كەشە استانا قالاسى ءماسليحاتىنىڭ التىنشى شاقىرىلىمىندا سەسسيا قاراۋىنا ەنگىزىلگەن ماسەلەنىڭ ءبىرى – قۇقىق قورعاۋ قىزمەتى. دەپۋتاتتار استانا قالاسى ىشكى ىستەر دەپارتامەنتىنىڭ جەرگىلىكتى پوليتسيا قىزمەتىنىڭ باسشىسى باقىتجان مالىباەۆتىڭ ەسەبىن تىڭدادى.
بۇگىندە جەرگىلىكتى پوليتسيا قىزمەتىندە 1500-دەن استام قىزمەتكەر جۇمىس ىستەيدى. قالا اكىمدىگىمەن تىعىز جۇمىس ىستەيتىن ولار قۇقىقبۇزۋشىلىقتى بولدىرماۋ, قوعامدىق ءتارتىپتى ساقتاۋ, جول قاۋىپسىزدىگى ەرەجەسىن باقىلاۋ, قىلمىستىق جانە اكىمشىلىك قۇقىقبۇزۋشىلىقتىڭ الدىن الۋمەن اينالىسادى.
جەرگىلىكتى پوليتسيا باسشىسى ءوز سوزىندە قالا اكىمدىگىنىڭ قولداۋىمەن ماتەريالدىق-تەحنيكالىق بازا جاقسارىپ كەلە جاتقانىن ايتتى. ماسەلەن, جەرگىلىكتى اتقارۋشى ورگانمەن بىرلەسە 340-قا جۋىق بەينەتىركەگىش پايدالانۋعا بەرىلگەن. جىل باسىنان بەرى ونىڭ كومەگىمەن 1000-نان استام ادام جاۋاپقا تارتىلعان. بۇدان بولەك جولداعى قۇقىقبۇزۋشىلىقتى تومەندەتۋگە دە ەداۋىر سەپتىگى تيگەن. جولداعى اپات, كىسى ءولىمى مەن جاراقات الۋ سانى ءسال بولسا دا ازايعان. سونىمەن قاتار, بيىل جول پوليتسەيلەرى 1020 جۇرگىزۋشىنى ۇستاعان. 795 ادام جۇرگىزۋشى كۋالىگىنەن ايىرىلسا, 92 ادام اكىمشىلىك قاماۋعا الىنىپتى.
باقىتجان مالىباەۆ, بۇعان قوسا قالادا 1865 ادامنىڭ ارنايى ەسەپكە الىنعانىن ايتتى. ولاردىڭ ىشىندە بۇرىن سوتتى بولعاندار – 500, اراققا سالىنعاندار – 700, ناشاقورلار – 382, جۇيكە جۇيەسىمەن اۋىراتىندار – 264 جانە كامەلەتكە تولماعان 266 بالا تىزىمدە تۇر.
سەسسيا بارىسىندا, سالاعا قاتىستى ماسەلەلەرگە كەڭىنەن كوڭىل ءبولىندى. نولدىك توزىمدىلىك, حالىقتى اقپاراتتاندىرۋ جۇمىستارى, الدىن الۋ اكتسيالارى, تۇرعىندارعا ەسەپ بەرۋ جيىندارى تۋرالى ءسوز قوزعادى. سونىمەن قاتار جەرگىلىكتى پوليتسيا باسشىسى سالاعا قاتىستى, سونىڭ ىشىندە ازاماتتاردى تىركەۋ ماسەلەسىنە دەپۋتاتتاردىڭ نازارىن اۋدارتتى.
گۇلميرا شارحانقىزى
