حالىقارالىق قارتتار كۇنى قاريالاردىڭ كوڭىلىن سەرپىلتكەن شارالار قاتارىنا «جاستار» سارايىندا وتكەن كونتسەرتتى دە قوسۋعا بولادى.
بۇل كۇنى قارتتاردىڭ الدىندا حالىقارالىق جانە رەسپۋبليكالىق بايقاۋلاردىڭ لاۋرەاتتارى, ءىىم ىشكى اسكەرلەرىنىڭ ءان-بي ءانسامبلى, جاڭادان تانىلىپ كەلە جاتقان جاس انشىلەر, «نوماد» توبىنىڭ ءبيشى بالدىرعاندارى ونەر كورسەتتى. كونتسەرتتىك باعدارلاماعا قاريالاردىڭ وزدەرىنىڭ دە مۋزىكالىق نومىرلەرى ەنگىزىلىپ, «شاڭىراق» اق اجەلەر حورى, «ۆەتەران» جانە استانالىق ەڭبەك ارداگەرلەرى حورلارى «بيپىل», «جايدارمان» سەكىلدى قازاق جانە ورىس حالىق اندەرىن دە ايتىپ, ءبىر سەرپىلىپ الدى.
اسىرەسە, جانار ادىلبەكوۆا شىرقاعان «شاشىلايىن شۇعىلاڭ بولىپ, شىرقا كوڭىل بۇگىن ءان بولىپ. امان-ەسەن جۇرسەڭدەر ەكەن, بەت تۇزەيتىن قۇبىلام بولىپ» دەگەن ءان جولدارى تەك اتا-اناعا عانا ەمەس, زالدا وتىرعان بارلىق قاريالارعا ارنالعانداي ەستىلدى.
ساحناعا مۇقاعالي اتتى ءانشى شىعا كەلگەندە الدىمىزعا اقيىق اقىن ءتىرىلىپ كەلگەندەي اسەر ەتتى. اتاقتى اتتاسىندىكىندەي قايراتتى, قالىڭ قارا شاش وسىرگەن بۇل ونەرپاز قارتتارعا جاستىق شاقتارىن ساعىندىرتىپ, قىرعىز كومپوزيتورى تۇگەلباي قازاقوۆتىڭ «جاڭبىر توكتۋ» انىنە سالدى. «كوك تۇرىكتەر» حالىق اسپاپتار ءانسامبلى تۇركىلىك سارىننىڭ قانداي بولاتىنىن كورسەتىپ بەردى.
قارتتاردى مەرەكەمەن قالالىق ارداگەرلەر كەڭەسىنىڭ توراعاسى امانگەلدى سىزدىقوۆ قۇتتىقتاپ: «وتكەن جىلدارداعى ەڭبەكتەرىڭىزدىڭ جەمىسىن كورىپ, نەمەرە-شوبەرەلەرىڭىزدى ءتاربيەلەپ, امان جۇرىڭىزدەر. قايسىلارىڭىزدىڭ بولسىن مەملەكەتىمىزدىڭ كەشەگىسىنە دە, ءبۇگىنگىسىنە دە, بولاشاعىنا دا قوسقان ۇلەستەرىڭىز زور. سوندىقتان, مەملەكەتىمىز سىزدەرگە ريزا شىعار دەپ ويلايمىن. دەندەرىڭىز ساۋ بولسىن, قارتايماڭىزدار, ارامىزدا ءجۇرىپ, ەلىمىزدىڭ كوركەيگەنىن كورە بەرىڭىزدەر!» دەپ ىزگى لەبىزىن ءبىلدىردى.
امانعالي شميتۇلى
