قالا قۇرىلىسى جانە ساۋلەت ماسەلەلەرى بويىنشا وتكەن كەڭەستە ەلوردا اكىمى اسەت يسەكەشەۆ ءوزىنىڭ ءبىرىنشى ورىنباسارى سەرگەي حوروشۋنعا استانا قالاسىندا جوبالاۋ مەن قۇرىلىسقا رۇقسات بەرۋ پروتسەدۋرالارىن ايتارلىقتاي جەڭىلدەتۋدى جانە ونىڭ ايقىندىلىعىن قامتاماسىز ەتەتىن وڭتايلى الگوريتم ازىرلەۋدى تاپسىردى.
الداعى ۋاقىتتا قالا قۇرىلىسى جانە ساۋلەت باسقارماسىنىڭ قىزمەتتەرى بارىنشا قولجەتىمدى بولادى. وسى ماقساتتا قىزمەتتەردى ەلەكتروندى فورماتقا كوشىرۋ جۇمىستارى قولعا الىندى. سونىمەن قاتار, «ەلەكتروندى ساۋلەت» بازاسى جاسالادى.
وسىلايشا, «ەسكيزدىك جوبالاردى كەلىسۋ», «سىرتقى جارناما ورناتۋ», جوبالاۋ مەن قۇرىلىسقا رۇقساتتار, رەكونسترۋكتسياعا شەشىمدەر بەرۋ سياقتى قىزمەتتەردى ۇسىنۋ بارىسىندا اكىمشىلىك توسقاۋىلدار قىسقارتىلادى. جالپى, قالا قۇرىلىسى, ساۋلەت جانە قۇرىلىس قىزمەتىنىڭ سۋبەكتىلەرىنە باسقارمانىڭ 25 قىزمەتىن پايدالانۋ ءۇشىن ەلەكتروندى كانال اشىلادى.
قىزمەتتەردىڭ جاڭا فورماتى كەزەڭ-كەزەڭمەن ەنگىزىلمەك. بۇگىندە ەسكيزدىك جوبالاردى كەلىسۋ بويىنشا ەلەكتروندى قىزمەت پيلوتتىق رەجيمدە ۇسىنىلىپ جاتىر, قالعان قىزمەتتەر جاقىن ارادا ەلەكتروندى فورماتقا كوشىرىلمەك.
