قاۋىپتى كىتاپتارعا تىيىم سالىندى
استانا قالاسىندا سوت شەشىمىمەن تاعى بىرنەشە ءدىني كىتاپقا تىيىم سالىندى. استانا قالاسىنىڭ ءدىن ىستەرى باسقارماسى ماماندارىنىڭ ايتۋىنشا, بۇل كىتاپتاردىڭ مازمۇنىنان ازاماتتاردىڭ ءدىني سەنىمىنە قايشى كەلەتىن, ياعني, ءدىني الاۋىزدىققا جەتەلەيتىن تىركەستەر تابىلعان.
– استانا قالاسىنىڭ №2 ەسىل اۋداندىق سوتىنىڭ 2016 جىلدىڭ 15 اقپانىنداعى شەشىمى بويىنشا چارلز مارشتىڭ «دەليس سۆوەي ۆەروي س مۋسۋلمانامي», قانات ورىنتايۇلى دەگەن اۆتوردىڭ «پريزۆاننىە دليا ۆەليكوگو ۋچەنيا», «يستوريا حريستيانستۆا ۆ تسەنترالنوي ازي ي ۆ كازاحستانە», «ورتالىق ازيا مەن قازاقستاننىڭ ماسىحشىلدىك تاريحى» (اۆتورى ماناربەك بايەكە – رەد.) جانە جومارت تەمىر جانە عالىمجان تاڭاتقان اتتى اۆتورلاردىڭ «دوستوينىە وتۆەتى», «لايىقتى جاۋاپتار» دەگەن كىتاپتارىنا تىيىم سالىنىپ وتىر. بۇگىنگى تاڭدا قالامىزداعى بارلىق ءدىني بىرلەستىكتەرگە تۇسىندىرمە جۇمىستارى جۇرگىزىلىپ, ارنايى ەسكەرتۋلەر بەرىلىپ جاتىر, – دەيدى استانا قالاسى ءدىن ىستەرى جونىندەگى باسقارما باسشىسىنىڭ مىندەتىن اتقارۋشى نۇرداۋلەت ءالمۇحانوۆ.
مازمۇنى كۇدىكتى ادەبيەتتەر كوبىنەسە ەل اۋماعىنا پاكىستان, تۇركيا, ساۋد ارابياسى مەن ەگيپەت ەلدەرىنەن كەلەدى ەكەن. «ولار اۋەجايلار مەن پوشتا قىزمەتى ارقىلى قازاقستانعا سالەمدەمە تۇرىندە جىبەرىلەدى. باسىم بولىگى شەتەلدە باسىلىپ شىعادى. اۆتورى مەن باسىپ شىعارعان باسپاحانالار تۋرالى دەرەكتەرى كورسەتىلمەيدى. تيراجى دا بەلگىسىز. وسىنداي سەبەپتەرگە بايلانىستى بۇل كىتاپتاردىڭ ەلىمىزدە قانشا داناسى اينالىمدا جۇرگەنىن تاپ باسىپ ايتۋ قيىن», دەيدى ءدىن ىستەرى كوميتەتىنىڭ عىلىمي-زەرتتەۋ جانە ساراپتاۋ ورتالىعىندا يسلامدى زەرتتەۋ ءبولىمىنىڭ باس مامانى مارلەن ءمۇسلىموۆ.
قازاق جانە ورىس تىلدەرىندە وتە ساۋاتتى جازىلعان بۇل وقۋلىقتار ءبىر قاراعاندا ءدىني كىتاپ بولىپ كورىنگەنىمەن, مازمۇنىندا وتە جىمىسقى ساياسي-يدەولوگيالىق استار جاتادى. ونى ارنايى ماماندار بولماسا, قاراپايىم وقىرماندار اڭعارماي قالۋى مۇمكىن. الايدا كەيبىرەۋلەرىندە ءدىني الاۋىزدىق پەن ادامنىڭ نانىم-سەنىمىنە قايشى كەلەتىن جازبالار اشىقتان-اشىق ۋاعىزدالىپ جاتادى.
بۇركىت نۇراسىل