قازاقستان قۇراماسىنىڭ قورجىنى 2 التىن, ءبىر كۇمىس جۇلدەمەن تولىقتى
ريو-دە-جانەيرودا ءوتىپ جاتقان وليمپيادا ويىندارىنىڭ 5-ءىنشى كۇنىندە قازاقستان قۇراماسىنىڭ قورجىنى ەكى التىن, ءبىر كۇمىس جۇلدەمەن تولىقتى.
اۋىر اتلەتيكادان 69 كەلىگە دەيىنگى سالماقتا ەل نامىسىن قورعاعان ءجازيرا جاپپارقۇل قوس سايىس قورىتىندىسى بويىنشا 259 كەلى سالماقتى باعىندىرىپ كۇمىس جۇلدە جەڭىپ الدى. قىتايلىق سيان يانمەي التىن السا, قولا جۇلدەنى مىسىرلىق سارا احمەد ولجالادى.
ەرلەر اراسىندا 77 كەلىگە دەيىنگى سالماقتا قازاقستاندىق نيجات راحيموۆ سايىس قورىتىندىسى بويىنشا 379 كەلىمەن الەم رەكوردىن جاڭارتىپ وليمپيادا چەمپيونى اتاندى. قىتايلىق ليۋ سياوتسزيۋن كۇمىس, ال مىسىرلىق موحاممەد ماحمۋد قولا مەدال جەڭىپ الدى.
200 مەترگە براسس ادىسىمەن ءجۇزۋ سايىسىندا قازاقستاندىق دميتري بالاندين ۇزدىك ۋاقىت كورسەتىپ, وليمپيادا چەمپيونى اتاندى. دميتري بالاندين – سۋدا ءجۇزۋ سپورتىنان وليمپيادا چەمپيونى اتانعان تۇڭعىش قازاقستاندىق سپورتشى.
بوكستان 48 كەلىدە ەل نامىسىن قورعاعان ءبىرجان جاقىپوۆ شيرەك فينالدا وزبەكستاندىق بوكسشى حاسونبوي دۋسماتوۆقا ۇتىلىپ, جارىستى اياقتادى.
جالپى ەسەپتە قازاقستان قۇراماسى 2 التىن, 2 كۇمىس, 3 قولا جۇلدەمەن ازىرگە11-ورىندا تۇر.