ەلوردالىق «103» قىزمەتىنىڭ بازاسىندا قالا تۇرعىندارىن ءتۇرلى جازاتايىم وقيعالار كەزىندە العاشقى مەديتسينالىق كومەك كورسەتۋ بويىنشا وقىتۋ جۇرگىزىلەدى. تەك وتكەن جىلى وقۋ-سيمۋلياتسيالىق ورتالىق (وسو) قالانىڭ 2900 تۇرعىنىنا شەبەرلىك ساباعىن وتكىزدى. قاتىسۋشىلاردى دارىگەرلەر كەلگەنگە دەيىن جەدەل جاردەم كورسەتۋ داعدىلارىنا ۇيرەتتى.
«2019 جىلى ءبىز سيمۋلياتسيالىق جابدىقتارمەن جابدىقتالعان وقۋ-سيمۋلياتسيالىق ورتالىق قۇردىق, ونىڭ قۇرامىنا 10-نان استام مانەكەن-ترەناجەر, 100-دەن استام مەدينسترۋمەنتاري اتاۋى, دەربەس كومپيۋتەرلەر مەن نوۋتبۋكتەر, مۋلتيمەديالىق پلانشەتتەر جانە ت.ب. كىرەدى. ءبىز ماستەر-كلاستان وتكەندەردى, سونداي-اق ۇيرەتىپ جۇرگەن قىزمەتكەرلەرىمىزدى ماقتان تۇتامىز جانە ولار ءوز ءىسىنىڭ شەبەرلەرى ەكەنىن بىلەمىز» دەيدى «قالالىق جەدەل مەديتسينالىق جاردەم ستانتسياسى» مكك باسشىلىعى.
وسو قۇرامىندا 10 نۇسقاۋشى بار. ولار – ەۋروپالىق ERC رەانيماتسيا كەڭەسى مەن امەريكالىق جۇرەك قاۋىمداستىعىنىڭ رەسمي حالىقارالىق نۇسقاۋشىلارى. وسو باسشىسىنىڭ م.ا. شىنتاس قاسىمنىڭ ايتۋىنشا, ولار ءۇشىن جەدەل جاردەم كورسەتۋ سالاسىندا ۇنەمى بىلىكتىلىگىن ارتتىرۋ ماڭىزدى.
«ءبىز ءۇشىن ەڭ باستىسى جانە نەگىزگىسى الەمدىك دەڭگەيدەگى تاجىريبە مەن ءادىسنامانى قولدانا وتىرىپ, جەدەل مەديتسينالىق كومەك كورسەتۋدى ۇنەمى جاقسارتۋ بولىپ سانالادى. ءبىز ءبىلىم بەرۋ جانە پراكتيكالىق كلينيكالىق تاجىريبەنى جەتىلدىرەمىز. مەكەمەمىزدىڭ ەسىگى وسىنداي داعدىلاردى ۇيرەنگىسى كەلەتىندەر ءۇشىن اشىق. ماستەر-كلاسس ارقىلى جەدەل جاردەم بريگاداسى كەلگەنگە دەيىن بىرەۋدىڭ ءومىرىن ساقتاپ قالا الاسىز» دەيدى شىنتاس قاسىم.
وقۋعا نيەت بىلدىرۋشىلەر ءوز سۇراقتارى بويىنشا +7(7172) 70-11-81 تەلەفون ءنومىرى ارقىلى نەمەسە رىسقۇلوۆ كوشەسى 8/1, 3-قابات مەكەنجايى بويىنشا ساعات 09:00-دەن 17:00-گە دەيىن حابارلاسا الادى. جەدەل جاردەم ماماندارىنىڭ ايتۋىنشا قىزمەتكەرلەردى وقىتۋ كاسىپورىن قاراجاتى ەسەبىنەن دە, كۇنتىزبەلىك جوسپارلارعا سايكەس بيۋدجەتتىك قارجىلاندىرۋ ەسەبىنەن دە جۇرگىزىلەدى.
