قازاق كينوسى كورەيادا كورسەتىلەدى
قازاننىڭ 6-سى مەن 15-ءى ارالىعىندا وڭتۇستىك كورەيانىڭ پۋسان قالاسىندا وتەتىن ءححى حالىقارالىق BIFF كينوفەستيۆالىندە وتاندىق «ءولىارا» («Off-season») قىسقامەتراجدى ءفيلمىنىڭ تۇساۋى كەسىلەدى.
Busan International Film Festival (BIFF) – ازيا كينويندۋسترياسىندا عانا ەمەس, بۇكىل الەمدە شوقتىعى بيىك بەدەلدى بايقاۋ. وسى دودادا ءبىزدىڭ فيلم «Wide Angle section: Short Film Competetion» باعدارلاماسىندا جۇلدەگە تالاسادى. وتاندىق «Tanaris Production» كينوكومپانياسىنىڭ ءونىمى – نەگىزگى ۇمىتكەرلەر قاتارىندا.
«ءولىارا» ءفيلمىنىڭ قويۋشى رەجيسسەرى ەلزات ەسكەندىر – ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى, يراكلي كۆيريكادزە شەبەرحاناسىندا ءتالىم العان جاس كينوگەر. فيلمدەگى باستى رولدەردى بەلگىلى اكتەرلەر اسىلبولات سماعۇلوۆ, بايان قاجىنابيەۆا, دۋلىعا اقمولدا جانە ماقسات ءابدىراحمان سومدايدى.
– شىعىس مادەنيەتىن جالپاق جاھانعا ۇلگى ەتۋدى ماقسات تۇتاتىن اتالمىش جارىستىڭ كونكۋرس تىزىمىنە ىلىگۋدىڭ ءوزى – ۇلكەن مارتەبە. بۇيىرسا, تەرەڭ پسيحولوگيالىق دراماعا قۇرىلعان «ءولىارا» تۋىندىسى بۇل فەستيۆالدەن ولجامەن ورالاتىنىنا سەنەمىن, – دەيدى كينوكارتينانىڭ اتقارۋشى پروديۋسەرى داۋرەن داريابەك.
بوتاگوز ماراتقىزى