قويمادا ازىق-تۇلىك جەتكىلىكتى
سەيسەنبى كۇنى استانا قالاسى ازىق-تۇلىك تاۋارلارىنىڭ تۇراقتاندىرۋ قورىن باسقارۋ جونىندەگى كوميسسيا «Astana» الەۋمەتتىك-كاسىپكەرلىك كورپوراتسياسىنا قاراستى كوكونىس قويمالارىنىڭ جاي-كۇيىمەن, ونداعى الەۋمەتتىك ماڭىزدى تاۋارلار قورىمەن تانىسىپ شىقتى. كوميسسيانى قالا اكىمىنىڭ ورىنباسارى ەرسايىن ناعاسپاەۆ باسقارىپ باردى.
ەلوردانىڭ دامۋ قارقىنىنا سايكەس تۇرعىندارىنىڭ سانى دا جىلدان-جىلعا كوبەيىپ كەلەدى. حالىق سانى وسكەن سايىن تۇتىناتىن تاۋارلاردىڭ مولشەرى دە وسە ءتۇستى. تۇراقتاندىرۋ قورىنا ازىق-تۇلىك ەلگە تاپشىلىق پەن قىمباتشىلىقتى سەزىندىرمەۋ ماقساتىندا تولتىرىلادى. بۇگىندە وندا وتاندىق وندىرۋشىلەردەن 5 مىڭ توننادان استام ءونىم ساتىپ الىندى.
«Astana» كورپوراتسياسىنىڭ باسقارما توراعاسى قايرات جاڭابەرگەنوۆتىڭ ايتۋىنشا, قالادا 25 كوكونىس قويماسى بار. الايدا, تۇتىنۋشىلاردىڭ قاجەتتىلىگىن وتەۋ ءۇشىن بۇل از. سوندىقتان تاعى وسىنشاما قويمانىڭ قۇرىلىسىن جۇرگىزۋ جوسپارلانۋدا. الەۋمەتتىك ماڭىزدى تاۋارلار قازىردە جۇمىس ىستەپ تۇرعان قويمالاردان ەلورداداعى 40-تان استام ساۋدا ورىندارى مەن 22 ساۋدا جەلىلەرىنىڭ سورەلەرىنە جەتكىزىلەدى.
كوميسسيا ەكى قويمانى بارىپ كوردى. ولاردىڭ ءبىرى كوكتال كەنتىندە ورنالاسقان. گوللانديالىق جوعارى تەحنولوگيالىق قوندىرعىلارمەن جابدىقتالعان بۇل نىسان 5 مىڭ توننا كوكونىسكە شاقتالعان.
ەكىنشى قويما «استانا – جاڭا قالا» يندۋستريالدى پارك اۋماعىندا, بايىرقۇم كوشەسىندە ورىن تەپكەن. الدىڭعىسىنا قاراعاندا ۇلكەندەۋ بولىپ كەلەتىن مۇندا
8 توننا كوكونىس ساقتاۋعا بولادى. بۇعان قوسا, وسىندا قانت, كۇرىش, قاراقۇمىق جارماسى, ۇن, وسىمدىك مايى سىندى حالىققا قاجەت تاۋارلار تۇر. جالپى العاندا, الەۋمەتتىك ماڭىزدى تاۋارلاردىڭ تىزىمىنە ەنگەن ازىق-تۇلىكتىڭ 10 ءتۇرى دە بار. ولاردى قويمادا 9 ايعا دەيىن ساقتاۋعا بولادى.
– قىس پەن كوكتەم مەزگىلدەرىندە باعانى ۇستاپ تۇرۋ ماقساتىندا قويمالارىمىزدى ازىق-تۇلىكپەن تولتىرىپ جاتىرمىز. جەلتوقسان ايىنان باستاپ قازىردە قوردا بار 5 مىڭ توننادان اسا ءونىمدى ساتىلىمعا شىعارا باستايمىز. وسىنشاما ازىق-تۇلىك
2,5 ايعا جەتەدى. ءبىزدىڭ جوبالاۋىمىزشا, جىلداعىداي جاڭا جىل الدىندا باعالار شارىقتاۋى مۇمكىن. ءبىزدىڭ ماقساتىمىز – سوعان شامامىز جەتكەنشە جول بەرمەۋ. سودان كەيىن كوكتەمدە دە باعالار وسەدى دەگەن بولجام بار. قالا بيۋدجەتىنەن الەۋمەتتىك ماڭىزدى تاۋارلاردى ساتىپ الۋعا قوسىمشا 200 ملن تەڭگە ءبولىندى. سوندىقتان, قاڭتار-اقپان ايلارىندا تاعى دا ازىق-تۇلىكتى ساتىپ الۋدى جۇرگىزەمىز. كوكتەمدە بازارلاردا وتاندىق ونىمدەر ازايىپ, سورەلەردى قىتاي, پاكىستان مەن يراننان كەلەتىن تاۋارلار جاۋلايدى. ارينە, يمپورت بولعاننان كەيىن ولاردىڭ باعاسى دا جوعارى بولادى. وسى كەزەڭدە باعانىڭ رەتتەلۋىنە ءبىزدىڭ ازىق-تۇلىكتەرىمىز اسەر ەتەدى, – دەيدى قايرات جاڭابەرگەنوۆ.
امانعالي قالجانوۆ