استانا كۇنى مەرەكەسى اياسىندا «جەرۇيىق» ساياباعىندا 5 جانە 6 شىلدە ارالىعىندا «قىمىزمۇرىندىق» حالىقارالىق ەتنوگرافيالىق فەستيۆالى وتەدى.
بابالارىمىز قاسيەتتى قىمىزدى «ىشسەڭ – سۋسىن, جەسەڭ – اس» دەپ تەگىن ايتپاعان. ونىڭ ەمدىك قاسيەتى دە مول. كەيىنگى كەزدە ونى الەم عالىمدارى دالەلدەپ, انىقتاپ جازىپ ءجۇر.
ەلىمىز ەگەمەندىك العاننان كەيىن جاڭاشا ءورىس الىپ, كەڭ تۇردە ءوتىپ كەلە جاتقان ەتنوگرافيالىق مەرەكەنىڭ ورنى بولەك. اسىرەسە, ايتۋلى شارا الماتى, پاۆلودار, تاراز, شىمكەنت جانە تاعى باسقا قالالاردا جوعارى دەڭگەيدە وتكىزىلىپ ءجۇر.
ال ەلوردادا بولاتىن فەستيۆالدىڭ تاقىرىبى – ەل تاۋەلسىزدىگىنىڭ 25 جىلدىعى مەن «ەكسپو – 2017» حالىقارالىق كورمەسىنە ارنالىپ وتىر.
شارا اياسىندا «جەرۇيىق» ساياباعىنا بىرنەشە اقبوز ءۇي تىگىلىپ, ۇلتتىق تاعامداردان تۇراتىن مول داستارحان جايىلادى. قوناقتارعا قىمىز بەن شۇبات ۇسىنىلادى. بوز تالعا قايناعان سارى ساماۋرىننان شاي ىشۋگە بولادى. ۇلتتىق ءداستۇرىمىزدى دارىپتەيتىن قولدانبالى ونەر كورمەسىن تاماشالايسىز. ەتنو اۋىلدا جىگىتتەر مەن قىزدار التىباقان تەۋىپ, ساۋىق-سايران قۇرادى. اۋىلدىڭ التى اۋىز ونەرپازدارى دا حالىق اندەرىن شىرقايدى.
بالۋاندار مەن باتىرلار كۇش سىناسىپ, شەبەرلىكتەرىن كورسەتەدى. ۇلتتىق سپورتتىڭ دا كورىگى قىزادى. قىسقاسى, ەرتەدەگى قازاقى اۋىلدىڭ بەينەسىن كوز الدىمىزعا اكەلەتىندەي عاجايىپ مەرەكە بولماق.
فەستيۆالدىڭ اشىلۋىندا قىمىزدى ناسيحاتتاۋعا ارنالعان تەاترلاندىرىلعان قويىلىم كورسەتىلەدى. قاتىسۋشىلار قىمىزدىڭ تاريحىمەن تانىسىپ, ۇلتتىق سۋسىن ىشۋدەن جارىسادى. قىمىزعا ارنالعان اتا-بابامىزدىڭ ءجون-جورالعىسى جاسالادى.
وعان ەلىمىزدەن باسقا قىرعىزستان جانە رەسەي ەلىنەن قالماق, التاي, ءنوۆوسىبىر, ياكۋتيا, بايكول ايماعى جانە بۋرياتيادان كەلگەن شەبەرلەر قاتىسادى دەپ كۇتىلۋدە.
ەتنواۋىل قوناقتارى ياكۋتيا جۇرتىنىڭ قالىڭدىقتى كيىندىرۋ جوراسىن, بايكول ايماعىنىڭ وكىلى داريما جالسانوۆانىڭ جىلقىنىڭ قىلىنان جاساعان دۇنيەلەرىن, قازاقستاندىق شەبەر قايروللا ابىشەۆتىڭ كوللەكتسياسىن جانە حاندا شاداپوۆانىڭ «بايكول مارجاندارى» اتتى كيىم ۇلگىلەرىن قىزىقتايدى. سونداي-اق, «التىن دالا داۋىسى» بۇكىلرەسەيلىك بايقاۋىنىڭ لاۋرەاتى, قالماق اندەرىن ورىنداۋشى ەۆرەنا ورگاەۆا مەن التاي حومۋسىندا وينايتىن ۆيكتور يگناتەۆتىڭ ونەرىن تاماشالايدى.
تۇيىندەي كەلگەندە, مەرەكە اياسىندا اتالارىمىزدىڭ بايىرعى ءداستۇرى تاعى ءبىر جاڭعىرىپ, جاس ۇرپاق قادىر تۇتار تاعىلىمدى دۇنيە بولماق.
ازامات ەسەنجول
