مەملەكت باسشىسى نۇرسۇلتان نازارباەۆ «استانا» فۋتبول كومانداسىنا قازاقستان رەسپۋبليكاسىنىڭ سۋپەركۋبوگىن تاپسىردى
فۋتبول…
فۋتبول – ميلليونداردىڭ ويىنى…
فۋتبول – ونەر, كاسىپ, يندۋستريا…
بيىلعى كوكتەمنىڭ العاشقى كۇنىندە, ياعني, 1 ناۋرىزدا قازاقستان جانكۇيەرلەرى ءۇشىن دە كوپتەن كۇتكەن جاڭا فۋتبول ماۋسىمى باستالدى. بۇل كۇنى «استانا ارەنا» ستاديونىنا جينالعان 20000-نان استام كورەرمەن قازاقستان سۋپەركۋبوگىن ساراپقا سالعان «استانا» – «قايرات» ويىنىن قىزىقتادى. وتكەن ماۋسىمداعى ەل چەمپيونى مەن كۋبوك جەڭىمپازى اراسىنداعى باسەكەنى ەلباسىمىز نۇرسۇلتان نازارباەۆ تا تاماشالادى.
ماۋسىماشار ويىن بولعاننان سوڭ شىعار, الدە قازاقستاننىڭ قوس مەگاپوليسى اراسىنداعى سپورتتىق باسەكەلەستىكتىڭ ءباسى بولار, بۇل ويىندا ەشقايسىسىنىڭ جەڭىلگىسى كەلمەيتىنى بىردەن اڭعارىلدى. شابۋىلدا شيرىقپاي, قورعانىستا اسا ساق ويناعان فۋتبولشىلاردىڭ بۇل ارەكەتىن, ارينە, جانكۇيەرلەر دە اسا قولداي قويماعانى اڭعارىلىپ قالىپ جاتتى. الايدا, فۋتبولشىلار ءۇشىن سۋپەركۋبوكتىڭ ءباسى باسىم ەكەنى ايتپاسا دا تۇسىنىكتى ەدى.
وسىلايشا, قوس قاقپا ماڭىندا تۋىنداعان ءبىردى-ەكىلى قاۋىپتى ساتتەرمەن عانا جانكۇيەرلەردى سەلت ەتكىزگەن ويىننىڭ نەگىزگى ۋاقىتىندا ەسەپ اشىلمادى. قازاقستان فۋتبول فەدەراتسياسىنىڭ ارنايى شاقىرۋىمەن كەلگەن شۆەتسيالىق ايگىلى تورەشى يوناس ەريكسسون ءسال دەمالىستان كەيىن فۋتبولشىلاردى ون بەس مينۋتتىق ەكى ەكسترا تايمعا ويىنعا قوستى. ەندى ءبىرى گول سوعار دەگەن جانكۇيەر ءۇمىتى بۇل جولى دا الدانىپ قالدى. قوس قاقپاشى دا دوپ دارىتپاي شىقتى. ءسويتىپ, سۋپەركۋبوك تاعدىرى ماتچ سوڭىنداعى پەنالتي ارقىلى شەشىلدى. بۇل سىناقتا «استانا» جىگىتتەرىنىڭ ايدارىنان جەل ەستى. اسىرەسە, قاقپاشى ەريچ ەرلەدى. ول ءۇش رەت قارسىلاستار سوققىسىن قاقشىپ الدى. ءبىرى ءدال سوعىپ, ەندى ءبىرى قاقپادان قيسىق تەۋىپ, جانكۇيەرلەرىن دە, باپكەرلەرىن دە ابدەن ابىگەرگە تۇسىرگەن ويىننىڭ سوڭعى نۇكتەسىن كوماندا كاپيتانى مىندەتىن اتقارعان ابزال بەيسەبەكوۆ قويدى. جاس فۋتبولشىنىڭ جويقىن سوققىسىنا الماتىلىق قاقپاشى پلوتنيكوۆ توسقاۋىل بولا المادى. وسىلايشا, پەنالتي ۇرىسىندا 3:2 ەسەبىمەن جەڭىسكە جەتكەن «استانا» كومانداسى قازاقستان رەسپۋبليكاسىنىڭ سۋپەركۋبوگىن جەڭىپ الدى. بۇل «استانا» كومانداسى ءۇشىن جاڭا ماۋسىمداعى جەڭىستەرگە جول اشاتىن جۇلدە بولعانى ايقىن. سايان حاميتجانوۆ باسقاراتىن كلۋب ءۇشىن, ستانيمير ستويلوۆ باپتايتىن كوماندا ءۇشىن بيىلعى ماۋسىم شىن مانىندە تارتىستى دا قىزىقتى ويىندارعا تولى بولايىن دەپ تۇر. اتاپ ايتقاندا, ءبىزدىڭ «استانا» قازاقستان چەمپيونى اتاعىن ساقتاپ قالۋ جانە ۋەفا-نىڭ چەمپيوندار ليگاسىندا ەل نامىسىن قورعاۋ ءۇشىن سىنعى تۇسەتىن بولادى. ولاي بولسا, ميلليونداردىڭ ويىنىنا بالانعان فۋتبولداعى بيىكتەردى باعىندىرا بەر «استانا» دەمەكپىز.
سۋپەركۋبوك فيناليستەرىنە مادەنيەت جانە سپورت ءمينيسترى ارىستانبەك مۇحامەدياۇلى مەن قازاقستان فۋتبول فەدەراتسياسىنىڭ پرەزيدەنتى ەرلان قوجاعاپانوۆ كۇمىس مەدالدار تابىس ەتتى. استانا قالاسىنىڭ اكىمى ادىلبەك جاقسىبەكوۆ جەڭىمپازدارعا التىن مەدال تاپسىردى.
ەلباسىمىز نۇرسۇلتان نازارباەۆ كوماندا كاپيتانى تاڭات نوسەرباەۆتىڭ قولىنا سالتاناتتى جاعدايدا سۋپەركۋبوكتى ۇستاتتى.
سونىمەن ەلىمىزدە جاڭا فۋتبول ماۋسىمى اشىلدى. 7 ناۋرىز كۇنى قازاقستان چەمپيوناتى باستالادى. 28 ناۋرىز كۇنى قازاقستان ۇلتتىق قۇراماسى ەۋروپا چەمپيوناتىنىڭ توپتىق ءتۋرنيرى اياسىندا يسلانديا قۇراماسىن قابىلدايدى.
