ءبىلىم

«قازعارىش» مەكتەبىنىڭ مەرەيى

مۇعالىم – مەكتەپتىڭ جۇرەگى دەيمىز. ال مەكتەپ ءبىلىم مەن تاربيەنىڭ تاعىلىمعا تولى مەكەنى دەپ ايتۋعا بولادى. تاياۋدا عانا مۇعالىم كۇنى مەرەكەسىنە ارنالعان سالتاناتتى جيىندا ەلورداداعى رايىمبەك باتىر اتىنداعى №50 «قازعارىش» مەكتەپ-ليتسەيى «ەڭ ۇزدىك مەكتەپ» اتالىمى بويىنشا توپ جاردى. وسى ورايدا اتالعان وقۋ ورداسىنىڭ باسشىسى روزا بولاتاەۆامەن جۇزدەسىپ, ۇيىمشىل ۇجىمنىڭ جەتىستىگى جايىندا اڭگىمەلەسكەن ەدىك.

sul_2745

– «ەڭ ۇزدىك» دەگەن بيىك مارتەبەگە جەتۋ دە وڭاي ەمەس. ول ءۇشىن الدارىڭىزعا قانداي ماقسات قويدىڭىزدار؟
– راقمەت, سىزگە! بۇل بايقاۋ جىل سايىن وتكىزىلەدى. ال ونى وسىمەن ەكىنشى رەت جەڭىپ الۋىمىز – ءبىز ءۇشىن زور مارتەبە. بارلىق ءبىلىم وردالارى سياقتى ءبىزدىڭ دە باس­تى ماقساتىمىز – جاس ۇرپاققا ساپالى ءبىلىم مەن سانالى تاربيە بەرۋ, ۇزدىكسىز ءبىلىم الۋعا باۋلۋ جانە سول العان بىلىمدەرى مەن تاربيەلەرىن ومىردە دۇرىس پايدالانا بىلۋگە ۇيرەتۋ.

– مەكتەپتىڭ تاريحى مەن ۇستازداردىڭ بىلىكتىلىگى تۋرالى ايتساڭىز؟
– مەكتەبىمىزدىڭ العاشقى تۇساۋىن 2004 جىلى ەلباسىنىڭ ءوزى كەسكەن. 2007 جىلى مەملەكەت باسشىسى تۇڭعىش ونلاين-ساباقتى دا ءبىزدىڭ وقۋ وردامىزدا وتكىزدى. 1000 وقۋشىعا ارنالىپ سالىنعان مەكتەپتە بۇگىنگى تاڭدا 1700 بالا وقيدى.100 مۇعالىم قىزمەت ەتەدى. ۇستازداردىڭ 40 پايىزى جوعارى, 20 پايىزى – ءبىرىنشى, 16 پايىزى – ەكىنشى ساناتتى مۇعالىمدەر. ەكى ۇستاز «ى.التىنسارين» توسبەلگىسىنىڭ يەگەرى بولسا, ءتورت ۇستاز – ءبىلىم بەرۋ ءىسىنىڭ وزىق قىزمەتكەرلەرى. ءوز ءىسىنىڭ شەبەرلەرى بولىپ تابىلاتىن رابيعا يمانقۇلوۆا, الما يمانباەۆا, گۇلنار تۇرجانوۆا, رايحان ەلەۋسىزوۆا, مۇراتبەك وسپانوۆ, شەرنياز ءىلياسوۆ سەكىلدى ۇستازدارىمىز – ءبىزدىڭ ماقتانىشىمىز.
مەكتەبىمىزدىڭ ماتەريالدىق-تەحنيكالىق بازاسى دا ۋاقىت تالابىنا ساي جاراقتالعان. وقۋ ورداسىندا جاڭا موديفيكاتسيا بويىنشا جابدىقتالعان حيميا, فيزيكا, ينفورماتيكا كابينەتتەرى جۇمىس ىستەيدى. ماتەريالدىق بازامىزدىڭ جىلدان جىلعا نىعايا تۇسۋىنە ۇتىپ العان گرانتتارىمىزدىڭ كومەگى زور. ماسەلەن, 2012 جىلى جەڭىمپاز بولعان كەزدە مەكتەپكە راديوبايلانىس جانە راديوسپورت كابينەتى الىنىپ, بىرنەشە ءپان كابينەتتەرى ينتەربەلسەندى تاقتالارمەن, كومپيۋتەرلەرمەن, جيھازدارمەن تولىقتىرىلدى. بيىلعى جىلعى تابىسىمىزعا دا ينتەربەلسەندى تاقتالار, روبوتوتەحنيكا كابينەتى, وقۋشىلارعا ارنالعان ءتۇرلى جيھازدار الامىز دەپ وتىرمىز.

– جالپى, مەكتەپ تۇلەك­تەرىنىڭ ءبىلىم دەڭگەيى مەن وقۋ­شىلاردىڭ وليمپيادالاردا قول جەتكىزگەن جەڭىستەرى جا­يىندا ءسوز قوزعاپ وتسەڭىز…
– جىل سايىن بىزدەن قانات­تانعان تۇلەكتەرىمىزدىڭ 70-75 پايىزى مەملەكەتتىك ءبىلىم گرانتتارى بويىنشا جوعارى وقۋ ورىندارىنا تۇسەدى. تەك بيىلعى جىلدىڭ وزىندە مەكتەپتى ءتورت وقۋشى «التىن بەلگىمەن», ءبىر وقۋشى ۇزدىك اتتەستاتپەن اياقتادى. وقۋشىلارىمىز جىل بويى ءتۇرلى ءبىلىم سايىستارىنا, پاندىك وليمپيادالار مەن عىلىمي جوبالارعا بەلسەنە قاتىسىپ, رەسپۋبليكالىق جانە حالىقارالىق سايىستاردا جەڭىمپاز اتانعان تالانتتى جەتكىنشەكتەر كوپ. جاقىندا عانا 9-سىنىپ وقۋشىسى ايگەرىم رامازانوۆا اباي اتامىزدىڭ تۋعان جەرىندە وتكەن رەسپۋب­ليكالىق «اباي وقۋلارىنىڭ» جۇلدەگەرى بولىپ ورالدى. وقۋ­شىلارىمىز – ونەردە دە, سپورتتا دا الدا جۇرەتىن تالانتتى دا تالاپتى بالالار.
جوعارى ناتيجەلەرگە جەتۋى­مىزگە اتا-انالارىمىزدىڭ دا قوسىپ وتىرعان ۇلەسى زور. ءبىز ولارمەن تىعىز بايلانىستا جۇمىس جاسايمىز. مۇعالىم – وقۋشى – اتا-انا ۇشتىگىنىڭ جۇ­مىسى دۇرىس جولعا قويىلعاندا عانا وسىنداي جەتىستىكتەرگە جەتۋگە بولادى دەپ ويلايمىن.

– وقۋ ورداسىندا قانداي جاڭا جوبالار قولعا الىندى. ولار قالاي جۇزەگە اسۋدا؟
– ءبىز جاڭا جوبالاردى ەنگىزۋدى ۇنەمى باستى نازاردا ۇستايمىز. وتكەن وقۋ جىلدارىندا رەسپۋب­ليكالىق «e-Iearning» جوباسىن, راديوسپورتتى, ولكەتانۋ ۇيىرمەسىن, سونداي-اق نازارباەۆ زياتكەرلىك مەكتەپتەرىنىڭ «مەن وقىعاندى ۇناتامىن» اتتى جاپپاي كىتاپ وقۋ جوباسى, «سالاۋاتتى بەيسەنبى», «شاڭىراق» جوبالارىن ەنگىزگەن بولساق, بيىل وسى جوبالار بويىنشا جۇمىستاردى جالعاستىرا وتىرىپ, روبوتوتەحنيكانى قولعا الدىق. وسى جوبالار بويىنشا وقۋشىلاردىڭ قىزىعۋشىلىعى جوعارى ەكەنىن ايتا كەتۋ كەرەك. ونىڭ دالەلى, وقۋشىلارىمىزدىڭ راديوسپورت بويىنشا رەسپۋبليكالىق چەم­پيو­ناتتاردان جۇلدەمەن ورالىپ, ولكەتانۋ بويىنشا ساياحاتتارعا بارىپ, ءتۇرلى سايىستاردا جەڭىمپاز اتانىپ, كىتاپ وقۋعا دەگەن قىزى­عۋشىلىقتارى ارتا ءتۇستى.

ازامات ەسەنجول

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button