قازاقستان رەسپۋبليكاسى پرەزيدەنتى لاۋازىمىنا قايتا سايلاۋىنا وراي قاسىم-جومارت توقاەۆتىڭ اتىنا قۇتتىقتاۋ جەدەلحاتتارى كەلىپ ءتۇسىپ جاتىر.
بۇۇ باس حاتشىسى انتونيۋ گۋتەرريش ءوز قۇتتىقتاۋىندا مەملەكەت باسشىسىنا ساتتىلىك تىلەپ, قازاقستان بىرىككەن ۇلتتار ۇيىمى مەن مۋلتيلاتەراليزمنىڭ اينىماس ءارى سەنىمدى جاقتاۋشىسى ەكەنىن اتاپ ءوتتى.
«مەن ورتاق مۇددەگە ساي كەلەتىن ماسەلەلەر جونىندە, سونداي-اق بىرىككەن ۇلتتار ۇيىمىنىڭ ورتالىق ازيا بويىنشا پرەۆەنتيۆتى ديپلوماتيا وڭىرلىك ورتالىعى مەن ۇيىمنىڭ قازاقستانداعى وكىلدىك توپتارى ارقىلى تىعىز قارىم-قاتىناستى جالعاستىرۋدى اسىعا كۇتەمىن. بۇۇ قازاقستاننىڭ قاۋىپسىزدىك, تۇراقتى دامۋ, ادام قۇقىعى مەن گەندەرلىك تەڭدىكتى ىلگەرىلەتۋ سالالارىنداعى جاھاندىق سىن-قاتەرلەرگە قارسى بىرلەسكەن ءىس-قيمىلدارعا قولداۋ ءبىلدىرىپ, مىندەتتەمەلەرىن ورىندايتىنىنا زور سەنىم بىلدىرەدى» دەپ جازىلعان جەدەلحاتتا.
بىرىككەن ۇلتتار ۇيىمىنىڭ سەگىزىنشى باس حاتشىسى, جاھاندىق جاسىل ءوسۋ ينستيتۋتىنىڭ اسسامبلەيا توراعاسى پان گي مۋن دا قاسىم-جومارت توقاەۆقا قازاقستان پرەزيدەنتى بولىپ قايتا سايلانۋىنا وراي جۇرەكجاردى تىلەگىن جولدادى.
«قازاقستاننىڭ وڭىرلىك ماڭىزى مەن ءسىزدىڭ كوشباسشىلىق قاسيەتىڭىز جاھاندىق جاسىل ءوسۋ ينستيتۋتىنىڭ ايماقتىڭ تۇراقتى دامۋىنا ەلەۋلى ۇلەس قوسۋىنا مۇمكىندىك بەرەدى. «جاسىل» ءوسىم پەرسپەكتيۆالارىن ىلگەرىلەتىپ, الەمدىك قوعامداستىققا كليماتتاعى وزگەرىستەر سالاسىندا كوشباسشىلىق ۇلگىسىن كورسەتۋ جانە كەلەشەك ۇرپاققا عالامشارىمىزدى تازا قالپىندا قالدىرۋ ءۇشىن سىزبەن بىرگە جۇمىس ىستەۋگە نيەتتىمىز» دەپ جازعان پان گي مۋن.
سونىمەن قاتار مەملەكەت باسشىسىنا قۇتتىقتاۋ جەدەلحاتتارىن ەۋروپالىق كەڭەس پرەزيدەنتى شارل ميشەل, يران يسلام رەسپۋبليكاسىنىڭ پرەزيدەنتى يبراحيم رايسي, ساۋد ارابياسىنىڭ كورولى – قوس كيەنىڭ ساقشىسى سالمان بەن ابدۋلازيز ءال ساۋد, ساۋد ارابياسى كورولىنىڭ تاق مۇراگەرى – مينيسترلەر كەڭەسىنىڭ توراعاسى مۇحاممەد بەن سالمان بەن ابدۋلازيز ءال ساۋد, يوردانيا كورولى ءىى ابداللا, قاتار ءامىرى ءتاميم بەن حاماد ءال ءتاني, قاتار ءامىرىنىڭ ورىنباسارى ابداللا بەن حاماد ءال ءتاني, قاتار پرەمەر-ءمينيسترى – ىشكى ءمينيسترى حالەد بەن حاليفا بەن ابۋلازيز ءال-ءتاني, كۋۆەيت ءامىرى ناۋاف ءال-احماد ءال-ءدجابير ءال-ساباح, ومان سۇلتانى حايسام بەن تاريق, پالەستينا پرەزيدەنتى ماحمۋد ابباس, مالديۆ پرەزيدەنتى يبراگيم مۇحامەد سوليح, ماجارستان پرەزيدەنتى كاتالين نوۆاك, ماجارستان پرەمەر-ءمينيسترى ۆيكتور وربان, پولشا پرەزيدەنتى اندجەي دۋدا, حورۆاتيا پرەزيدەنتى زوران ميلانوۆيچ, فينليانديا پرەزيدەنتى ساۋلي نينيستيو, نيدەرلاند كورولى ۋيليام-الەكساندر, اۆستريا پرەزيدەنتى الەكساندر ۆان دەر بەللەن, لاتۆيا پرەزيدەنتى ەگيلس لەۆيتس, ليتۆا پرەزيدەنتى گيتاناس ناۋسەدا, ەستونيا پرەزيدەنتى الار كاريس, سلوۆاكيا پرەزيدەنتى زۋزانا چاپۋتوۆا, سلوۆەنيا رەسپۋبليكاسىنىڭ پرەزيدەنتى بورۋت پاحور, بولگاريا پرەزيدەنتى رۋمەن رادەۆ, سولتۇستىك ماكەدونيا پرەزيدەنتى ستەۆو پەنداروۆسكي, كيپر پرەزيدەنتى نيكوس اناستاسياديس, ءۇندىستان پرەمەر-ءمينيسترى نارەندرا مودي, جاپونيا پرەمەر-ءمينيسترى فۋميو كيشيدا, كورەيا پرەزيدەنتى يۋن سوك يول, سينگاپۋر پرەزيدەنتى حاليما ياكوب, رەسەي ۇكىمەتىنىڭ توراعاسى ميحايل ميشۋستين, بۇۇ وركەنيەتتەر اليانسىنىڭ جوعارى وكىلى ميگەل انحەل موراتينوس, رف فەدەرالدىق جينالىسى مەملەكەتتىك دۋماسىنىڭ توراعاسى ۆياچەسلاۆ ۆولودين, ماسكەۋ جانە بۇكىل رەسەي پاتريارحى كيريلل, يەرۋساليم پاتريارحى ءىىى فەوفيل, شانحاي ىنتىماقتاستىق ۇيىمىنىڭ باس حاتشىسى چجان مين, ەقىۇ از ۇلتتار ءىسى جونىندەگى جوعارعى كوميسسارى قايرات ءابدىراحمانوۆ, ازىق-تۇلىك قاۋىپسىزدىگى جونىندەگى يسلام ۇيىمىنىڭ باس ديرەكتورى ەرلان بايداۋلەت, تۇركسوي باس حاتشىسى سۇلتان راەۆ, ورتا ازيا كاتوليكتىك ەپيسكوپتارى كونفەرەنتسياسىنىڭ توراعاسى, ەپيسكوپ حوسە لۋيس مۋمبيەلا-سيەررا, دۇنيەجۇزىلىك ەكونوميكالىق فورۋمنىڭ نەگىزىن قالاۋشى, پروفەسسور كلاۋس شۆاب جانە باسقالار جولدادى.
