اكتسيانىڭ ارقاسىندا ومىرگە دەگەن قۇشتارلىقتارى ويانعان مۇنداي مىسالداردى كوپتەپ كەلتىرۋگە بولادى.
ءاربىر اكتسيا سايىن ەمدەلگىسى كەلەتىن نەمەسە وڭالتۋ كەزەڭىنەن وتۋگە تىلەك بىلدىرۋشىلەر سانى ارتىپ كەلەدى.
بۇگىنگى كۇنى كەزەكتى اكتسيادا قاراۋ ءۇشىن جالپى مولشەرى 41 935 000 تەڭگەگە وتىز ءتورت ءوتىنىش ءتۇستى.
اكتسيانىڭ قورىتىندىسى استانا كۇنىنەن كەيىن شىعارىلادى. سوندىقتان, ءاربىر قالا تۇرعىنى مەن ەلوردا قوناعى مەرەكەلىك ءىس-شاراعا بيلەت ساتىپ الىپ, قاناتىمەن سۋ سەپكەن قارلىعاشتاي قايىرىمدىلىق شاراسىنا ءوز ۇلەسىن قوسىپ, ناۋقاس بالالاردىڭ ساۋىعىپ كەتۋىنە سەپتەسە الادى.
ساعي ورال
