قازپوشتا جورالعىسى
بۇرناعى كۇنى «استانا پوچتامتى» باس عيماراتىندا باسپاسوزگە جازىلۋشىلار كۇنى ۇيىمداستىرىلدى. بۇكىل الەمدىك پوشتا كۇنى مەرەكەسى قارساڭىندا وسىنداي ءىس-شارا وتكىزۋ جىل سايىن وتكىزىلىپ كەلەدى. بيىل دا سول ءۇردىس جالعاسىن تاۋىپ, باس قالادا شىعاتىن ءتۇرلى باسىلىم قىزمەتكەرلەرى قالا تۇرعىندارىن وزدەرىنىڭ گازەت-جۋرنالدارىنا جازىلۋعا ۇندەپ, سول جەردە قولما-قول كەلەسى جىلعا گازەتكە جازىلعان وقىرمانعا سىي-سياپات تابىستالدى.
بۇدان كەيىن «قازپوشتا» اق فيليالىنىڭ ديرەكتورى س.ءابىلباەۆا ءوز قىزمەتكەرلەرىن كاسىبي مەرەكەلەرىمەن قۇتتىقتاپ, توعىز ايدا قول جەتكىزگەن جەتىستىكتەرىنە توقتالدى. جىل باسىنان بەرى تولىمدى تابىستارعا كەنەلگەن ەڭبەك ۇزدىكتەرى ماراپاتتالدى.
– سوناۋ 1878 جىلى 9 قازاندا شۆەيتساريادا جيىرما ەكى مەملەكەتتىڭ وكىلدەرى «باس پوشتا» وداعىن قۇرىپ, بەرن شارتىنا قول قويعالى بەرى اتاۋلى كۇنگە اينالعان بۇل كۇننىڭ ورنى ەرەكشە. وسى كۇنى ءبىز جىلدا وقىرماندار مەن رەداكتسيا اراسىندا كەزدەسۋ وتكىزەمىز. پوشتا بايلانىسى قازىرگى ۋاقىتتا دامۋدىڭ جاڭا كەزەڭىنە كوتەرىلدى. كوپتەگەن تىڭ جوبالار ىسكە قوسىلدى. مىنە, سول ءجونىندە اڭگىمەلەيمىز. ءداستۇرلى بۇقارالىق اقپارات قۇرالدارى قاشان دا قوعامنان ءوز ورنىن الىپ كەلەدى. بۇگىنگى ءبىزدىڭ نەگىزگى ماقساتىمىز – رەداكتسيالار وكىلدەرىمەن كەزدەسىپ, گازەت-جۋرنالداردىڭ وقىرماندارعا ءتيىمدى جولمەن جەتۋىنە ىقپال جاساۋ. وسىعان وراي كەزدەسۋلەر ۇيىمداستىرىپ, باسپاسوزگە جازىلۋ جولدارىمەن تانىستىرىپ, كادەسىيلار ۇسىنامىز. وسىلايشا ءار باسىلىمنىڭ دامۋىنا قال-قادىرىمىزشە ۇلەس قوسامىز. جازىلۋشىلاردىڭ جاس دەڭگەيى ءار ءتۇرلى. جاستار جاعى ەلەكتروندى نۇسقانى كوبىرەك قالاسا, ورتا بۋىن وكىلدەرى اراسىندا مەرزىمدىك باسىلىمدارعا جازىلۋشىلار كوپ. وقىرماندارعا بارلىق وڭتايلى جاعدايلاردى قاراستىرامىز, – دەدى ساۋلە اۋەزبەكقىزى.
ساعي ورال