ۇلتتىق اكادەميالىق كىتاپحانادا استاناداعى «جاستار» تەاترىنىڭ نەگىزىن قالاۋشى, كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى, اباي اتىنداعى مەملەكەتتىك سىيلىقتىڭ لاۋرەاتى, شىڭعىس ايتماتوۆ اتىنداعى حالىقارالىق سىيلىقتىڭ يەگەرى, رەجيسسەر نۇرقانات جاقىپبايدىڭ شىعارماشىلىعى جايىندا «قيالدان قيانعا سامعاعان ءبىر پەندەڭ…» اتتى كىتاپتىڭ تانىستىرىلىمى ءوتتى.
كىتاپتىڭ اۆتورى – تەاترتانۋشى, جۋرناليست, اقپارات سالاسىنىڭ ۇزدىگى, ونەرتانۋ عىلىمدارىنىڭ ماگيسترى نازەركە جۇماباي.
«جاستار» تەاترى – سان قىرىمەن, جاڭاشىلدىعىمەن قازاق تەاتر ونەرىندە وزىندىك ورنىن ايشىقتى تۇردە بەلگىلەگەن جاسامپاز ونەر ورداسىنىڭ ءبىرى. ءوزىنىڭ نەبارى 15 جىلدىق تاريحىندا حالىقارالىق, رەسپۋبليكالىق دەڭگەيدەگى بايقاۋلاردان 14 بىردەي گران-پري جۇلدەسىن قانجىعاسىنا بايلاپ, ونەر كەڭىستىگىندە دارا جولىمەن تانىلىپ كەلەدى.
كىتاپتا نۇرقانات جاقىپبايدىڭ شىعارماشىلىق جولى مەن ۇلتتىق ونەرگە سىڭىرگەن ەڭبەگى زەردەلەنگەن. وندا ونىڭ ادامي بولمىسى, تۇلعا تابيعاتى قامتىلعان. اسىرەسە, ونەر يەسىنىڭ تىڭنان تۇرەن سالىپ ارقا تورىنەن «جاستار» تەاترىن اشۋى جانە ونى نەبارى 15 جىل ىشىندە سونى سۇرلەۋگە ءتۇسىرىپ, ۇلتتىق تەاتر ونەرىنە جاڭاشىل لەپ اكەلگەن قايراتكەرلىك ەڭبەگى دە كەڭىنەن باياندالادى.
