استانا قالاسىنىڭ بايىرعى بالاباقشاسى «قارلىعاش» وزدەرىنىڭ جارتى عاسىرلىق مەرەيتويىنا قىزۋ دايىندالىپ جاتىر. ەلوردانىڭ العاشقى مەكتەپكە دەيىنگى مەكەمەلەرىنىڭ بىرىنەن سانالاتىن بالاباقشا 1964 جىلدىڭ 18 قىركۇيەگى كۇنى العاشقى تاربيەلەنۋشىلەرىن قابىلداعان بولاتىن.
بۇل بالاباقشانىڭ ۇجىمى – تۇراقتى. وسى مەكەمەنىڭ تابالدىرىعىن جاس پەداگوگ بولىپ اتتاپ, ەشقايدا تاپجىلماستان زەينەتكەرلىككە شىققاندار بارشىلىق ەكەن. اتاپ ايتقاندا, ە.ماشكينا, ن.نوۆيكوۆا, ش.ءشامىشوۆا سىندى ماماندار – بالاباقشانىڭ اقىلشى-ۇستازدارى. ال, قازىرگى ۇجىمدا 30 شاقتى قىزمەتكەر ەڭبەك ەتەدى.
«ءبىزدىڭ بالاباقشا اشىلعالى مەن بەسىنشى مەڭگەرۋشىمىن. العاشقىسى – ەۆگەنيا وپەنكو اتتى پەداگوگ بولدى. عيماراتتىڭ اينالاسىندا جايقالىپ تۇرعان جاسىل جەلەك – سول كىسىنىڭ ەڭبەگى. ال وسىدان ەكى جىل بۇرىن الماتى اۋداندىق اكىمدىگى قارجى ءبولىپ, بالاباقشامىزدىڭ اۋلاسىن اباتتاندىرىپ بەردى. قانشا دەگەنمەن ىرگەسى ەرتە قالانعان بالاباقشا عوي. سوندىقتان كۇردەلى جوندەۋ جۇمىستارىن قاجەت ەتەدى. كەلەسى جىلى سوعان دا ءۇمىتتىمىز» دەيدى بالاباقشا مەڭگەرۋشىسى ليۋدميلا ريابچەنكو.
«قارلىعاش» بالاباقشاسى 140 بالدىرعانعا ارنالعان. مۇنداعى 5 توپتىڭ ەكەۋى قازاق تىلىندە. مەڭگەرۋشىنىڭ ايتۋىنشا, بالاباقشا ءاۋ باستا تەك ورىس تىلىندە تاربيە بەرگەن. سوڭعى بىرنەشە جىلدا قازاق توبىنا بارعىسى كەلەتىن بالالاردىڭ سانى كۇرت ارتۋىنا بايلانىستى قازاق توپتارىن اشۋعا تۋرا كەلگەن ەكەن. قازىرگى ەكى قازاق توبىندا وزگە ۇلت وكىلدەرىنىڭ بالالارى بارشىلىق كورىنەدى. «بالاسىن قازاقشا وقىتقىسى كەلەتىن اتا-انالار جىلدان-جىلعا كوبەيىپ كەلەدى. سەبەبى, ولار قازاقستاننىڭ بولاشاعى – قازاق تىلىندە ەكەنىن ءتۇسىندى» دەيدى ليۋدميلا پەتروۆنا.
وقۋ-تاربيە جۇمىستارى جولعا قويىلعان بالاباقشانىڭ بالدىرعاندارى دا تاقىلداپ تۇر. ولار قالا ومىرىندەگى ءتۇرلى ءىس-شارالارعا جانە مەكتەپكە دەيىنگى مەكەمەلەر اراسىندا ۇيىمداستىرىلاتىن بايقاۋلارعا دا بەلسەندى اتسالىسىپ, جۇلدەلى ورىنداردى يەلەنىپ ءجۇر. بيىلدىڭ وزىندە بالاباقشانىڭ تاربيەلەنۋشىسى انيا ساۋتكينا بالاباقشالار اراسىندا وتكەن وليمپيادادا جۇلدەلى ەكىنشى ورىندى ەنشىلەپتى.
ەندى بالاباقشا ۇجىمىنىڭ جارتى عاسىرلىق ومىرىندەگى جەتىستىكتەرى 50 جىلدىق مەرەيتويلارىندا ءاسپەتتەلمەك. 20 قىركۇيەك كۇنى وتەتىن مەرەكە بارىسىندا كونتسەرتتىك باعدارلاما ۇيىمداستىرىلىپ, اسەرلى كەش وتكىزىلمەك. جان-جاقتان قوناقتار شاقىرىلىپ, بالاباقشا قابىرعاسىنان قۇرمەتتى دەمالىسقا شىققان قادىرلى پەداگوگتارعا قۇرمەت كورسەتىلەتىن بولادى.
قىمبات نۇرعالي
