قالا تىرشىلىگى

قىراندار كەردى قاناتىن

رەسپۋبليكالىق «ۇلى دالا قىراندارى» قوزعالىسى قۇرىلعان كۇننەن باستاپ حالقىمىزدىڭ سالت-ءداستۇرىن ۇلىقتاپ, ۇلتتىق قۇندىلىقتارىمىزدى قاستەرلەۋگە ەرەكشە كوڭىل ءبولىپ كەلەدى. 

جۋىردا وسى قوعامدىق ۇيىمنىڭ ۇيىتقى بولۋىمەن «استانا – كوك­شەتاۋ» اۆتوجولى جيەگىندە بۇكىل الەمدە تەڭدەسى جوق «ۇلى دالا داڭقى» مۇراجايىنىڭ ءىر­گەتاسىن قالاۋ سالتاناتى ءوتتى.

ۇيىمداستىرۋشىلاردىڭ ايتۋىنشا, بۇل – قاسيەتتى قازاق دالاسىنىڭ بويىندا تۇنعان تاعىلىمدى تاريحى مەن داستۇرلەرىنە ارنالعان تۇڭعىش مۇراجاي. مۇندا سيرەك كەزدەسەتىن ءتۇرلى تۇرمىستىق جابدىقتار, اشەكەيلى كوركەم-قولدانبالى ونەر تۋىندىلارى جيناقتالماق. ەكى قاباتتى عيما­راتتىڭ الدىڭعى جاعىنا قازاق حالقى تاريحي دامۋىنا ولشەۋسىز ۇلەس قوسقان جەتى داڭقتى تۇلعانىڭ ات ۇستىندەگى اسقاقتاعان مۇسىندەرى ورنالاسادى. مۇراجايدىڭ ءتورت قاپتالىنا ايگىلى باتىرلار قو­نىستانسا, ال, ىشىنە ەلىمىزدىڭ كورنەكتى قايراتكەرلەرىنىڭ بالاۋىزدان جاسالعان بەينەلەرى جايعاسادى.
سونداي-اق, مۇراجايدىڭ قاسىنان اتاقتى اقىن-جازۋشىلار مەن عا­لىم­داردىڭ, سونداي-اق, سپورت قايراتكەرلەرىنىڭ قۇرمەتتەرىنە ءتورت اللەيا قونىس تەبەدى. بۇل وسكە­لەڭ ۇر­پاقتى پاتريوتيزم رۋحىندا ءتار­بيەلەۋگە ىقپالىن تيگىزەر كە­شەندى جوبا بولماقشى.

مىنە, وسىنداي يگى ىسپەن ايشىق­تالعان ۇيىمنىڭ القالى كەڭەسى – ءىى سەزدە ەلىمىزدىڭ بارلىق وڭىرلەرىنەن جينالعان دەلەگاتتار كۇن تارتىبىندە قارالعان ماڭىزدى ماسەلەلەردى قىزۋ تالقىلاپ, الدا اتقارار جۇمىستار اۋقىمىن بەلگىلەدى.

قوزعالىستىڭ تەڭ توراعالارى – مارات نابيەۆ پەن سادىبەك تۇگەل­دىڭ «بىرلىگى مىقتى ەل وزادى» تاقىرى­بىن وزەك ەتكەن باياندامالارى دەلە­گاتتار تالقىسىنا سالىنىپ, ۇندەۋ قابىلداندى. رەسپۋبليكالىق «ۇلى دالا» قىراندارى قوعامدىق الەۋ­مەتتىك-مادەني قوزعالىسى جوعارعى كەڭەسىنىڭ جاڭا قۇرامى سايلاندى.

يساتاي قامباروۆ

تاعىدا

ۇقساس جاڭالىقتار

پىكىر ۇستەۋ

Back to top button