جاقىندا تاۋەلسىزدىك سارايىندا قر قارجى ءمينيسترى باقىت سۇلتانوۆ, قر پارلامەنتى سەناتىنىڭ دەپۋتاتى سەرىك جاقسىبەكوۆ, ىشكى ىستەر ءمينيسترىنىڭ ورىنباسارى راشيد جاقىپوۆ جانە بولگار ەتنو-مادەني بىرلەستىگىنىڭ توراعاسى ولەگ دىموۆتىڭ قاتىسۋىمەن ەلباسىنىڭ «نۇرلى جول – بولاشاققا باستار جول» اتتى جولداۋىندا ايقىندالعان ماقساتتار مەن مىندەتتەردىڭ ماڭىزىن تالقىلاعان جيىن ءوتتى.
جولداۋدا قامتىلعان جەتى باعىتتى جىلىكتەپ ايتا كەلە, قارجى ءمينيسترى باقىت سۇلتانوۆ: «وتانداستارىمىز ءتۇرلى شىعىنداردى قىسقارتىپ, قولدا بارىن ۇنەمدەۋگە كوشكەنى ابزال. وڭىردە قالىپتاسقان گەوساياسي, گەوەكونوميكالىق جاعدايلار وسىعان يتەرمەلەيدى» دەپ ءمالىمدەدى. باس قارجىگەردىڭ ءمالىمەتىنە سەنسەك, رەسەي ەكونوميكاسىنداعى تۇراقسىزدىق بىزگە دە اسەر ەتپەي قويمايدى. ال الەمدىك نارىقتىڭ شاتقاياقتاۋىنىڭ العاشقى بەلگىلەرى ەل بيۋدجەتىن ىقشامداۋعا الىپ كەلدى.
«ءبىز وسى بيۋدجەت جوباسىن پارلامەنتتە قاراعان كەزدە اعىمداعى جىلدىڭ بيۋدجەتىن 200 ملرد تەڭگەگە قىسقارتتىق, كەلەسى جىلى دا ءبىراز شىعىستاردى قىسقارتامىز. ەلباسى وسىنداي سىرتقى ەكونوميكانىڭ پروبلەمالارى بىزگە دە اسەر ەتەتىنىن الدىن الا بىلگەندىكتەن ۇلتتىق قوردان قاراجاتتى ەكونوميكانىڭ وسۋىنە كومەك بەرۋ ءۇشىن جىبەرىپ وتىر» دەدى باقىت سۇلتانوۆ. الداعى ءۇش جىلدا قازاقستاننىڭ بارلىق سالالىق الەۋەتىن جەتىلدىرۋگە ۇلتتىق قوردان 9 ملرد دوللار بولىنەدى.
«جولداۋدا ايتىلعان الەۋمەتتىك مىندەتتەردىڭ ورىندالۋى – ەكونوميكا دامۋىنىڭ كەپىلى. ال قازىرگى ەكونوميكانىڭ نەگىزگى تەتىگى – شاعىن جانە ورتا بيزنەس. ءبىز ەلباسىنىڭ وسى ەكونوميكالىق ساياساتىنا كەلگەندە ءبىر جەڭنەن قول, ءبىر جاعادان باس شىعارۋىمىز كەرەك» دەپ اتاپ ءوتتى سەرىك جاقسىبەكوۆ.
ال ىشكى ىستەر ءمينيسترىنىڭ ورىنباسارى راشيد جاقىپوۆ پەن بولگار ەتنو-مادەني بىرلەستىگىنىڭ توراعاسى ولەگ دىموۆ پرەزيدەنتتىڭ جولداۋىندا ايتىلعان وزەكتى تاقىرىپتارعا توقتالا كەلە, قازاقستانداعى بەيبىت قاتار زاماننىڭ ورناۋىنا ەلباسىنىڭ ىقپالى زور ەكەنىن ايتتى. سونداي-اق, ولار قازاقستانداعى قاۋىپسىزدىك ماسەلەسى مەن حالىقتار اراسىنداعى دوستىق, تاتۋلىق تۋرالى دا ءسوز قوزعاپ, ەلباسىنىڭ ساياساتىن قولدايتىندارىن جەتكىزدى.
نۇريسلام قۇسپانعالي
