«جان بار جەردە قازا بار» ەكەنى راس. پەندە بالاسىنىڭ ەرتە مە, كەش پە, اجالدىڭ القىمىندا كەتەتىنى – اينىمايتىن اقيقات. اتامىز قازاق بۇعان «تۋماق سۇننەت, ولمەك پارىز» دەپ ۇلكەن سابىرمەن قاراپ, قازا بولعان ادامنىڭ جاقىندارىمەن قايعىسىنا ورتاقتاسىپ جاتادى.
ۇلتىمىزدا ءولىم جونەلتۋدىڭ دە قالىپتاسقان قاعيداسى بار. سونىڭ ءبىرى – ەستىرتۋ. ەستىرتۋ – قازا بولعان ادامنىڭ قايعىلى حابارىن ونىڭ جاقىن تۋىستارىنا حابارلاۋ ءراسىمى. اۋىر قازا, قايعىلى وقيعانى جاناشىرلارىنا, ەل-جۇرتىنا ارناۋلى ەستىرتۋ ءداستۇرى قازاق حالقىندا ەرتەدەن بار. ارداقتى ازاماتى نەمەسە ءۇيدىڭ جانكۇيەر جاقىن, تۋىستارىن ازالى حابارعا دايىنداپ, ازىرلەپ الۋ ءۇشىن حالقىمىز ەستىرتۋ داستۇرىنە اسا ءمان بەرگەن. ونى ەستىرتۋ بارىسىندا دا قالاي بولسا سولاي ايتا سالماي, اۋىلدىڭ اقساقالدارى نەمەسە جاسى ۇلكەن, اۋزى دۋالى ازاماتتارى ارنايى كەلىپ, جايلاپ سابىرعا شاقىرىپ, ەستىرتكەن. مۇنداعى ماقسات – توسىن كەلگەن قازانىڭ سول ادامعا قاتتى سوققى بولۋىنان ساقتانۋ. وكىنىشكە قاراي, قازىر وسى ءداستۇرىمىز دە سۇيىلىپ, بىرەۋ قايتىس بولىپتى دەسە, الدىمەن الەۋمەتتىك جەلىدە شۋلاپ قويا بەرەتىندى شىعاردىق. كەرەك دەسەڭىز, ءمايىتتىڭ دەنەسى سۋىماي جاتىپ, Facebook سياقتى الەۋمەتتىك جەلىدە «اھلەپ, ۇھلەپ» كوڭىل ايتىپ, «جۇباتاتىن» بولدىق. ال سول ادامىنىڭ الىستا جۇرگەن, حابار جەتپەگەن تۋىستارى قايعىلى حاباردى الەۋمەتتىك جەلىدەن كورسە قالاي بولادى؟ وسى ماسەلەنى مۇلدە ەسكەرمەيتىن بولدىق. ونىڭ ۇستىنە, قابىرعاسى سوگىلىپ, قان جىلاپ وتىرعان ادام قالاي الەۋمەتتىك جەلىگە قارايدى؟ ناعىز جاناشىر جاقىنىڭ بولسا, بارىپ جۇباتىپ, توقتاۋ ايتۋ ەڭ نەگىزگى مىندەت ەمەس پە؟ وسىنى بىلە تۇرا الدىمەن «ءسۇيىنشى» سۇراعانداي, الەۋمەتتىك جەلىدە شۋلاپ قويا بەرگەنىمىز داستۇرگە تومپاق, ادامدىق ەتيكاعا دا جات ەكەنىن ەسكەرسەك نەتتى؟! ادەپتى دە ويلايىق, الەۋمەتتىك جەلىنى دە ورنىمەن قولدانا بىلەيىك, اعايىن!..
