قازانداعى قار
«كارى قۇداڭ – قىس» بيىل ەلورداعا ەرتە كەلدى. قازان ايىنىڭ ءۇشىنشى ون كۇندىگىندە ارقانىڭ اۋا رايى ءبىراز قۇبىلىپ, ىزعارى مەن اق قارىن دا ءتۇسىرىپ ۇلگەردى. كەشەلى-بۇگىندى ۇيتقي سوققان جاياۋ بوراسىن قالانىڭ كوممۋنالدىق قىزمەتتەرىن ەداۋىر ابىگەرگە سالدى. العاشقى سالقىندىق لەبى سەزىلىپ, قار ۇشقىنداعاندا جاياۋ جۇرگىنشىلەردىڭ قاۋىپسىزدىگى مەن جولداردىڭ تازالىعىن قامتاماسىز ەتۋ – ەڭ ءبىر كەزەك كۇتتىرمەيتىن اسا ماڭىزدى ماسەلە بولىپ تابىلادى.
دەگەنمەن, «استانا-تازالىق» قىسقا ساقاداي ساي دايىن ەكەندىكتەرىن العاشقى ساتتەن-اق دالەلدەي باستادى. جول جيەكتەرى مەن تروتۋارلار قاردان تازالانىپ, بارلىق كوممۋنالدىق قىزمەت ساپقا تۇردى. وسى كۇندەردە جولداردى قاردان تازالاۋعا كۇن سايىن 405 جۇمىسكەر مەن 750 ارنايى تەحنيكا تارتىلدى.
كوكتايعاقپەن كۇرەسۋ ءۇشىن 25 مىڭ تەكشە مەتر قۇم-تۇز قوسپاسى دايىندالدى. «استانا-تازالىق» باسشىلىعى قوسىمشا 40 مىڭ تەكشە مەتر قوسپا ازىرلەدى.
الداعى اپتانىڭ سوڭىنا قاراي كاسىپورىندا ارنايى تەحنيكانى تەكسەرۋ جۇمىستارى اياقتالۋى ءتيىس. سودان سوڭ ءبىر اۋىسىمدا قاردى كۇرەپ, تاسىپ شىعارۋعا 150-200-گە جۋىق «كاماز» شىعادى. بۇگىندە 265 تەحنيكا قار تازالاۋعا دايىن تۇر.
تاڭاتار تولەۋعاليەۆ