قاريالار قۋانىپ قالدى
استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باستاماسىمەن قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەنىڭ ۇجىمى ناۋرىز مەرەكەسىن اتاپ ءوتتى. سالتاناتتى شارادا مەكەمە ديرەكتورى كەنجەبولات باپيشەۆ ءسوز سويلەپ, قاريالار مەن مۇمكىندىگى شەكتەۋلى جانداردى ۇلىستىڭ ۇلى كۇنىمەن قۇتتىقتادى.
«ەلباسى نۇرسۇلتان نازارباەۆ تۋعان حالقىن بۇگىندە ورلەۋ مەن وركەندەۋگە باستادى. ونىڭ سارابدال ساياساتى ءبىزدى الەمگە تانىتىپ, دامىعان مەملەكەتتەرمەن تەرەزەمىزدى تەڭ ەتتى. ال «ماڭگىلىك ەل» يدەياسى ءالى قازاقستاندى الپاۋىت وتىز ەلدىڭ قاتارىنا قوساتىنىنا سەنىمىمىز زور. پرەزيدەنت قاريالاردى دا نازارىنان تىس قالدىرعان ەمەس. ۇنەمى قولداۋ كورسەتىپ, قوشەمەتتەپ جۇرەتىنىنە ءوزىمىز كۋامىز. ءبىزدىڭ ارامىزدا ۇلى وتان سوعىسىنىڭ ارداگەرلەرى مەن تىل ەڭبەككەرلەرى جانە ولارعا تەڭەستىرىلگەن قارتتار دا بارشىلىق. جەڭىستىڭ جەتپىس جىلدىق مەرەيتويىنا وراي تاعى دا مەملەكەت قۇرمەتى جالعاسۋدا», – دەگەن كەنجەبولات باپيشەۆ وتىز شاقتى مەكەمە تۇرعىنىنىڭ كەۋدەسىنە مەرەكەلىك مەدال تاعىپ, گۇل شوقتارىن تابىس ەتتى.
ورتالىقتاعى300-دەن استام قاريا مەن مۇگەدەك جاندارعا 217 ادام قىزمەت كورسەتەدى. تۇرعىنداردىڭ كوپشىلىگى جارىمجان, قارت بولعانىمەن, بارلىعى دا قوعامدىق جۇمىستارعا بەلسەنە ارالاسادى. ءاز-ناۋرىز مەرەكەسىن اتاپ وتۋگە دە اركىم ءوز ۇلەسىن قوسىپ باقتى. تۇرعىنداردىڭ شيراقتىعى, جاعدايلارىنىڭ جاقسى بولعاندىعى شىعار, ۇلىستىڭ ۇلى كۇنىن تويلاۋدى مۇندا داستۇرگە اينالدىرعان.
كەش ونەرلى قارتتار مەن مۇگەدەكتەردىڭ ءان-جىرىمەن جالعاسىن تاپتى. ۇلتتىق كيىمدەر كيىپ, كورىنىس قويعان ولار تاريحقا تەرەڭ بويلادى. ابىلاي حان اۋىلى مەن قاسىم حان اۋىلى بولىپ, سالت-ءداستۇرىمىزدىڭ تاعىلىمدارىن ايشىقتادى. اعاش ەگۋ, بۇلاق كوزىن اشۋ سىندى عيبراتتى ىستەردى ناسيحاتتادى.
اسحات رايقۇل