پرەزيدەنت قاسىم-جومارت توقاەۆ ەلباسىنىڭ باستاماسىمەن وتكەن جاستار جىلىنىڭ زاڭدى جالعاسى رەتىندە 2020 جىلدى ۆولونتەرلەر جىلى دەپ جاريالاعان بولاتىن. سودان بەرگى ءبىر جىل ىشىندە ەلىمىزدەگى ۆولونتەرلىك ۇيىمداردىڭ سانى 3 ەسەگە, ال تۇراقتى ۆولونتەرلەر 4 ەسەگە وسكەن, دەپ حابارلايدى ەلوردا ينفو.
اقپارات جانە قوعامدىق دامۋ ۆيتسە-ءمينيسترى بولات تىلەپوۆتىڭ ايتۋىنشا, اتالعان مەرزىمدە 600 ۆولونتەرلىك ۇيىمعا 200 مىڭ بەلسەندى تارتىلىپتى. دەنى الەۋمەتتىك سالاعا شوعىرلانعان. ەندى ولار اينالىساتىن ءىس-شارالاردىڭ اشىقتىعىن قامتاماسىز ەتۋ ءۇشىن قايىرىمدىلىق ۇيىمداردىڭ رەەسترى جاسالماق.
بۇل رەتتە بيىل ۆولونتەر جىلىنىڭ رەسمي جابىلۋ راسىمىنە قاتىسقان مەملەكەت باسشىسى قاسىم-جومارت توقاەۆ قايىرىمدىلىق ۇيىمدارىنىڭ رەەسترى بارلىق اقپاراتتىق جۇيەگە ەنگىزىلىپ, قايىرىمدىلىق ۇيىمدارىنىڭ قىزمەتىمەن, ولاردىڭ قارجىلىق ەسەبىمەن تانىسقىسى كەلەتىن كەز كەلگەن ازاماتقا قولجەتىمدى بولۋى تيىستىگىن ەسكەرتتى. ەلەكتروندى قايىرىمدىلىق سالاسىندا ازاماتتاردى الاياقتاردان قورعاۋ جۇيەسىن ازىرلەۋ دە ماڭىزدى ەكەنى باسا ايتىلدى.
«سول ءۇشىن مينيسترلىك ۆولونتەرلىكتى دامىتۋدىڭ 2021-2023 جىلدارعا ارنالعان جول كارتاسىن ازىرلەگەن بولاتىن. ول ۆولونتەرلىك باستامالاردى ودان ءارى دامىتۋعا ىقپال ەتىپ, ازاماتتاردىڭ ۆولونتەرلىك قىزمەتكە قاتىسۋىن جانداندىرۋعا, ۆولونتەرلىك مادەنيەتتى ودان ءارى نىعايتۋ ءۇشىن جاعداي جاساۋعا مۇمكىندىك بەرەدى», – دەيدى بولات تىلەپوۆ.
ودان بولەك, «ىنتىماق» قوعامداستىقتى دامىتۋ باعدارلاماسىنىڭ جەتەكشىسى مايا شامەنوۆا ەرىكتىلىك كەزىندەگى فاكتچەكينگ (فاكتىلەردى تەكسەرۋ) ماسەلەسىن كوتەردى. ونىڭ ايتۋىنشا, ادامدارعا اقپاراتتى تەكسەرۋدى, ۆولونتەرلىك كومەكتى قالاي كورسەتۋ كەرەكتىگىن عانا ەمەس, ونى قالاي قابىلداۋعا بولاتىنىن ۇيرەتىپ, ولاردى ۆولونتەرلىك ساۋاتتىلىق تۇرعىسىنان دايىنداعان ءجون.
«ەگەر سىزگە ەرىكتىلەر كەلگەن بولسا, وندا مىندەتتى تۇردە ولاردىڭ بارلىق قۇجاتتارىن تەكسەرىپ شىعۋ كەرەك. انىقتامالار مەن دالەلدەردى تالاپ ەتۋگە ۇيالماعان دۇرىس. ساداقا جيناپ جۇرگەن بالالاردى كورگەندە, تۇرعىندار ولاردان قوردىڭ بارلىق قۇجاتتارىن, كىمگە جانە نە ءۇشىن اقشا جينالىپ جاتقانىن سۇراسا ەكەن دەيمىز. مىسالى, مەن ۆولونتەر بالالاردان رۇقسات قۇجاتتارىن, كومەككە مۇقتاج بالانىڭ اتا-اناسىنىڭ بايلانىس دەرەكتەرىن, بالانىڭ دياگنوزىن راستايتىن قۇجاتتار قايدا ەكەندىگىن ۇنەمى سۇرايمىن», – دەيدى مايا شامەنوۆا.
ءيا, بۇل رەتتە قايىرىمدىلىق قورلارىنداعى قارجىنىڭ اشىقتىعى دا وزەكتى. ەندى سول قامقورشى ازاماتتار مەن ولاردان كومەك الۋشىلاردىڭ رەەسترى قايىرىمدىلىق جوبالار ارقىلى وتەتىن قارجىنىڭ جۇمسالۋىنا اقپاراتتىق جانە قوعامدىق باقىلاۋدى قامتاماسىز ەتۋى شارت. ايتپەسە ەل اراسىندا «ءىرى كومپانيالار قايىرىمدىلىقپەن سالىقتان جالتارۋ ءۇشىن عانا اينالىسادى» دەگەن دە ۇشقارى پىكىر بار. الايدا «ايالا» قايىرىمدىلىق قورىنىڭ پرەزيدەنتى ايدان سۇلەيمەنوۆا ونى جاڭساق تۇسىنىك دەپ ەسەپتەيدى.
«كوممەرتسيالىق ەمەس قايىرىمدىلىق قورى رەتىندە ءبىز كورپوراتيۆتىك تابىس سالىعىن تولەمەيمىز. ويتكەنى قايىرىمدىلىقپەن اينالىساتىندار سالىقتان بوساتىلعان. «قايىرىمدىلىق سالىقتان قۇتىلۋ ءۇشىن جاسالادى» دەگەن تۇسىنىك – ءباسىبۇتىن قاتە!» – دەيدى ول.
سونداي-اق نۇر-سۇلتان قالاسى ۇلتتىق ەرىكتىلەر جەلىسىنىڭ وكىلى ايسۇلۋ جاماشەۆا دا وزدەرىنىڭ كومپانياسىنا 58 الەۋمەتتىك ۇيىم تىركەلگەنىن, ولاردىڭ شىنايىلىعى تولىقتاي تەكسەرۋدەن وتكەنىن العا تارتىپ وتىر.
«مەن ولارعا سەنىمدىمىن. ويتكەنى ولاردى ءبىز – ەرىكتىلەر جەلىسى تەكسەرەمىز», – دەيدى ايسۇلۋ جاماشەۆا.
دەمەك, قازىر قازاقستاننىڭ ۆولونتەرلىك قىزمەتىندە اشىقتىق بار دەۋگە وسى مىسالداردىڭ ءوزى-اق جەتكىلىكتى سياقتى. ەڭ باستىسى, مەملەكەت باسشىسى ۆولونتەرلەر الدىندا سويلەگەن سوزىندە قايىرىمدىلىق پەن ۆولونتەرلىكتىڭ پاندەميا كەزىندە جالپىۇلتتىق سيپات العانىن اتاپ ءوتىپ, ونىڭ الەۋمەتتىك نورماعا اينالعانىن جانە حالىقتىڭ دۇرىس قابىلداعانىن جەتكىزدى.
