ەلوردادا كۇن سايىن 1 مىڭ توننادان استام قالدىق جينالادى. «اباتتاندىرۋ, سانيتارلىق جابدىقتاۋ, جيناۋ جۇمىستارىن ۇيىمداستىرۋ جانە استانا قالاسىنىڭ اۋماعىندا تازالىقتى قامتاماسىز ەتۋ قاعيدالارى» تالاپتارىنا سايكەس, شاھارداعى قوقىستىڭ ءبارى الاش تاس جولىندا ورنالاسقان پوليگونعا شىعارىلۋى كەرەك.
بۇگىندە بۇل ەرەجەنى ەسكەرمەي, باس قالانىڭ كەيپىنە كەرى اسەر ەتەتىن زاڭدى جانە جەكە تۇلعالار بار. ماسەلەن, 18 ءساۋىر مەن 18 مامىر ارالىعىندا جۇرگىزىلگەن ەكولوگيالىق ايلىق اياسىندا استاناداعى رۇقسات ەتىلمەگەن ورىندارعا توگىلگەن 10 مىڭ تونناداي قالدىق انىقتالىپ, جويىلدى. وسىنداي قۇقىق بۇزۋشىلىقتاردى رەتتەۋ ماقساتىندا شاھار اكىمىنىڭ تاپسىرماسىمەن 3 اۋداندا جۇمىس توپتارى قۇرىلىپ, رەيدتەر ءوتتى. اۋدان اكىمدىكتەرى, ەكولوگيا دەپارتامەنتى, تۇتىنۋشىلاردىڭ قۇقىقتارىن قورعاۋ دەپارتامەنتى, تابيعي رەسۋرستار جانە تابيعات پايدالانۋدى رەتتەۋ باسقارماسى, تابيعاتتى قورعاۋ پوليتسياسى قىزمەتى, «استانا ەكو-پوليگون نس» جانە «استانا تازارتۋ» كاسىپورىندارى وكىلدەرىمەن بىرگە ءبىز دە قالانى ارالاپ, ءتارتىپ بۇزۋشىلىق فاكتىلەرىن تەكسەردىك.
اۋەلى تىزگىندى سىعاناق جانە بەيسەكوۆ كوشەلەرىنىڭ قيىلىسقان تۇسىنا بۇردىق. مۇندا «قۇلاگەر» جاۋاپكەرشىلىگى شەكتەۋلى سەرىكتەستىگى قۇرىلىس نىسانىن سالىپ جاتىر. وبەكتىنىڭ جان-جاعى قورشالماعان, ونىڭ ۇستىنە, قۇرىلىس قالدىقتارى تاۋ بولىپ ۇيىلگەن. تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ قالدىقتاردى باسقارۋ جانە «جاسىل ەكونوميكا» ءبولىمى باسشىسى ميراس گايسيننىڭ ايتۋىنشا, اتالمىش كومپانيا جىل باسىنان بەرى پوليگونعا 26 تونناعا جۋىق قوقىس اپارىپتى. الايدا ءالى جونەلتىلمەگەن قالدىقتار دا از ەمەس ەكەن. سول ءۇشىن تابيعاتتى قورعاۋ پوليتسياسى پروتوكول تولتىرىپ, ايىپپۇل قۇنىن بەلگىلەدى.
– اكىمشىلىك كودەكستەگى 505-باپتىڭ 1-بولىمىنە سۇيەنىپ, بۇل فيرماعا 100 ايلىق ەسەپتىك كورسەتكىش كولەمىندە ايىپپۇل سالدىق. نىساننىڭ شەتىن قورشاپ, جينالعان قوقىستى توگۋگە 5 كۇن مەرزىم بەرىلەدى. جالپى, وسى جىلدىڭ باسىنان بەرى ەسىل اۋدانى بويىنشا 88 قۇرىلىس كومپانياسى قۇقىق بۇزعان. ولار 4 ميلليون تەڭگەدەن اسا اكىمشىلىك جازاعا تارتىلدى, – دەدى ەسىل اۋداندىق تابيعاتتى قورعاۋ پوليتسياسى ءبولىمىنىڭ باسشىسى, پوليتسيا مايورى رينات جاڭعىلباەۆ.
بۇدان سوڭ سارىكول كوشەسىنىڭ بويىندا ءسۇرىلىپ جاتقان تۇرعىن ۇيلەرگە باردىق. الماتى اۋداندىق تابيعاتتى قورعاۋ پوليتسياسىنىڭ ينسپەكتورى «ارمان قۇرىلىس» مەردىگەرلىك ۇيىمىنا 30 اەك, ياعني, 63630 تەڭگە كولەمىندە ايىپپۇل تاعايىندادى. اتالعان كومپانيا اينالاسىنا قورشاۋ قويماعان, ارنايى بەلگىلەر ورناتپاعان, سونىمەن قوسا, قۇرىلىس قالدىقتارىن ءتيىستى جەرگە جەتكىزبەگەن.
– ءبىز بيىل الماتى اۋدانى بويىنشا قوقىس توگىلگەن 76 ورىندى تاپتىق. سونىڭ ناتيجەسىندە قالا شەتىندەگى پوليگونعا شامامەن 3 مىڭ تەكشە مەتر قالدىق شىعارتتىق. وسىنداي جايتتاردى ەسەپكە الا كەلە اۋدانداعى 18 ورىنعا ەكولوگيالىق بەكەت ورناتتىق. ونداعىلار تاڭنان تۇنگە دەيىن اينالانى باقىلاپ, زاڭ بۇزۋشىلىقتاردىڭ الدىن الادى. مىسالى, كەشە عانا ساعات تۇنگى 23.00 كەزىندە شارۋاشىلىق-تۇرمىستىق قالدىقتى تىيىم سالىنعان جەرگە توگىپ جاتقان «گازەل» كولىگى ۇستالدى. ەكولوگيالىق پوليتسيا قىزمەتكەرلەرى الگى ازاماتقا دەرەۋ شارا قولدانىپ, توككەن قوقىسىن پوليگونعا اپارىپ تاستاتقىزدى. سوندا قاراڭىز, قالدىقتى پوليگونعا تاستاعانى ءۇشىن جۇرگىزۋشى نەبارى 950 تەڭگە تولەدى. بىراق زاڭسىزدىققا جول بەرگەندىكتەن 20 اەك كولەمىندە جازاعا تارتىلىپ, 45 ەسە كوپ شىعىندالدى. وسىنداي قۇلىقسىزدىقتان بارشا تۇرعىنداردى ساقتانۋعا شاقىرامىز, – دەدى الماتى اۋدانى اكىمىنىڭ ورىنباسارى بورانباي بولاتبەكوۆ.
بوتاگوز ماراتقىزى
