ينە ساباقتاپ, كەستە تىگىپ, كەشەگى وتكەن التىنقول اجەلەرىمىزدىڭ جولىن جالعاپ جۇرگەن شەبەرلەردىڭ ءبىرى – پەرۋزا ءىلياسوۆا. ەلوردالىق تىگىنشى بۇگىندە ءوز قولىنان شىققان ءتۇرلى ۇلتتىق بۇيىمداردى ساۋدالاپ, ناپاقا تاۋىپ ءجۇر.
پەرۋزا اپاي ەلورداعا العاش كەلگەن كۇننەن باستاپ قولونەردىڭ قادىرىن ارتتىرۋ ءۇشىن زاماناۋي تەحنولوگيانى پايدالانىپ, قازىرگى ۋاقىتقا ساي يكەمدەپ شىعارۋدى ماقسات ەتكەن. «ۇلتتىق بۇيىمداردى بۇگiنگi زاماننىڭ تىنىسىمەن ۇندەستiرە بىلسەك, ءوتىمدى بولاتىنىن ۇقتىم. كەزىندە تەك ناۋرىز مەرەكەسىندە عانا تاپسىرىس بولاتىن بولسا, قازىر ۇلتتىق ۇلگىدەگى كەز كەلگەن بۇيىمدارعا سۇرانىس جوعارى. اسىرەسە, قىز جاساۋى, ۇكى جاستىق, قۇراق كورپەشە, پەردە, ءتۇرلى پىشىندەگى سىرماقتار مەن قورجىن قالتالاردىڭ ءتۇر-ءتۇرىن تىگىپ, ساتامىز. ماتا مەن تاسپانى ارنايى تەحنيكامەن جانە قولمەن كومكەرۋ ارقىلى تiگiلگەن كەز كەلگەن بۇيىم ەرەكشە ادەمى شىعادى» دەيدى ىسكەر جان.
بۇگىندە پەرۋزا اپايدىڭ «سىرماق» اتتى قولونەر ءۇيى بار. ۇلتتىق قۇندىلىعىمىزدى پاش ەتەتىن نەبىر ءايبات دۇنيەلەرى كوزدىڭ جاۋىن الادى. ماسەلەن, ۇلتتىق قامزولدار مەن بالاباقشا ۇلاندارىنا ارناپ تىگىلگەن «قارا جورعا» بي كيىمدەرىن ساتىپ الۋشىلار كوپ. ال ءۇيىن قازاقى ۇلگىمەن بەزەندىرەتىن كەلىنشەكتەر ورىندىقتاردىڭ تىسىن ويۋلاتىپ, ارنايى تاپسىرىسپەن جاساتادى. استانادا العاش اشىلعان «Halykmart» ساۋدا ۇيىندە ۇلتتىق بۇيىمدار ساتاتىن سورەدەگى دۇنيەلەردىڭ بارلىعى پەرۋزا اپايدىڭ قولىنان شىققان. اتالمىش دۇكەن قولونەر شەبەرىمەن تىكەلەي بايلانىستا جۇمىس ىستەيدى.
– قازاقتىڭ قازىناسى – قولونەرى. كەزىندە قولونەر شەبەرلەرى ويۋ-ورنەكتەردى, تابيعي شيكىزاتتى پايدالانا وتىرىپ, تۇرمىستىق زاتتاردى دا جاساعان. تەك ءۇي تۇرمىسىنا قاجەتتى بۇيىمداردى جاساپ قويماي, ولاردى اشەكەيلەۋدى, بەزەندىرۋدى, ناقىشتى ورنەكتەر سالۋدى شەبەر مەڭگەرگەن. ىسمەرلەر ۇلتتىق قولونەر بۇيىمدارىن جاساۋ ارقىلى حالقىمىزدىڭ ەتيكالىق جانە مادەني ۇلتتىق ءداستۇرىن كورسەتە بىلگەن. بۇگىنگى ۇرپاق ءوزىنىڭ ۇلتتىق سەزىمدەرىن, ونەرىن جوعالتپاۋى قاجەت. سول ءۇشىن قولىم قالت ەتە قالعان جاعدايدى قولونەر بۇيىمدارىنا قىزىعاتىن قىز-كەلىنشەكتەر ءۇشىن شەبەرلىك دارىستەر ۇيىمداستىرامىن, – دەيدى پەرۋزا ءىلياسوۆا.
شەبەردىڭ قولىنان شىققان دۇنيەلەردىڭ باعاسىنا كەلسەك, ەڭ ارزانى سىرماق 1500-2000 تەڭگەدەن باستالسا, اۆتورلىق قۇراق كورپە مەن كورپەشەلەردىڭ تۇتاس كوللەكتسياسى 300 مىڭعا دەيىن بارادى. ايتا كەتەيىك, پەرۋزا اپاي قازاقتىڭ ءداستۇرىن جاڭا قىرىنان تانىتىپ جۇرگەن تانىمال ەتنوديزاينەر ىرزا تۇرسىنزادادان ءدارىس العان. ياعني «التىن وردا» اۆتورلىق ديزاين ۇيىنەن ءبىلىم الىپ, شەبەرلىگىن شىڭداعان. بۇگىندە ءوزى دە شاكىرت دايىنداپ, ۇلتتىق بۇيىمدارىمىزدى ۇلىقتاپ جۇرگەن ساناۋلى شەبەرلەردىڭ قاتارىن تولىقتىرىپ كەلەدى.
