رۋحانيات

قوس قاناتتى اقىن

استاناداعى ۇلتتىق اكادەميالىق كىتاپحانادا قازاقستاننىڭ ەڭبەك سىڭىرگەن قايراتكەرى, فرانتس كافكا اتىنداعى حالىقارالىق التىن مەدال سىيلىعىنىڭ لاۋرەاتى, بەلگىلى اقىن ءشومىشباي ساريەۆتىڭ 70 جىلدىق مەرەيتويىنا ارنالعان ادەبي-سازدى كەش ءوتتى. يگىلىكتى شارا اياسىندا  قارىمدى قالامگەردىڭ «اقىننىڭ قىدىر اتامەن سىر – سۇحباتى» اتتى جاڭا كىتابىنىڭ تۇساۋى كەسىلدى.

ءشومىشباي ساريەۆ – قازاق پوەزياسىنا وتكەن عاسىردىڭ الپىسىنشى جىلداردىڭ سوڭىنا تامان بۋىرقانىپ كەلگەن ءبىر بۋىننىڭ بەلدى وكىلى سانالادى. العاشقى ولەڭدەر توپتاماسىنا  ابىز اقىن ءابدىلدا تاجىباەۆ باتاسىن بەرىپ, ءسات-ساپار تىلەگەن. سودان باستالعان اقىندىق جول ارنالى ايدىنعا ۇلاسىپ, ولەڭدەگى ەرەن جۇيرىكتەردىڭ بىرىنە اينالدى.

جيىندى اتالعان كىتاپحانا ديرەكتورى ءۇمىتحان داۋرەنبەكقىزى اشىپ, اقىنعا ءىلتيپاتىن جەتكىزدى.  ودان كەيىن ءشومىشباي اعامىز ءوزىنىڭ ءومىر جولىندا كەزدەسكەن, قامقورلىق كورسەتكەن – ءابدىلدا تاجىباەۆ, قادىر مىرزاليەۆ, تۇمانباي مولداعاليەۆ سەكىلدى اقىندىقتىڭ اق تۋىن جەلبىرەتكەن ارداقتى اعالارى تۋرالى تەبىرەنىپ سويلەدى. ولاردىڭ رۋحىنا باس ءيىپ, تاعزىم جاسادى. جالپى, ساريەۆتى حالقىمىز وتە جاقسى بىلەدى. ونىڭ كوپتەگەن جىر جيناقتارىنان بولەك, قالىڭ قازاق اۋزىنان تاستاماي ايتىپ جۇرەتىن ءبىرتالاي اندەرگە ءسوز جازعان اقىن.  اسىرەسە, كورنەكتى كومپوزيتور كەڭەس دۇيسەكەەۆ ەكەۋىنىڭ اراسىنداعى شىعارماشىلىق بايلانىستىڭ ناتيجەسىندە قانشاما عاجايىپ اندەر دۇنيەگە كەلدى. بۇگىنگى ەسترادا دا ورىندالىپ جۇرگەن سازىنىڭ تاتىمى بار اندەردىڭ ءسوزى دە وسى اعامىزدىڭ قالامىنان تۋعان. سوندىقتان بولار, قارا ولەڭنىڭ جۇيرىگى عافۋ قايىربەكوۆ ونى «قوس قاناتتى اقىن» دەپ باعالاعان. سونداي-اق, شارا بارىسىندا اكادەميك سەيىت قاسقاباسوۆ, كومپوزيتور مۇرات قۇسايىنوۆ, اقىن قونىسباي ءابىلوۆ, جازۋشى قۋانىش جيەنباي كەش يەسىنە ىزگى لەبىزدەرىن ءبىلدىردى. سەرىك تۇرعىنبەكۇلى  ارناۋ ولەڭ وقىسا, قر پارلامەنتى ءماجىلىسىنىڭ دەپۋتاتى, باقىتبەك سماعۇل «باۋىرجان مومىشۇلى توسبەلگىسىن» تابىس ەتتى. كورنەكتى كومپوزيتور تولەگەن مۇحامەدجانوۆ ارقالى اقىننىڭ سوزدەرىنە جازىلعان اندەرىن ورىندادى.

قىسقاسى,  جوتالى جەتپىسكە تولعان اقىننىڭ كەشى ءان مەن جىردان ءورىلىپ, ونەگەلى اڭگىمەگە تولى بولدى.

                                                                               ازامات ەسەنجول

تاعىدا

ۇقساس جاڭالىقتار

پىكىر ۇستەۋ

Back to top button