ەلوردادا دۇرىلدەپ وتەتىن «مۋز-تۆ – 2015. گراۆيتاتسيا» سىيلىعىن تاپسىرۋ راسىمىنە دەيىن ءبىر اپتاداي عانا ۋاقىت قالدى. كەشە «مۋز-تۆ» ارناسىنىڭ باس ديرەكتورى ارمان داۋلەتياروۆ ورتالىق كوممۋنيكاتسيالار قىزمەتىنىڭ بريفينگىنە كەلىپ, ەلوردا تاريحىندا ايشىقتى ءىز قالدىراتىن مۋزىكالىق ۋاقيعاعا ازىرلىك جايىمەن تانىستىردى.
ايتۋلى شارا وتەتىن «استانا – ارەنا» ستاديونىندا بۇل كۇندەرى قىزۋ جۇمىس جۇرگىزىلۋدە. ساحنا مەن كورەرمەندەرگە ارنالعان ورىنداردى قۇرۋ, باسقا دا كەرەك-جاراقتاردى ورناتۋ سياقتى جۇمىستار الداعى بەيسەنبىگە دەيىن اياقتالۋى ءتيىس. ۇشاقتان تۇسە سالىپ, بريفينگكە كەلگەن تەلەارنا باسشىسى جۋرناليستەرمەن كەزدەسۋدەن كەيىن ستاديونعا باراتىنىن ايتتى. «استانا – ارەنا» ستاديونىندا ەندى ءبىر اپتا بويى قونا جاتامىن» دەدى ول سوزىنە ءازىل-قالجىڭدى ارالاستىرىپ.
ارمان داۋلەتياروۆتىڭ ايتۋىنشا, سالتاناتتى راسىمگە بەلگىلى مۋزىكانتتاردى, سپورتشىلاردى, مادەنيەت سالاسىنىڭ مايتالماندارىن, قاراپايىم كورەرمەندەردى قوسقاندا, جيىنى مىڭعا جۋىق قوناق كەلەدى.
– ولاردىڭ ءبارىن ورنالاستىرۋ جاعىن ءجىتى قاداعالاپ وتىرمىز. «جاتىن ورىن تابا الماعان قوناقتاردى قارسى الۋعا, ۇيىمىزگە قوندىرۋعا دايىنبىز» دەگەن ۇسىنىس ايتقان كەيبىر استانالىقتاردىڭ پەيىلى مەن نيەتىنە ريزامىن. ولارعا كوپتەن-كوپ راحمەت ايتقىم كەلەدى, – دەگەن تەلەارنا ديرەكتورى ۇلكەن مۋزىكالىق مەرەكەنى ەلوردادا وتكىزۋگە مۇمكىندىك بەرگەن مەملەكەت پەن قالا باسشىلىعىنا العىسىن جەتكىزە كەتتى.
«مۋز-تۆ – 2015. گراۆيتاتسيا» سىيلىعىنىڭ سەرىكتەستەرىنىڭ قاتارىندا «استانا ەكسپو-2017» ۇلتتىق كومپانياسى, «دارا» مەن «ايالا» قايىرىمدىلىق قورلارى بار. «ءبىزدى قولداپ جاتقان ۇلتتىق كومپانياعا العىسىم شەكسىز. بۇل سەرىكتەستىكتەن ەكى تاراپ تا ۇتادى. ءجۇز مىڭ كورەرمەندى قامتيتىن «مۋز-تۆ» ارناسى ارقىلى قازاقستاندا وتەتىن «ەكسپو» كورمەسى جايىندا كوپ ادام حابار الادى. وسى تۇرعىدان العاندا, «مۋز-تۆ – 2015. گراۆيتاتسيا» سىيلىعى – ۇلكەن جارناما» دەدى ا.داۋلەتياروۆ.
ال, «دارا» مەن «ايالا» قايىرىمدىلىق قورلارىنىڭ اتسالىسۋىمەن يگى ءىس اتقارىلادى. ولاردىڭ ۇيىمداستىرۋىمەن ەلورداعا ەلىمىزدىڭ تۇكپىر-تۇكپىرىنەن بالالار ءۇيىنىڭ تاربيەلەنۋشىلەرى مەن مۇمكىندىگى شەكتەۋلى جەتكىنشەكتەر, از قامتىلعان وتباسىلاردان شىققان بالالار جەتكىزىلىپ, رەسەيلىك جانە قازاقستاندىق انشىلەرمەن كەزدەسەدى. ونەر يەلەرىمەن ءتۇرلى ويىندار ويناپ, 4 ماۋسىم كۇنى «استانا – ارەنا» ستاديونىنىڭ الدىندا وتەتىن تەگىن كونتسەرتتى تاماشالايدى.
ارمان داۋلەتياروۆتىڭ ايتۋىنشا, بۇل كونتسەرتتە جالپى العاندا 60 ءانشى ونەر كورسەتەدى. ولاردىڭ جارتىسى – رەسەيدەن, جارتىسى قازاقستاننان بولادى. وسى كونتسەرتتى «قازاقستان» ۇلتتىق ارناسى تىكەلەي ەفيردە تاراتادى. ال, «مۋز-تۆ» تەلەارناسى جىل ىشىندە بەس رەت كورسەتەدى. «وسى كونتسەرت ارقىلى رەسەيدەگى جۇرت قازاقستاندىق انشىلەردىڭ شىعارماشىلىعىنان حابار الادى. بۇل جايت وسىنداعى ەسترادا جۇلدىزدارىنىڭ كورشى ەل حالقىنا تانىلا تۇسۋىنە سەپتىگىن تيگىزەدى» دەيدى تەلەارنا باسشىسى.
4 ماۋسىم كۇنى وتەتىن كونتسەرتتى قازاقستان تاراپىنان بەلگىلى شوۋمەن نۇرلان قويانباەۆ جۇرگىزەدى. ونىڭ قاسىندا باسقا دا قازاقستاندىق جۇرگىزۋشىلەر بولادى. الايدا, ولاردىڭ ەسىمدەرىن ا.داۋلەتياروۆ جاريا ەتە قويمادى. «ونى كونتسەرت وتەتىن كۇنى وزدەرىڭىز كورەسىزدەر» دەدى. ال, 5 ماۋسىمداعى «مۋز-تۆ – 2015. گراۆيتاتسيا» سىيلىعىن تاپسىرۋ ءراسىمىنىڭ تىزگىنىن بۇعان دەيىن بەلگىلى بولعانداي كسەنيا سوبچاك, ماكسيم گالكين, لەرا كۋدرياۆتسەۆا, اندرەي مالاحوۆ ۇستايدى. نۇرلان قويانباەۆ بۇلاردىڭ قاتارىنا دا قوسىلىپ وتىر. ەكىنشى قازاقستاندىق جۇرگىزۋشىنى دە «مۋز-تۆ» تەلەارناسىنىڭ باس ديرەكتورى قۇپيا قالدىردى.
جالپى, «مۋز-تۆ – 2015. گراۆيتاتسيا» سىيلىعىن يەلەنۋ ءۇشىن انشىلەر بىرنەشە اتالىمدا ونەر جارىستىرادى. بيىل جاڭادان قوسىلعان «ۇزدىك قازاقستاندىق جىل ءارتىسى» اتالىمىندا جانار دۇعالوۆا, قايرات نۇرتاس, نۇرلان ابدۋللين, «مۋزارت» توبى جانە ءالي وقاپوۆ قارسىلاس اتاندى. قاي انشىلەر قارا ۇزەتىنى 5 ماۋسىم كۇنى انىقتالادى. ءراسىم قازاق جانە ورىس تىلىندەگى انمەن جابىلادى. ارمان داۋلەتياروۆتىڭ ايتۋىنشا, بيلەتتەر باعاسى قىمبات ەمەس. از قالسا دا, ايتۋلى مۋزىكالىق شارانى ستاديونعا كەلىپ, تاماشالايمىن دەيتىن ادامدار ونى الۋعا ءالى ۇلگەرەدى.
امانعالي
قالجانوۆ
