بۇگىن استانا كۇنى اياسىندا «جەرۇيىق» ساياباعىندا حالىقارالىق «قىمىزمۇرىندىق» ەتنوگرافيالىق فەستيۆالى باستالدى.
بابالارىمىز «سارى قىمىز – دەرتكە شيپا, بويعا – كۇش» دەپ تەگىن ايتپاعان.
ايتۋلى شارا اياسىندا «جەرۇيىق» ساياباعىنا بىرنەشە اقبوز ءۇي تىگىلىپ, ۇلتتىق تاعامداردان تۇراتىن مول داستارحان جايىلدى. فەستيۆالعا كەلگەندەر قىمىزدان ءدام تاتىپ, ءبىر-ءبىرىن مەرەكەلەرىمەن قۇتتىقتاپ جاتتى.ەلوردالىق ق. قۋانىشباەۆ اتىنداعى قازاق اكادەميالىق مۋزىكالىق دراما تەاترىنىڭ ارتىستەرى ۇلتتىق سۋسىندى دارىپتەيتىن قويىلىم كويدى. اق ساقالدى قاريالار باتا بەرىپ, اق جاۋلىقتى اجەلەر ءان سالدى. ايگىلى ءانشى بيبىگۇل تولەگەنوۆا اپامىز جينالعاندارعا ىزگى لەبىزىن ءبىلدىرىپ, اۋەزدى ءان شىرقادى. فەستيۆالعا قىرعىزستان جانە رەسەي مەملەكەتىنىڭ قالماق, التاي, ءنوۆوسىبىر, ياكۋتيا, بايكول ايماعى مەن بۋرياتيادان كەلگەن تۇركى تەكتەس اعايىندار دا ءوز ونەرلەرىن جۇرتشىلىققا ۇسىندى.
ەتنو اۋىلدا جىگىتتەر مەن قىزدار التىباقان تەۋىپ, ساۋىق-سايران قۇردى. اۋىلدىڭ التى اۋىز ونەرپازدارى دا حالىق اندەرىن شىرقاپ, كورەرمەندەرگە كوركەم كوڭىل-كۇي سىيلادى. بالۋاندار مەن باتىرلار كۇش سىناسىپ, شەبەرلىكتەرىن كورسەتتى. اسىق اتۋ مەن توعىزقۇمالاق ويىندارىنىڭ كورىگى قىزدى. قىسقاسى, ەرتەدەگى قازاقى اۋىلدىڭ بەينەسىن كوز الدىمىزعا اكەلگەن عاجايىپ مەرەكەگە كوپشىلىك ءدان ريزا بولدى.
فەستيۆال ەرتەڭ دە جالعاسادى.
ازامات ەسەنجول
