قاريالار كەمەمەن قىدىردى
استانالىق ءبىر توپ زەينەتكەر كەمەگە ءمىنىپ, ەسىل وزەنى بويىمەن سەرۋەندەدى. «نۇر وتان» پارتياسى جانىنداعى «جاس وتان» جاستار قاناتى ەل تاۋەلسىزدىگىنىڭ 25 جىلدىعى قارساڭىندا ەڭبەك ارداگەرلەرىنە وسىنداي كەرەمەت كوڭىل-كۇي سىيلادى.
كەنەسارى ەسكەرتكىشىنىڭ تۇسىنان اتتانعان «ەسىل» كەمەسىنە ەلۋگە جۋىق زەينەتكەر ءمىندى. ءبارى بالاشا ءماز. كەيبىرى نەمەرەلەرىن ەرتىپ العان. ءبىر قۋانتارلىعى, «ارداگەرلەردى ارداقتايىق!» جوباسى اياسىندا مۇنداي شارانى وتكىزۋ جىلداعى داستۇرگە اينالىپ كەلەدى.
قوعامدا قارت ادامدارعا قامقورلىق تانىتا ءبىلۋ – يگى ءىستىڭ ءبىرى. بۇل رەتتە «جاس وتان» جاستار قاناتى ەلوردالىق قارتتارعا كومەك قولىن سوزىپ كەلەدى. مەرەكە سايىن ۇيلەرىنە بارىپ قۇتتىقتاپ, كومەكتەسەدى. تەگىن كونتسەرتتەر ۇيىمداستىرادى. مىنە, بۇگىن سەرۋەنگە الىپ شىقتىق. قازىنالى قارتتارىمىز ەسىل وزەنى ۇستىندە 40 مينۋت بويى قالانىڭ سۇلۋلىعىن تاماشالاۋمەن بولدى. الداعى ۋاقىتتا قارتتار ءۇيىنىڭ ارداگەرلەرىن دە قىدىرتۋ ويىمىزدا بار, – دەيدى ءىس-شارانى ۇيىمداستىرۋشى باقداۋلەت جاندىلداەۆ.
اقوردا عيماراتىنا دەيىن بارىپ, كەرى قايتقان قاريالار قالانىڭ سۇلۋلىعىنا تامسانۋمەن بولدى. ءوزىن ءجاميلا بەكباەۆا دەپ تانىستىرعان اجەي مۇنداي شارا جاستاردى ادامگەرشىلىككە باۋلىپ قانا قويماي, اعا ۇرپاققا قۇرمەتپەن قاراۋدى ۇيرەتەدى دەيدى.
گۇلميرا شارحانقىزى