قۋاندىقتى كۋزباسس تا قۇرمەتتەيدى
قازاققا ءتان تەكتىلىكتى تانىتىپ كەلە جاتقان, جاس تا بولسا تانىمال اكتەر قۋاندىق قىستاقباەۆ رەسەي فەدەراتسياسىنىڭ كەمەروۆ وبلىسى تاعايىنداعان «وردەن زا پوچەتا كۋزباسسا» توسبەلگىسىمەن ماراپاتتالدى.
قىستاقباەۆ – قالىڭ قازاق اراسىنان سۋىرىلىپ شىعىپ, اتالمىش ماراپاتقا قول جەتكىزىپ وتىرعان تۇڭعىش تۇلعا. بۇل جەتىستىككە اكتەر ءوزىنىڭ پارتيزان-جازۋشىسى, حالىق قاھارمانى ءھام ۇلى وتان سوعىسىنىڭ باتىرى جايىندا 4 بولىمنەن تۇراتىن «قاسىم» فيلمىندە ويناعانى ءۇشىن قول جەتكىزىپ وتىر.
ءتۇر-تۇلعاسى كەلىسكەن, ونەرىن شەبەرلىكپەن شىڭداعان اكتەردى گۋبەرنيا تاراپىنان ماراپاتتاۋعا كەمەروۆ وبلىسىنىڭ گۋبەرناتورى امان تولەەۆتىڭ ءوزى مۇرىندىق بولىپتى.
قازاق ارتىسىنە توسبەلگىنى تابىستاپ, ونەردەگى جەتىستىگىمەن قۇتتىقتاۋ ءۇشىن كەمەروۆتەن ارنايى دەلەگاتسيا كەلدى.
ءسويتىپ, كەشە ق.قۋانىشباەۆ اتىنداعى قازاق مۋزىكالىق اكادەميالىق دراما تەاترىندا كەزەكتى قويىلىم – دۋمان رامازاننىڭ پەساسى بويىنشا ساحنالانعان «ابىلاي حاننىڭ ارمانى» سپەكتاكلىنەن كەيىن ق.قىستاقباەۆقا «وردەن زا پوچەتا كۋزباسسا» ءتوسبەلگىسى تابىستالدى.
وسى قويىلىمدا قىستاقباەۆ ابىلايدىڭ ءرولىن سومداعان ەدى.
سۇبەلى ءسوز
قۋاندىق قىستاقباەۆ, اكتەر:
– راسىندا دا, بۇل ماراپات قازاقستاننان العاش رەت ماعان بەرىلىپ وتىر. «قاسىم» فيلمىندە نار تۇلعامىزدى سومداعانىم ءۇشىن تاعايىندالعان. مەن نە دەرىمدى بىلمەي وتىرمىن. ارينە, قۋانىشتى ەكەنىمدى جاسىرا المايمىن. بۇل توسبەلگى رەسەيدىڭ ءبىر وبلىسىنىڭ تاعايىنداعان ماراپاتى عوي دەيىن دەسەم, «حالىقارالىق» مارتەبەسى بار ەكەن. ودان دا ماڭىزدىسى, وزگە ەلدە وزا شاۋىپ, ەل باسقارىپ جۇرگەن اعامىز امان تولەەۆ قول قويىپ بەرىپ وتىر. سوندىقتان, بۇل ماراپاتتىڭ مەن ءۇشىن ماڭىزى زور.
ءنازيرا بايىربەك