ىشكى ىستەر ءمينيسترى مارات احمەتجانوۆ پەن استانا قالاسىنىڭ اكىمى جەڭىس قاسىمبەك ەلوردادا قۇقىقتىق ءتارتىپتى جانە ونىڭ تۇرعىندارىنىڭ قاۋىپسىزدىگىن قامتاماسىز ەتۋدى تەكسەردى.
«قۋات» دسق, پاترۋلدىك پوليتسيا پولكى, اۆتوكولىك شارۋاشىلىعى, ارنايى مەكەمەلەر, سونداي-اق ارنايى حقكو سياقتى بىرقاتار پوليتسيا نىسانىن ارالاپ, مينيستر مەن اكىم مەملەكەت باسشىسىنىڭ قۇقىق بۇزۋشىلىقتىڭ الدىن الۋدا حالىقپەن تىعىز ىنتىماقتاستىققا باعىتتالعان پوليتسيا جۇمىسىنىڭ سەرۆيستىك مودەلىن ەنگىزۋ جونىندەگى تاپسىرمالارىنىڭ ورىندالۋىمەن تانىستى. كەزدەسۋ بارىسىندا ەلوردالىق پد باستىعى مارات تولەباەۆ ازاماتتاردىڭ قۇقىقتىق ءتارتىبى مەن قاۋىپسىزدىگىن قامتاماسىز ەتۋ, قۇقىق بۇزۋشىلىقتىڭ الدىن الۋ جانە جالپى قىلمىسقا قارسى ءىس-قيمىل شارالارى تۋرالى ايتىپ بەردى.
ءتارتىپ ساقشىلارىنىڭ سىن-قاتەرلەرگە دەن قويۋىنىڭ تيىمدىلىگى, سونداي-اق قۇقىق بۇزۋشىلىقتىڭ الدىن الۋ جانە قىلمىستاردى اشۋ, قىزمەتكەرلەردىڭ كاسىبيلىگى مەن دەنە دايارلىعىنا, سونداي-اق جاسالعان جاعدايلارعا بايلانىستى. سپورت شەبەرلىگىن ارتتىرۋ ءۇشىن پوليتسەيلەر «قۋات» سپورت كەشەنىندە تۇراقتى نەگىزدە جاتتىعۋ ساباقتارىن وتكىزەدى. بۇگىنگى تاڭدا باسسەينگە, زاماناۋي سپورت زالدارىنا جانە جوندەۋ جۇمىستارىنا ۇلكەن قاجەتتىلىك بار. پاترۋلدىك پوليتسيا پولكىندە قىزمەت اتقارۋعا كىرىسەتىن جەكە قۇرامنىڭ, قوعامدىق ءتارتىپتى جانە ازاماتتاردىڭ قاۋىپسىزدىگىن قامتاماسىز ەتۋدە قويىلعان مىندەتتەردى ورىنداۋداعى دايىندىعى تەكسەرىلدى.
جىل سايىن ەلوردالىق پوليتسيانىڭ ماتەريالدىق-تەحنيكالىق بازاسى جاقسارىپ كەلە جاتقانى اتاپ ءوتىلدى. قولدانىستا قۇقىقتىق ءتارتىپتى ساقتاۋ جانە قىلمىسقا قارسى كۇرەس ءۇشىن زاماناۋي تەحنيكا مەن قىزمەتتىك اۆتوكولىكتەر بار. وتكەن جىلى ەلوردا اكىمدىگىنىڭ قولداۋىمەن تاۋلىك بويى قىزمەت اتقاراتىن پاترۋلدىك پوليتسيا پولكى, ۋچاسكەلىك ينسپەكتورلار جانە كەزەكشى بولىمدەر سياقتى پوليتسيا دەپارتامەنتىنىڭ سىرتقى قىزمەتتەرى ءۇشىن 103 اۆتوكولىك ساتىپ الىندى. مۇنىڭ ءبارى ىشكى ىستەر ورگاندارىنىڭ اشىقتىعى مەن قولجەتىمدىلىگى, ەلوردا تۇرعىندارى مەن پوليتسەيلەر اراسىندا تىعىز قارىم-قاتىناس ورناتۋ ءۇشىن جاسالادى, بۇل ۇساق قۇقىق بۇزۋشىلىقتاردىڭ ۋاقىتىلى الدىن الۋعا مۇمكىندىك بەرەدى. اكش عيماراتىندا ۇلگىلى قىزمەت اتقارۋ ماقساتىندا قىزمەتتىك اۆتوماشينالارعا ارنالعان جۋ پۋنكتى كورسەتىلدى.
دەلەگاتسيا سونداي-اق شەتەلدىك اۆتوكولىكتەردى زاڭداستىرۋعا قۇجاتتاردى قابىلداۋ پروتسەسىنىڭ دايىندىعى مەن الگوريتمىن تەكسەرۋ ءۇشىن ارنايى حقكو باردى. سونداي-اق مامانداندىرىلعان انگاردا پوليتسيا دەپارتامەنتى قىزمەتكەرلەرىنىڭ كولىك قۇرالدارىن تەكسەرۋگە جانە حالىققا قىزمەت كورسەتۋگە دايىندىعى قارالدى. ءىىم باسشىسى مەن ەلوردا اكىمى ەلوردادا قوعامدىق ءتارتىپتى ساقتاۋ ماڭىزدى جانە مۇندا ازاماتتاردىڭ قاۋىپسىزدىگى ءۇشىن بارلىق جاعداي جاسالۋى ءتيىس ەكەنىنە نازار اۋداردى.
