قورعانىس ورداسى قونىس جاڭارتتى
استانا كۇنى مەرەكەسى جاڭادان اشىلاتىن عيماراتتارىمەن دە ايشىقتى. 3 شىلدە كۇنى ۇلتتىق قورعانىس ۋنيۆەرسيتەتىنىڭ جاڭا عيماراتى اشىلدى. بۇل سالتاناتتى راسىمگە ەلباسى نۇرسۇلتان نازارباەۆ قاتىستى.
مەملەكەت باسشىسى ۇلتتىق قورعانىس ۋنيۆەرسيتەتىنىڭ تىڭداۋشىلارىن, تۇلەكتەرى مەن وقىتۋشى-پروفەسسورلار قۇرامىن جاڭا عيماراتتىڭ اشىلۋىمەن قۇتتىقتاپ, مۇندا جوعارى بىلىكتى اسكەري ماماندار دايارلايتىن ورتالىق قۇرىلۋى ءتيىس ەكەندىگىن جانە وقۋ ورنىندا اسكەري عىلىمدى جەتىك مەڭگەرگەن, بىرنەشە تىلدە ەركىن سويلەيتىن بىلىكتى وفيتسەرلەر تاربيەلەنۋى كەرەكتىگىن اتاپ ءوتتى.
ۇلتتىق قورعانىس ۋنيۆەرسيتەتى بۇعان دەيىن ششۋچينسك قالاسىندا ورنالاسقان ەدى. ەندى ىرگەلى اسكەري وقۋ ورنىنىڭ عيماراتى ەلوردادان ورىن تەپتى.
زاماناۋي تەحنولوگيامەن سالىنىپ, وقۋدىڭ يننوۆاتسيالىق قۇرىلعىلارىمەن جابدىقتالعان عيماراتتا وقۋ ەندى تالاپتى دا كۇشەيتە تۇسەتىنىن پرەزيدەنت ايتا كەلە, ونىڭ مۇمكىندىكتەرىن ءتيىمدى پايدالانۋ قاجەتتىگىن العا تارتتى.
– قازاقستان ءوزىنىڭ سىرتقى ساياساتىنىڭ ارقاسىندا شەكارانىڭ ءون بويىندا تىنىشتىقتى قامتاماسىز ەتتى, قۋاتتى وداقتاستار تاپتى. بۇعان قوسا, ءبىزدىڭ مەملەكەتىمىزدە قۋاتتى, قانداي دا ۇرىسقا ساقاداي ساي ارميا مەن وتان الدىنداعى پارىزىنا ادال وفيتسەرلەر بولۋى ءتيىس. وسىنداي جوعارى بىلىكتى جاۋىنگەرلەر دايارلاۋعا جاڭا عيماراتتىڭ ماتەريالدىق-تەحنيكالىق بازاسى تولىققاندى جەتكىلىكتى. مۇندا زەرتحانالار جۇمىس ىستەپ, عىلىمي زەرتتەۋلەر جۇرگىزىلەدى. وزدەرىنىڭ تاجىريبەسىمەن ءبولىسۋ ءۇشىن ۋنيۆەرسيتەتكە شەتەلدىك بىلىكتى ماماندار دا شاقىرىلاتىن بولادى, – دەدى جوعارعى باس قولباسشى.
سونداي-اق, مەملەكەت باسشىسى ۋنيۆەرسيتەتتىڭ ءالى كۇنگە اسكەري مامانداردى وقىتۋ مەن دايارلاۋ جونىندەگى ناقتى جوسپارى جوقتىعىن ەسكەرتىپ, وسى جاعىنان شەتەلدىك تاجىريبەنى ۇتىمدى پايدالانا بىلۋگە شاقىردى. ءارى وقۋ ورنى ۇجىمى جاڭا عيماراتتى پايدالانۋ تۇجىرىمداماسىن دا ازىرلەۋى ءتيىس.
ۋنيۆەرسيتەت ۇجىمىمەن كەزدەسۋدەن كەيىن ەلباسى وقۋ ورنىنىڭ مونيتورينگ ورتالىعىن, وپەراتيۆتىك ونەر كافەدراسى مەن كىتاپحاناسىن ارالاپ كوردى. سوڭىندا قۇرمەتتى قوناقتار كىتابىنا ەستەلىك قولتاڭباسىن قالدىردى.
ۇلتتىق قورعانىس ۋنيۆەرسيتەتى – ماگيستراتۋرا جانە دوكتورانتۋرا باعدارلامالارى بويىنشا ستراتەگيالىق, جەدەل-ستراتەگيالىق جانە جەدەل-تاكتيكالىق باسقارۋ بۋىندارى بويىنشا اسكەري كادرلار دايارلايتىن بىردەن-ءبىر ىرگەلى شاڭىراق. بۇگىنگە دەيىن وقۋ ورنىن ءبىر مىڭعا جۋىق تىڭداۋشى ءبىتىرىپ شىعىپتى.
قىمبات توقتامۇرات