قوعام

قازاقستاندىقتار زەينەتاقى قورىنىڭ نەگىزگى قىزمەتتەرىن ۇيدەن شىقپاي پايدالانادى

بىرىڭعاي جيناقتاۋشى زەي­نەتاقى قورى سالىمشىلار مەن الۋشىلار ءۇشىن كورسەتەتىن قىز­مەت­تەرىنىڭ جارتىسىنان استامىن ەلەكتروندىق فورماتقا اۋىستىردى. قازىر ەلەكتروندىق قىزمەتتەردىڭ ۇلەس سالماعى قوردىڭ جالپى قىزمەتتەرىنىڭ 52 پايىزىن قۇراپ وتىر. وسىلايشا وتانداس­تارىمىز وزدەرىنە قاجەتتى نەگىزگى قىزمەتتەردى ۇيدەن شىقپاي الۋ مۇمكىندىگىنە يە بولدى. بۇل ولارعا ۋاقىتتى ۇنەمدەۋگە جول اشتى. ال ەلەكتروندىق قىزمەتتەردى پايدالانۋ بار بولعانى بىرەر مينۋتتى عانا الادى.

وسى رەتتە قوردا ەلەكتروندىق قىزمەتتەردىڭ ۇلەس سالماعىن 2021 جىلعا دەيىن 55 پايىزعا جەتكىزۋ جوسپارلانعانىن ايتا كەتكەن ءجون.
ەسكە سالا كەتسەك, زەينەتاقى قورى سالىمشىلار مەن الۋشىلارعا ىڭعايلى دا ساپالى جانە زاماناۋي قىزمەت كورسەتۋ ماقساتىندا 2017 جىلدىڭ ماۋسىم ايىندا قوردىڭ enpf.kz سايتى ارقىلى بىرقاتار ماڭىزدى ەلەكتروندىق قىزمەتتەردى ىسكە قوسقان ەدى. سودان بەرى 2018 جىلدىڭ 1 ساۋىرىنە قاراي بۇل قىزمەتتەردى 20 مىڭعا جۋىق ادام پايدالانىپ ۇلگەردى.
اتاپ ايتقاندا, 2298 سالىمشى قور سايتىنىڭ «جەكە كابينەت» ءبولىمى ارقىلى (لوگين جانە قۇپيا ءسوز (پارول) نەمەسە حالىققا قىزمەت كورسەتۋ ورتالىعى بەرەتىن ەلەكتروندىق تسيفرلىق قولتاڭبانىڭ (ەتسق) كومەگىمەن) ونلاين تارتىبىندە جەكە زەينەتاقى شوتىن اشسا, 987 الۋشى (زەينەت جاسىنا تولعان ازاماتتار مەن 1-ءشى جانە 2-ءشى توپ­تارداعى مۇگەدەكتىگى مەرزىمسىز بولىپ بەلگىلەنگەن جاندار) زەينەتاقى تولەمدەرىن تاعايىنداۋ جونىندە ءوتىنىش بەرگەن. ال 11 754 ادام جەكە دەرەكتەمەلەرىنە وزگەرىستەر ەنگىزسە, 4155 سالىمشى زەينەتاقى شوتى بويىنشا اقپارات الۋ ءتاسىلىن ينتەرنەت بايلانىسى ارقىلى الۋعا اۋىستىرعان.
زەينەتاقى شوتىنىڭ جاي-كۇيى تۋرالى اقپاراتتى جىلىنا ءبىر رەت كونۆەرت ارقىلى الاتىندار سانى بىرتىندەپ ازايىپ كەلەدى. ونىڭ ورنىنا ەلەكتروندىق تاسىلمەن الاتىندار سانى ارتۋدا. ويتكەنى وتە ىڭعايلى: شوتقا زەينەتاقى جارنالارى مەن ينۆەستيتسيالىق تابىستىڭ قالاي ءتۇسىپ جاتقاندىعىن قالا­عان ۋاقىتتا, كەز كەلگەن جەردە قادا­عالاپ وتىرۋعا مۇمكىندىك بەرەدى. وسىلايشا 2018 جىلدىڭ 1 قاڭتارىنا قاراي زەينەتاقى شوتىنىڭ جاي-كۇيىن ەلەكتروندىق جولمەن ءبىلىپ وتىراتىندار سانى 4 ميلليون 700 ادامعا جەتتى. ولاردىڭ ىشىندە شامامەن 800 مىڭ ادامعا شوتتان ءۇزىندى-كوشىرمە ەلەكتروندىق پوشتاسىنا كەلسە, 3 ملن 900 مىڭ ادام اقپاراتتى قالتا تەلەفوندارىنا جۇكتەگەن «ENPF» ۇيالى قوسىمشاسى ارقىلى الادى.
لوگين مەن قۇپيا ءسوزدى قولدانار كەزدە لوگيننىڭ ورنىنا جەكە كۋالىكتەگى جەكە سايكەستەندىرۋ ءنومىرى (جسن) ەنگىزىلەدى. ال قۇپيا ءسوزدى ءوزىڭىز ويلاستىراسىز. سونىمەن قاتار, وتانداستارىمىزعا كەز كەلگەن ۋاقىتتا قور سايتىنداعى «جەكە كابينەت» ارقىلى زەينەتاقى شوتىنىڭ جاي-كۇيى تۋرالى ءۇزىندى-كوشىرمە مەن زەينەتاقى شوتىنىڭ بار-جوعى تۋرالى انىقتاما الۋ مۇمكىندىگى بەرىلگەن.
ايتپاقشى, دەرەكتەمەلەرگە جەكە باستى كۋالاندىراتىن قۇجاتتىڭ دەرەكتەرى ء(تۇرى, ءنومىرى, كۇنى مەن وسى قۇجاتتى بەرگەن ورگان), پوشتالىق نەمەسە ەلەكتروندىق مەكەنجاي, تەلەفون نومىرلەرى جاتادى.
قور سايتى ارقىلى ءوتىنىش جولدا­عانداردىڭ قالتا تەلەفوندارىنا سول ءوتىنىشتىڭ ورىندالۋ بارىسى جونىندە سمس حابارلاما جىبەرىلىپ تۇرادى.
2017 جىلدىڭ سوڭىندا قوردىڭ بارلىق 18 فيليالىندا وزىنە-ءوزى قىزمەت كورسەتۋ تەرمينالدارى ورناتىلدى. ەندى سالىمشىلار مەن الۋشىلار وسى زاماناۋي تەحنولوگيا ارقىلى زەينەتاقى شوتىن اشۋدان باستاپ, زەينەتاقى تولەمدەرىن تاعايىنداۋعا دەيىنگى بارلىق دەرلىك ەلەكتروندىق قىزمەتتەردى پايدالانىپ, قور مامانىنا كەزەك كۇتىپ وتىرمايدى.
2018 جىلدىڭ 28 اقپانىنان باس­تاپ, قور سايتىندا كەزەكتى جاڭا ەلەكتروندىق سەرۆيس ىسكە قوسىلدى. ول: «جزش اشۋ جونىندەگى وتىنىشتى/زەينەتاقىمەن قامسىزداندىرۋ تۋرالى شارتتى جاڭا رەداكتسيادا الۋ» (نەمەسە «كوشىرمە نۇسقالار») دەپ اتالادى. بۇل قىزمەت قازىرگى كەزدە قور سالىمشىلارى اراسىندا ەرەكشە تانىمالدىققا يە. مىسالى, 2016 جانە 2017 جىلدارى بجزق بولىمشەلەرىندە كەلۋشىلەردىڭ سۇراۋى بويىنشا ولارعا شارتتاردىڭ 2,9 ميلليوننان استام كوشىرمە نۇسقاسى بەرىلدى.
2018 جىلدىڭ العاشقى جارتىسىندا قور سايتىندا ەتسق ارقىلى ەرىكتى زەينەتاقى جارنالارى ەسەبىنەن زەينەتاقىمەن قامسىزداندىرۋ تۋرالى ء(وز پايداسىنا) شارت جاساسۋ قىزمەتىن ىسكە قوسۋ كوزدەلۋدە.
ارينە, زەينەتاقى قورى سايتتى جاڭارتۋ جانە تسيفرلىق قىزمەتتەردى دامىتۋمەن شەكتەلىپ قالمايدى. بۇگىندە ۇيالى بايلانىس وپەراتورلارىمەن تىعىز بايلانىس ورناتىلىپ جاتىر. ونداعى ماقسات – ابونەنتتەرگە «ENPF» ۇيالى قوسىمشاسىن ترافيكتى ەسەپكە الماي پايدالانۋعا مۇمكىندىك بەرۋ. قازىردىڭ وزىندە Tele2 جانە Altel بىرلەسكەن كومپانياسىنىڭ ابونەنتتەرى وزدەرىنىڭ شوتتارىندا تەڭگەرىمنىڭ بار-جوعىنا قاراماستان قوردىڭ ۇيالى قوسىم­شاسىن پايدالانا الادى. بجزق جاقىن بولاشاقتا باسقا دا وپەراتورلارمەن وسىنداي كەلىسىم جاساسۋدى كوزدەپ وتىر.
سونىمەن قاتار, زەينەتاقى قورى تاراپىنان حالىقتىڭ الەۋمەتتىك تۇرعىدان وسال توپتارىنا, ونىڭ ىشىندە اسىرەسە, مۇمكىندىگى شەكتەۋلى جاندارعا ەرەكشە كوڭىل ءبولىنىپ جاتقاندىعىن ايتا كەتكەن ءجون. مىسالى, 2017 جىلى قوردىڭ «موبيلدىك اگەنت» جوباسى اياسىندا 2016 جىلعا قاراعاندا 6,5 ەسە كوپ وپەراتسيا ورىندالدى. ياعني, قور ماماندارى وتكەن جىلى تۇتىنۋشىلاردىڭ ۇيلەرىنە بارىپ قىزمەت كورسەتۋ بويىنشا 7,1 مىڭ كوشپەلى شارا وتكىزىپ, 189,5 مىڭ وپەراتسيا جاسادى. سالىستىرىپ قاراساق, 2016 جىلى 1,1 مىڭ عانا كوشپەلى شارا وتكىزىلىپ, 29 مىڭ وپەراتسيا جۇزەگە اسىرىلعان.
بجزق سالىمشىلارى مەن الۋشىلارىن زەينەتاقى شوتىنداعى جيناقتاردىڭ قۇنسىزدانىپ كەتۋى مازالايتىنى ءسوزسىز. بۇل تۇرعىدا 2017 جىل تابىستى جىل بولدى. سالىمشىلار مەن الۋشىلاردىڭ جەكە زەينەتاقى شوتتارىنا ەسەپتەلگەن تازا ينۆەستيتسيالىق تابىس سوماسى 550,6 ملرد تەڭگەنى قۇراپ, قوردىڭ زەينەتاقى اكتيۆتەرىنىڭ تابىستىلىعى 7,92 پايىزعا جەتتى. ال بۇل كەزەڭدە ينفلياتسيا دەڭگەيىنىڭ 7,1 پايىز بولعانىن ەسكە سالامىز.
2018 جىلدىڭ العاشقى ءۇش ايى ىشىندە تازا ينۆەستيتسيالىق تابىس 66 ملرد تەڭگەنى قۇرادى. قوردىڭ زەينەتاقى اكتيۆتەرىنىڭ تابىستىلىعى 2017 جىلدىڭ ناۋرىزى مەن 2018 جىلدىڭ ناۋرىزى ارالىعىندا 7,99 پايىزعا جەتتى.
ال بۇل كەزەڭدە ينفلياتسيا دەڭگەيى 6,6 پايىزعا جەتىپ, تابىستىلىق ينفلياتسيا دەڭگەيىنەن جوعارى بولدى.
سونداي-اق, قوردا زەينەتاقى اكتيۆتەرىنەن الىناتىن كوميسسيا­لىق سىياقىنىڭ شاماسى 2018 جىلعا ايىنا 33 پايىزعا ازايتىلىپ, 0,015 پايىزدى قۇرادى. بۇعان دەيىن ول 0,0225 پايىز بولاتىن.
بيىل ناۋرىز ايىندا TÜV Thüringen e.V (تيۋف تيۋرينگەن, گەرمانيا) حالىقارالىق كومپانياسىنىڭ اۋديتورلارى قوردىڭ ساپا مەنەدجمەنتى جۇيەسىنە سەرتيفيكاتسيالىق اۋديت جۇرگىزدى. ماقسات – ونىڭ حالىقارالىق ISO 9001:2015 ستاندارتىنا سايكەستىگىن راستاۋ. سەرتيفيكاتسيالىق اۋديت ءساتتى ءوتىپ, قور تيۋف تيۋرينگەن كومپانياسىنان حالىقارالىق سەرتيفيكات الدى. بۇل قور تاراپىنان كورسەتىلەتىن قىزمەتتەردىڭ جوعارى ساپاعا يە ەكەندىگىن بىلدىرەدى.
2018 جىلعى 8 ساۋىرىنە قاراي زەينەتاقى جيناقتارىنىڭ جالپى سوماسى 8 تريلليون تەڭگەگە جەتىپ, بىلتىرعى جىلدىڭ ءساۋىر ايىنان بەرى 1,1 ترلن تەڭگەگە كوبەيدى. ياعني, ءبىر جىل ىشىندەگى ءوسىم 16,6 پايىزدى قۇرادى.
ال شارتتاردىڭ بارلىق تۇرلەرى بويىنشا جەكە زەينەتاقى شوتتارى­نىڭ سانى 2018 جىلدىڭ 1 ساۋىرىنە قاراي 10 ميلليوننان استى. ناقتى: 10 114 904 شوت. بۇل وتكەن جىلدىڭ سايكەس كەزەڭىمەن سالىستىرعاندا 70 979 بىرلىككە ارتىق. ياعني, ءوسىم 0,7 پايىزدى قۇرادى.
وسىلايشا بىرىڭعاي جيناقتاۋ­شى زەينەتاقى قورى سالىمشىنىڭ جيناقتاۋشى زەينەتاقى جۇيەسىنە قاتىناسقان بۇكىل كەزەڭى – جەكە زەينەتاقى شوتىن اشقاننان باستاپ, زەينەتاقى تولەمدەرىن العانعا دەيىن وعان ونلاين تارتىبىندە قىزمەت كورسەتۋگە دايىن ەكەنىن دالەلدەدى.

جاپپاربەرگەن ايبوتا

تاعىدا

ۇقساس جاڭالىقتار

پىكىر ۇستەۋ

Back to top button