الەۋمەتقالا مەن سالا

قاۋىپسىزدىكتى ساقتاۋ – ورتاق مۇددە

745

استانا قالاسى اكىمىنىڭ ورىنباسارى ايدا بالاەۆانىڭ توراعالىعىمەن الەۋمەتتىك ارىپتەستىك پەن الەۋمەتتىك جانە ەڭبەك قاتىناستارىن رەتتەۋ جونىندەگى قالالىق ۇشجاقتى كوميسسيانىڭ كەزەكتى وتىرىسى ءوتتى. وسى جولى كۇن تارتىبىندە جۇمىسشىلارىنا ۋاقتىلى جالاقى تولەمەيتىن كومپانيالار ماسەلەسى مەن وندىرىستىك جاراقات الۋدىڭ جاي-جاپسارى تالقىلاندى. سونداي-اق, بيزنەستىڭ جاۋاپكەرشىلىگىن ايشىقتايتىن بيىلعى «پارىز» كونكۋرسىن وتكىزۋ تۋرالى ءسوز بولدى.

جيىندى اشقان ايدا عالىمقىزى كۇن تارىتىبىنە قويىلعان ماسەلەلەردىڭ ماڭىزدىلىعىنا توقتالىپ, ەڭبەك زاڭى تالاپتارىن ساقتاۋ, جۇمىسشىلاردىڭ قاۋىپسىزدىگىن قورعاۋ  ورتاق مۇددە ەكەندىگىن اتاپ ءوتتى.

بۇدان كەيىن استانا قالاسىنىڭ ەڭبەك ينسپەكتسياسى بويىنشا باسقارماسى باسشىسىنىڭ ورىنباسارى مىندەتىن اتقارۋشى قايرات ىسقاقوۆ ءسوز الىپ, ەلوردالىق كومپانيالاردىڭ جۇمىسشىلارى الدىنداعى بەرەشەك ماسەلەسى قانشالىقتى شەشىلىپ جاتقانى تۋرالى باياندادى. سونداي-اق, ەڭبەك داۋلارى, وندىرىستىك جاراقاتتىڭ الدىن الۋعا بايلانىستى شارالار اڭگىمە وزەگىنە اينالدى.

قايرات زەينالعابيۇلىنىڭ ايتۋىنشا, وسى مەكەمەنىڭ ينسپەكتورلارى پروكۋراتۋرا وكىلدەرىمەن بىرلەسىپ, كاسىپورىنداردىڭ جۇمىسشىلارى الدىنداعى قارىزى قانشالىقتى ەكەنىنە مونيتورينگ جۇرگىزىپ وتىرادى. 20 قىركۇيەكتەگى جاعداي بويىنشا, اتالعان مامانداردىڭ ارالاسۋىمەن ايلار بويى جالاقىسىن الا الماي جۇرگەن 521 جۇمىسشى كوپتەن كۇتكەن ايلىعىنا قول جەتكىزىپتى. قايتارىلعان قارىزدىڭ جالپى كولەمى 77 ملن تەڭگەنى قۇراعان.

وسى جىلدىڭ تامىز ايىندا ەڭبەك ينسپەكتسياسى بويىنشا باسقارماعا «التان تەت» جشس ۇجىمى ايلىق ەڭبەكاقى بەرىلمەي جاتقانى تۋرالى شاعىم تۇسىرگەن.

–بۇل جەكەمەنشىك سەرىكتەستىك الماتى قالاسىندا تىركەلگەن. ءارى ورتا جانە شاعىن كاسىپكەرلىك سۋبەكتىلەرىن تەكسەرۋگە تىيىم سالىنعانىنا بايلانىستى تەكسەرۋ جۇرگىزىلگەن جوق.  بىراق ەڭبەك داۋ-دامايىنىڭ الدىن الۋ ءۇشىن كاسىپورىن باسشىلىعىمەن اڭگىمە جۇرگىزىلىپ, جالاقىنى كەشىكتىرۋ سەبەبى انىقتالدى. سويتسەك, قوقىس   وڭدەۋمەن اينالىساتىن سەرىكتەستىككە ولارمەن كەلىسىمشارتقا وتىرعان قوقىس شىعارۋشى ۇيىمدار بەرەشەك ەكەن. بۇگىندە جالاقى قارىزى بىرتىندەپ تولەنىپ جاتىر, – دەيدى قايرات ىسقاقوۆ.

قالا اكىمىنىڭ ورىنباسارى ءار جۇمىسكەردىڭ بالا-شاعاسى بار ەكەنىن, جالاقىنى ۋاقتىلى تولەمەۋ ءبىر وتباسىنىڭ الەۋمەتتىك جاعدايىنا كەرى اسەر ەتەتىنىن ايتا كەلىپ, قىزمەتكەرلەرىنە جالاقى تولەمەيتىن كاسىپورىنداردىڭ ماسەلەسى قاتاڭ قارالاتىنىن ەسكەرتتى.

بۇدان كەيىن قايرات زەنەلعابيۇلى ەڭبەك قاۋىپسىزدىگى مەن وندىرىستىك جاراقات جايى تۋرالى باياندادى. ادەتتەگىدەي قۇرىلىس الاڭدارىنداعى جاعداي الاڭداتارلىق ەكەن. 2014 جىلدىڭ باسىنان بەرى وندىرىستە 101 اپاتتى جاعداي بولسا, سونىڭ 32-ءسى ولىممەن اياقتالىپتى.

قازىرگى تاڭدا استانادا 10 406 قۇرىلىس كومپانياسى تىركەلگەن, سونىڭ 1438-ءى ءبىر مەزگىلدە  قىزۋ جۇمىس ىستەپ جاتىر ەكەن.  بىراق بۇلاردىڭ بارىندە ەڭبەك قاۋىپسىزدىگى ساقتالعان دەۋ قيىن. كومپانيالاردىڭ ەشقانداي دا ماماندىعى جوق ازاماتتاردى جۇمىسقا قابىلداۋى دا ماسەلەنى ۋشىقتىرىپ وتىر.

جالپى, وندىرىستە جاراقات الۋ جاعىنان اتى دارداي «BI Group» كومپانياسى الدىڭعى قاتاردا ەكەن. وسى كومپانيانىڭ قۇرىلىس الاڭىندا ءبىر اپتانىڭ ىشىندە ەكى ادام قازا تاپقان. وسىلايشا, «باقىت مەكەنىن» سالۋشىلار باقىتسىزدىق جاعدايىن اۋىزدىقتاي الماي وتىر.  جالپى, وندىرىستىك سالاداعى جازاتايىم وقيعالار سانى جاعىنان قۇرىلىس سالاسى ءبىرىنشى ورىندا ەكەن.

جيىندا ەڭبەك قاۋىپسىزدىگىن ساقتاۋ – ەڭ الدىمەن تۇرعىنداردىڭ دەنساۋلىعى, بولاشاعى ەكەنى ايتىلىپ, ەڭبەك زاڭناماسىنا شەكەسىنەن قاراعان كومپانيالاردى جاۋاپكەرشىلىككە تارتۋ ماسەلەسى قوزعالدى. ايدا عالىمقىزى قۇرىلىس سالاسىنداعى كومپانيالار جارناما جاساپ, ءوز قامدارىن كۇيتتەگەننەن گورى جۇمىسشىلاردىڭ قاۋىپسىزدىگىن ساقتاۋعا كوبىرەك كوڭىل بولۋلەرى قاجەتتىگىن ەسكەرتتى.

 قىمبات توقتامۇرات

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button